一鳴拉麵

营业中

休息中

前兩日天氣比較凍，好想食啲熱辣辣有湯嘅野，見到附近呢間拉麵舖評價唔錯，所以決定試一試佢!平日7點幾去到門口已經有人排隊，睇黎生意幾好，係呢個位置應該都係做街坊生意。等咗幾張枱就可以入啦~睇menu發現原來呢間除咗拉麵仲有好多其他野食，串燒、玉子燒、炸物等，都幾吸引。我揀咗黑蒜油拉麵配叉燒，麵就選擇咗太麵。碗麵有好香嘅黑蒜油味，湯底濃厚，豬骨味濃，又唔會太咸。麵底爽口，麵質軟硬適中。碗麵仲有半個溏心蛋，溏心蛋煮得啱啱好，有流心蛋黃，抵讚！兩塊叉燒都好香口，如果油脂再多啲就更完美，因為個人比較中意肥啲嘅叉燒。仲叫咗杯青蘋果一千零一夜，係青蘋果青檸薄荷特飲，杯野飲嘅顔色有啲似洗潔精，不過都幾好飲嘅！下次有機會想試下啲串燒同玉子燒，見到隔離枱叫咗好似都唔錯。