CoCo壹番屋 (新港中心)

营业中

休息中

話說同朋友星期日去睇演奏會後，喺尖沙咀海旁飲咗文青咖啡，再喺海邊聽吓啲街頭Busking。雖然宜家啲人成日話喺香港生活好苦，上唔到樓人生毫無意義咁樣，不過其實香港都有好多可愛既一面，只差在你有無心或時間去搵出黎。唔知我呢個將會離開香港返新加坡既朋友，會唔會掛住香港呢？因為今日出黎大家主要都係傾計吐吓苦水，所以事前完全未諗定食咩好。好隨機咁㨂咗去CoCo壹番屋。我哋各自叫咗個炸三文魚扒庵列蛋包飯同芝士漢堡咖哩飯套餐。炸三文魚扒庵列蛋包飯－佢既咖哩辣度其實好弱雞，我唔係好叻食辣既都覺得無辣味，日本咖哩一貫作風。炸三文魚扒感覺上比起食豬扒無咁heavy，但係又叫做有得肉落吓肚，健康啲啲既選擇。芝士漢堡咖哩飯－漢堡內流心既芝士，再加上咖哩，送飯食真係一流，我淨係敢試食一啖，罪過罪過！甜品係曲奇雪糕，雪糕又幾好味喎，牛奶味好濃郁，入面仲有好多曲奇碎片。總括黎講，價錢合理再加上呢度既侍應服務都幾好，有機會係會再黎食過既。