金豪酒家

营业中

休息中

想食靚海鮮又唔想下下走到入西貢流浮山，今日有個好推介～位於鬧市中央深水埗嘅金豪酒家，小菜靚之餘主打嘅海鮮調味一流，食材新鮮😋以下分享吓點咗幾味菜式～餐前小菜嚟個冰火辣魷魚，魷魚爽口彈牙，辣辣地但係由於係冷盤，所以又唔會話辣到食唔到，拿捏得恰到好處非常開胃。芥辣牛柳粒都令我印象深刻，好少會用日式wasabi襯中菜，味道好夾之餘仲有味蕾刺激感，嫩滑嘅牛柳粒配襯一種攻鼻感，好有層次口感豐富🤩接下來到主菜蒜蓉粉絲蒸蟶子王，隻隻超大隻又有咬口，下面嘅粉絲吸收晒海鮮嘅精華，加上秘製芡汁，真係食到欲罷不能！面頭鋪啲蒜蓉爆香，將海鮮嘅鮮味逼曬出嚟～連埋避風塘炒蟹有海鮮孖寶優惠，非常抵食😍炒大肉蟹啖啖肉，而且絕對唔係水蟹好實肉，炒得夠晒鑊氣，又香口又惹味~最後食返個椒鹽豆腐同埋啫啫通菜煲清清地，椒鹽豆腐炸得外脆內軟，裏面嘅豆腐仍然好滑鎖住水份，外皮乾爽脆卜卜，唔會有種好油膩嘅感覺。通菜煲即場放落啫啫煲，咋一聲霎時間煙霧彌漫，香氣撲鼻，菜亦都好揀手，爽口冇渣👍🏻整體而言，金豪酒家處理一啲大排檔中式經典菜式一流，而且仲有啲創意特色小菜，當然主菜海鮮更加令人食過翻尋味，海鮮控萬勿錯過！