一鳴拉麵

营业中

休息中

鐘意食粉麵既我，拉麵當然都係我既喜愛之一。咁岩今日拉麵癮，就去搵下有邊間唔錯既拉麵店。行到黎大埔墟呢條好似好多野食既巷，開緊既拉麵店有兩間，最後揀左試下呢間一嗚。叫左一碗黑蒜油拉麵同一碗芫茜拉麵，再加一個餃子同乳酸梳打。黑蒜油拉麵既湯底，黑到好似墨汁湯咁，望落夠哂重口味。而芫茜湯底都不相伯仲，成碗都係綠色。咁重料，鐘意食濃味既人就岩哂。而且食得豬骨濃湯拉麵，應該點都鐘意濃味野。湯底夠濃夠咸，但黑蒜油既香味好似比想像中淡少少。而芫茜湯就唔係，個湯一飲就即刻有成陣芫茜味，我覺得係芫茜愛好者必點。麵有得揀幼身同粗身，但其實兩者既分別，主要係喺直身同曲麵度，粗度好似唔算好遠，岩我呢種比較鐘意幼身麵既人。怕熱氣叫餃子唔叫炸雞，但原來餃子係炸既，以為係煎。不過，炸有炸好食，特別香口之餘，同佢個醬汁都幾夾。醬汁有誠意，混合左蔥、香油同醋，好香。乳酸梳打都比想像中濃味，夠氣又夠酸甜，唔會淡茂茂。好飲，夠解渴，唔錯。