羲和雅苑

营业中

休息中

黃昏時間嘅香港景色真係好靚！望住呢一片景色食嘢，胃口都好啲😍😍😍 羲和雅苑裝修別緻，可惜天氣熱，如果唔係，坐戶外真係更加舒服。呢度嘅menu選擇都幾多，除咗招牌片皮鴨，仲有唔少京川菜式。先食一個小食，黃金炸豆腐，外脆內軟，甚有水準。然後係招牌片皮鴨半隻，侍應會介紹三種食法，我自己就最鍾意鴨胸皮配爆炸糖～ 感覺新穎有趣，而且食起上嚟都唔會覺得好肥膩。鴨腿肉除咗可以好似平時咁樣捲青瓜絲、京蔥、甜麵醬，仲可以有更新穎嘅食法：加入山楂條、洋蔥同埋藍莓醬，呢個就酸酸甜甜比較清新。今晚叫咗一個辣嘅菜式：毛血旺，呢度嘅毛血旺用料好豐富，有好多海鮮：大蝦、青口、帶子、魷魚等等，再加平時嘅午餐用、豬大腸、豬皮、粉條等等，大大嘅一窩好足料。毛血旺味道香辣俱備，又唔會嗆喉，味道剛剛好😋 入面嘅粉條吸咗湯汁嘅精華，好味！最後食個蔬菜啦，湯浸萵筍清清地，健康又好食。呢度嘅餸菜份量都多，下次多啲人嚟試多啲款式。依家仲有各款套餐，更加抵食。