元朗泗記

有晚放工又去咗元朗搵食，行到去建業街，見泗記冇乜人，就入咗去食。之前佢做臘味，標榜係自製，已經好想去試，但成個冬天過埋都去唔成，呢晚去到，sor，已經冇臘味喇，咁咪死死地氣求其嗌個咸魚肉片飯算。

上檯時店員話餸喺碗底，咁咪食住面頭塊咸魚先。咸魚我一向鍾意實肉，呢度雖然係梅香嘅，但食落唔死咸唔腥，都OK，撈飯嘅豉油相比起黎就完全唔夠咸，可能食緊咸魚，直頭覺得啲豉油冇味添，不過啲飯蒸得幾好，顆粒分明。

咸魚肉片蒸飯

$35

食到底啲肉片幾有鮮味，不過一樣略嫌淡口，我又唔記得影相，罪過罪過。店員似乎幾hardsell啲湯，但我就冇乜興趣，飲兩杯依家越黎越少有嘅清茶好過，久違嘅茶記味道，35蚊就埋咗單。