L'AMOUR

餐廳裝潢幾有情調，係區內少見有格調嘅餐廳。我哋揀咗oyster tasting menu，有生蠔、前菜、湯、主菜同埋優惠價加配甜品。生蠔一開始就出場，【日本宮城生蠔】、【法國諾曼第生蠔】、【澳洲哥芬灣】三款，各有風味。我最鍾意 Coffin Bay，好 creamy，食落冇腥味，入口即化，有種海水撞奶油嘅感覺。配埋白酒，夠晒 chill。Starter 就兩款都叫晒。【黑魚子蟹肉沙律】蟹肉都幾多，黑魚子啲鹹香令整體升咗級；【焦糖法式燉鵝肝】真心正——鵝肝本身就帶少少甜，同焦糖燉蛋都幾夾。【法式澳洲活龍蝦湯】，龍蝦味濃到冇得輸，仲有爽甜活龍蝦肉，真材實料！主菜【傳統法式油封鴨髀配焦糖蘋果】一咬落去皮脆、油香、肉嫩，配焦糖蘋果解膩亦都相當有心思。【香煎鵝肝配日本A5和牛肉眼】A5 和牛配鵝肝油香出眾，一齊食先食得出精髓，兩種油香夾得嚟唔會太滯，真係好 match。甜品【原隻海膽雪糕】，店員加水落乾冰營造夢幻感覺。用海膽殼裝雪糕真係型，雪糕係豆奶味，入面堅係有海膽，鹹甜交錯有特色。每道菜擺盤精美，食材高質，製作用心。CP值都幾高，值得encore。