豊勝手丼 (已結業)

今日放假同女去銅鑼灣行街，行左成個下晝，好彩最後有收獲，咁當然要食返餐好既惠勞下自己，最後係燈籠街附近揾左間叫豐勝手丼既日式餐廳，睇個名就知係食丼，所以見唔洗等位就入左去。餐廳裝潢偏居酒屋風，又係牆上掛滿sake燒灼既酒瓶，唯一唔同係燈光比居酒屋更光猛😂我地叫左一份牛小排丼套餐，一個極上吞拿魚丼，一熱一凍，開心share。冇等好耐兩個丼就到左，份量比相像中大，本身仲諗住追加啲小食，望到個丼，好彩冇叫到。首先我試左牛小排丼，熱辣辣，啲和牛煎得啱啱好，唔會太生，更加唔會太熟，食落好有牛味，啲醬汁酸酸甜甜好夾，連埋飯一齊食超正，推介，唯一美中不足係，入面竟然有牛腩，而味道又真係好牛腩，如果全部都係牛小排就更完美😋之後再試埋個極上吞拿魚丼，由肥到瘦，厚切吞拿魚6片，仲有吞拿魚蓉，大滿足。我個人最鐘意中肥吞拿魚，唔會太肥膩又食到吞拿魚既鮮甜味，重點係無論係肥定瘦，定魚蓉，都冇雪藏味，感覺好新鮮，推介。