打開Menu, 好多唔同選擇，刺身、壽司、卷物、鐵板、Pizza乜都有，仲要唔係平時日本餐廳食到好悶嗰d菜式。
我地先叫幾款推介嘅壽司：赤身、蝦味噌熟蝦、蟹膏豆腐蟹肉、七味姜燒帆立貝、醬燒三文魚炸蝦卷。
赤身壽司
蝦味噌熟蝦
蟹膏豆腐蟹肉
七味姜燒帆立貝
醬燒三文魚炸蝦卷
幾樣都好味都幾特別，尤其係赤身壽司，同平時食到嘅橡膠吞拿魚好唔同，必食！
之後見到有個鐵板麻婆豆腐茄子，咁搞笑就決定叫黎試下伏，仲叫左幾樣串炸：海苔墨魚他他、西京豚肉韮菜、天使蝦。同埋推介嘅蟹膏豆腐鱈魚乾，
麻婆豆腐茄子
海苔墨魚他他+西京豚肉韮菜
天使蝦
1
蟹膏豆腐鱈魚乾
估你唔到個麻婆豆腐茄子一d伏都無，有花椒油香味又唔會太辣，上面加左芝士一齊焗味道好夾，配埋送嘅蒜蓉包，一啖接住一啖極速食完，有驚喜！
串炸個墨魚滑夠哂彈牙，入面仲有唔少墨魚肉，炸皮唔厚勁香口。西京豚肉韮菜嘅豚肉好嫩滑同Juicy，配埋西京汁好好味。天使蝦大大隻，炸得好酥脆，蝦殼都可以食埋，蝦味濃郁，絕對唔係一般嘅膠蝦。
蟹膏豆腐鱈魚乾好濃味，啱哂送酒。
見個胃仲有d位，就叫埋推介嘅究極金龍卷同焦糖玉子燒。
究極金龍卷
焦糖玉子燒
個究極金龍卷上枱嘅時時侯哇左一聲，估唔到咁大份，仲要好好味。
焦糖玉子燒又係驚喜之作，上面焦糖面好似食creme brulee咁，同玉子燒鹹甜交纏，推介！
食到呢度已經爆到上心口，同師傅傾左陣計，佢話有個off menu嘅芝士蛋糕問有無興趣試下，甜品第二個胃緊係無問題啦。
芝士蛋糕配威士忌楓糖漿
原來呢個芝士蛋糕唔係一般嘅芝士蛋糕，係配上威士忌楓糖漿，首先個蛋糕入口好幼滑已經係上品，再配埋糖漿少少酒味甜味真係一絕。
總括嚟講，呢間野有創意又好味，食左咁多有質素嘅野都只係6百幾蚊，喺呢一區真係無得輸，立即成為我嘅日本菜飯堂。
