花雕醉鴿，色香味俱全拍爛手掌！飽滿肥美香甜可口鮮嫩多汁彈彈滑滑的，食到一件接一件欲罷不能，必食推介！超香甜味美，酒氣芬芳不嗆不濁不澀，清香甜味拼上鴿肉肉汁令人不其然瘋狂地吸啜呢！肉嫩而皮脆，超水準表現！鴿肉滑彈，酒香入味帶甜，不澀不濁浸得出色好功夫。老闆話係由兩位資深師傅創作，最後才能得出依個味道同質感。
清蒸鯇魚腩，巨型腩肉最嫩滑而無骨的位置，食得到魚鮮味沒殅點泥味腥味，魚肚半滑半黏膠膠的，滾滿魚汁豉油精華所在更加滋味。椒鹽瀨尿蝦，肉質勁嫩滑鮮甜，最可憐就是太過細條無什麼肉食。炸蒜香口惹味，如果有碗上湯河粉勍襯到絕，最少撈兩碗直接灌落肚仔去。西蘭花炒斑球，走過油的厚厚斑塊顯得格外香口而魚味濃濃，質地鬆化不會腍啤啤。西蘭花脆嫩鮮甜高質，不過腍不過熟，可口滿意。
果皮蒸泥鯭，游水魚無得輸﹗皮黏肉嫩既結實，骨少啖啖肉，散發泥鯭獨特的甘甜鮮魚味道。豉油皇炒麵，鑊氣炒麵不油不膩不濕，注注彈牙乾爽味香濃，不過豉油味濃到略咸，幸好仍然極和味可口要搶住食﹗百搭炒麵配什麼都讚不絕口，淨食清新或搭載粥品、魚香茄子、麻婆豆腐、滑蛋蝦仁、涼瓜排骨、沙嗲牛肉、茄汁沙甸魚、等等等等，同樣色香味無與倫比。
炸越南春卷，外購不是自家製的即食產品完全不討好呢﹗而且油膩加餡料只得一丁點。彩椒炒豬頸肉，試試新菜色，香甜美妙﹗爽爽的豬頸肉味濃帶天然豬甜味，香而不膩﹗搭著鮮爽可口彩椒齊齊入口更加滋味。炸豆腐，多謝老闆慷慨解囊送贈小食啊﹗剛剛炸起出爐熱辣辣，遠處已聞到炸物的芳香。外脆內軟，酥脆非常而包著嫩滑白肉，豆香撲鼻回味無窮﹗
蒜蓉粉絲蒸蟶子皇，韌到橡膠一樣，蒸太耐過晒龍，洗唔乾淨勁多沙，食唔到要吐左去垃圾桶，浪費都無辦法。揚州炒飯，香噴噴乾爽飽滿足料，大量蝦仔叉燒混雜其中，雖然油了一丁點，但鑊氣煙揚勁勁勁好好好味 ﹗豉椒炒鵝腸，我其實想食豉油皇鵝腸，再次又再次錯單。味太濃太濁兼杰撻撻，炒得過熟不彈而帶韌仲碎濕濕，反而青椒十分爽甜呢。沙嗲金菇肥牛，我其實想食沙嗲金菇肥牛粉絲，點解無粉絲既？水水的沙嗲汁味道偏甜，搭上肥牛的羶香，整體唔難食。
潮州炸蠔餅，事隔兩年再試食，喜出望外骨骨骨，就係依隻味道喇﹗大量鮮蠔仔足料無欺場，清甜肥美飽滿，蛋漿鬆化香口不油膩，幾乎滿分。瑤柱扒菜芯，雖然貝柱絲得幾條真係寥寥可數，不過調味一流，還混入金菇碎增加鮮甜味道，跟爽嫩帶甜菜芯非常合拍，食得過﹗滷水墨魚鵝片，兩者同樣好好味非常高質，嬌嫩鵝片搭著彈牙墨魚片滾埋浙醋辣椒油齊齊食，百味交錯亙相暉映﹗
白灼游水海中蝦，游水生猛那有不好吃的理由﹗仲要幸運地預上翠紅亮麗的海油蝦。由始至終都是特上頂級，鮮甜無比大大碌，無敵爽嫩彈滑，蝦味超卓。肉質爽彈無比，鮮甜度極高，大量甘甜蝦膏，啜得津津有味﹗勁爽甜滑溜多汁鮮味既游水海蝦，索價二百幾大元，好貴啊！價錢係高一點，但色香味都穩守第一位﹗
蒜蓉粉絲蒸扇貝，細細粒肉仲腥腥地，蒸過龍有點韌，墊低粉絲凍既？而且蒜蓉只得一篤仔太少，蒜味薄弱太孤寒﹗沙巴龍躉兩味：清蒸龍躉頭腩，唯一可取就係啖啖肉，魚皮黏彈，白肉結實，淋上魚汁加鮮味豉油不停啜是十分美妙的事。沙巴龍躉兩味：西芹炒龍躉球，走過油的斑球份外香口吸汁，魚汁完全包實在內，結實彈牙的肉質，配埋脆甜無渣爽嫩西芹食得格外過癮。
滷水拼盤：紅腸、墨魚、鵝腸、生腸、大豆芽。香甜滑彈不咸紅腸、嚥韌海鮮味濃厚的墨魚、爽脆長長肉甜味的鵝腸、索索聲捲滿滷水的生腸，任何一款食材配上百搭大豆芽同樣精彩。韮菜豬紅，豬紅難得高質香辣出眾拍爛手掌﹗外脆內滑一咬爆汁。韮菜爽甜沒半點渣，大注大注夾著豬紅齊齊嘆先係至高享受。咸香滷水汁無甩拖，完全浸透每粒方形血塊，既入晒味兼水潤爆汁！韮菜爽爽無渣，夾住豬紅齊齊食別具風味。
椒鹽鮮魷，新鮮出爐熱騰騰，爽爽鮮甜魷魚件﹗薄薄鬆化炸漿最逗人喜愛，乾爽香脆不油膩，滾上喼汁更是滋味醒神。辣酒煮花螺，螺肉鮮彈嫩滑我鍾意﹗辣度夠濃刺激，酒味飄香醇厚，大量螺肉加辣酒汁撈飯一流啊﹗
1
