豊勝手丼 (已結業)

今日要去銅鑼灣見客，見有空檔就周圍行下，係門口被丼飯吸引，最近又心思思想食日本菜，一個人就入去試下。睇睇餐牌有好多不同款式的丼飯，真係咩都想試下，不過前兩日食完刺身所以今次就試下「慢煮安格斯牛小排丼」。首先，丼飯有沙律前菜同麵豉湯。沙律菜好新鮮，配埋酸醋汁十分開胃；而前菜係鴨胸肉，都係淋上少少酸甜醬，再飲埋麵豉湯，係好standard又開胃嘅前奏，十分期待主角出場。等多一陣，牛小排丼就上碟，賣相十分吸引。牛小排做到外脆內嫩，好香濃的牛香，食落仲有啖啖肉汁，再加上溏心蛋的蛋香、牛肉的肉汁、珍珠米，仲有花心思的小配料脆蒜、香蔥，每一啖都十分滋味，而且味道豐富。特別要一讚店舖選用日本珍珠米，飽滿嘅飯粒同蛋汁肉汁完全融合，即刻加分!! 下星期又要嚟銅鑼灣，一定會再試下其他丼飯!!