部屋咖啡室

樓上cafe唔係我嘅童年回憶，但會係我嘅拍拖回憶🥹事隔多年之後再去樓上cafe，係同自己小朋友去😆一邊食嘢一邊玩桌遊，咁就可以hea左一個下午。呢度全部都係靠窗嘅卡位，椅背頗高，可以隔開每檯客人，更可以增加私隱度。一坐底，職員就俾咗塊白板我哋，可以自己落單，喺白板寫低交俾職員就得啦，好特別。忌廉煙三文魚意粉$138兩大塊煙三文魚鋪喺意粉上面，白汁忌廉濃稠度剛好，意粉不算太硬，口感有彈性。All day breakfast $128沙律菜新鮮，炒蛋軟滑好juicy ，煙肉份量頗多，有點咸，配埋多士食啱啱好。小紅帽（跟餐+$22）我哋點左一杯士多啤梨奶昔，奶昔又濃又香，質感就像溶化了的雪糕。食完嘢仲可以玩一陣，部屋提供多款桌遊任玩。