如

今次去咗呢一間如心酒店嘅中菜廳食飯，之前試過佢哋嘅自助餐，今次就試下佢哋嘅中菜，見到環境都唔錯，十分寧靜，少卻咗平時酒樓嘅喧鬧，咁就可以好好咁享受晚餐。見到佢哋嘅枱都比較遠，所以大家都有各自嘅空間，餐廳都有房，所以如果多人嘅話就可以入房坐。今次因為多人所以就嗌咗好多嘢食，例如花旗參椰皇燉雞，紅燒生翅，油泡斑球，蒜香骨，竹笙木瓜煮南澳帶子，脆皮炸子雞，魚肚絲浸菜心，彩蛋芙容煎米粉，肉絲煎米粉。炸子雞 十分之脆口，而且肉質十分之嫩，食物樣樣分量都好足，而且因為今次人數比較多，所以佢哋都好樂意幫我哋分開一份一份，咁就可以免卻衛生同埋分菜嘅煩惱。而甜品方面亦都可以各自選擇，我地叫咗杏汁蛋白露，紅豆沙湯圓，桂花糕，食完之後就飽飽返屋企啦。 服務方便，服務員都十分專業，而且收碟同換碟速度好快，特別要多謝餐廳嘅一位姜經理，事緣同家人食飯嘅時候，依位經理認得出屋企人係以前佢20年前曾經工作過一間酒樓嘅客人，不得不讚嘆佢嘅記憶力，隔咗咁多年都認得屋企人，真係覺得好感動同窩心，而且十分之殷勤，實在值得下次再嚟。