一食鍾情

营业中

休息中

每個月總會到太子開會三幾次，例牌食個下午茶，同事一齊行經界限街見到間新餐廳，一於去試吓，餐廳名叫一食鍾情，標榜白滷水專家，大玻璃透視滷水檔食物整潔整齊，我地叫咗兩個下午茶餐，再叫一個滷水拼盤。鮮油豬仔包，麵包幾實淨， 並非空氣包，底面都烘底得好脆熱熱地，夾住厚厚一塊鮮牛油，係最邪惡嘅美味下午茶，配熱奶茶茶味香而滑。古法沙嗲配薄餅，薄餅外層酥脆有油香，個沙嗲的確與衆不同，味道好特別有啲咸鮮香味，配薄餅超好食，配白飯更加美味。鍾情滷六拼，有墨魚、金錢腱、豬生腸、燻蹄、水晶鳳爪、鵝掌翼，個滷水的確係招牌，好香濃滷水味道唔會過鹹，墨魚彈牙，金錢腱燻蹄夠腍，生腸鳳爪掌翼好爽口，而且全部都好入味。餐廳地方整潔出品有誠意，主打平民價錢，有好多套餐可以選擇，而且我們食呢個拼盤份量很多，以呢個價錢食到高質素白滷水，性價比高，值得一再光顧。