香香宮煮 (金輝大廈)

营业中

休息中

尖沙咀呢間火鍋店行宮廷風格，每一個卡位代表一個宮，店內設有宮廷服裝讓客人坐喺龍椅影相，食物方面同樣以宮廷人物命名，鍾意四圍搵食同打卡嘅朋友仔就啱喇。湯底選擇眾多，昭陽公主椰子雞湯鍋以新鮮椰青水混合椰子、雞、蜆同粟米，飲落清甜滋潤，加湯唔加水、雞肉嫩滑，蜆大粒且鮮甜，值得一試。艾莎公主牛肉寶盒賣相一流，集齊手切牛崩沙、手切本地牛肉、新鮮牛展、頂級雪花肥牛、牛黃喉、牛肉粒同牛舌花，不同口感同味道，適合多人分享，整體肉質滑嫩唔嚡口，點埋醬汁更滋味。伊比利亞橡果豬都有驚喜，脂肪滲透肉內，呈現大理石紋般嘅油花，肉味香濃，兩款打卡able又好味，份量亦唔少，適合多人分享。小食方面推介即炸黃金炒響鈴，先用特選腐皮炸香成，再用鹹蛋黃醬炒香，即叫即炸，散發著香噴噴嘅嘅鹹蛋黃味，每一條都沾滿流沙鹹蛋黃醬，一個人絕對可以清晒一碟。陳年花雕醉海蝦帶花雕酒香氣，有助提升鮮蝦味道。紫菜櫻花蝦豬肉丸自家製，新鮮爽彈，出面比較少見呢間口味。飲住大大杯生啤打邊爐，夠晒Gur。