三分熟.菊志

呢間小店個外型同埋裝潢本身已經好吸睛，講物食之前，首先要讚吓佢個廁所，因為佢個香薰好香又好乾淨，其實餐廳嘅廁所真係好重要，呢間餐廳未食嘢已經加咗分。我哋今日係食$598嘅晚市套餐，當中我最欣賞係個扇貝配枝豆汁，個汁好rich但好清新好襯個扇貝。另外清酒煮蜆都煮得剛剛好，唔會煮到全熟留返海鮮嘅鮮味，仲有和牛薄燒都係好滿意，調味剛剛好，配搭juicy燒蔬菜中和返個肉味。仲有佢個燒鵝肝唔會太油膩，而且我鍾意佢唔係配多士，而係配焦糖蘋果，口感清新好多。最尾個炒飯係用黑松露去炒，大大碗新鮮熱辣，非常滿足。今晚餐廳滿座，目測生熟客都有，相信大家都知道呢度性價比較高。見到幾位師傅都好認真落力去準備食物，雖然客人好多，但佢哋都保持返食物嘅水準，作為食客係非常感動。順便提一提，師傅們嘅顏值都幾高@@ 食得開心。打開餐牌見到佢嘅午市套餐只係$198 ，好想搵日晏晝過嚟試吓！