熱記大排檔

营业中

休息中

每逢過時過節就輪到我自己煮飯，屋企人個個好似金舌頭托世咁，仲要諗到食完仲要執碗洗碗就煩到爆炸，好彩同區有間食得吓嘅大排檔，仲要夠冷氣果吓先得人鐘意，最啱我呢啲一年四季都係短袖嘅火爐，重點係可以食飽拍吓蘿柚就走得。講返呢度啲菜品都算多，時不時有新嘢，今日就試咗個鳯心卷，蝦膠幾彈牙，香口嘢值得一試！黃金涼瓜建議大家上枱後等一陣吹乾少少先入口，口感會更佳！蠔餅夠脆蠔肉亦足量，孜然手肘骨味道就差少少，孜然粉略嫌不足，當然自己都係做呢行，明白到口味嘅嘢各人有各人的喜好！整體來講滿足到屋企人我就最滿意，今晚食唔到焗魚腸，不過唔緊要，因為聽晚都係我煮，當然聽晚再嚟多次啦！哈哈😆