樂宴 (永光中心)

日本作為美食之國，真係由南到北都有地道美食。雖然疫情關係暫時去唔到日本旅行，不過要食日本地道料理都唔係難事。今次就去咗銅鑼灣嘅【樂宴】，係一間主打沖繩料理嘅餐廳。餐廳裝潢係日式居酒屋風格，感覺同民風樸實嘅沖繩好match，感受到地道氣息又令人感覺輕鬆。【三文魚刺身】好厚切，都幾肥美兼味道濃郁，食得出係靚三文魚刺身嚟。【炸沖繩魷魚鬚】外皮香脆肉裡煙韌彈牙，可以唧檸檬汁或者蘸沙律醬食出唔同風味。【沖繩AGU豬肉餃子】沖繩名物之一嘅Agu豬肉一定要試。熱辣辣嘅餃子皮薄饀靚，豬肉味道濃郁亦好juicy。【沖繩雞大葉串燒梅子醬】厚身嘅雞肉上面係香葉同梅子醬。雞肉嫩滑多汁，香葉香氣清新，再加酸酸甜甜嘅梅子醬，三種味道加埋一齊都幾夾，有特色，必點之算。【清酒煮蜆】粒粒蜆都好大粒，蜆肉豐滿鮮爽，清酒湯嘅酒味啱啱好，更能突出蜆嘅鮮味。【沖繩昆布豬肉炒飯】豬肉真係少咗啲，不過昆布炒飯又幾特別，仲好有益添。