餐廳仲有吧枱座位提供，等大家可以睇住師傅炮製大家將會食到嘅刺身😍！吧枱上方仲有是日推介既新鮮時令刺身寫係黑板上面～
今晚我叫咗個魚生飯，寶寶就叫咗個鰻魚飯，另外仲加咗個牛油果軟殼蟹卷。
麵豉湯 （丼飯免費送沙律及湯）
味道唔濃，但好多配料，除咗豆腐、紫菜等一般都有嘅配料，竟然仲有隻蜆😳。
沙律夠涼菜夠新鮮，沙律醬亦好夠，酸酸地幾開胃。
德美海膽魚生飯 $158
魚生種類好多好豐富丫！有海膽、三文魚、油甘魚、帶子、熟蝦、蟹柳、蟹籽、三文魚籽、甜蛋及青瓜絲。海膽雖然唔算高級，但好新鮮冇臭味(試過食過放題有變質嘅臭味😖)，帶子好鮮甜，三文魚肥美，油甘魚有啲入口即溶feel🤩，樣樣都唔錯，一碗入面有齊咁多種刺身，真係好抵食！
活鰻魚朴葉飯 $97
鰻魚肉質好嫩滑，完全冇鞋既感覺☺️，細骨好軟唔吉嘴，軟到可以吞得落肚咁。鰻魚汁香甜但唔會太鹹，岩岩好，冇蓋過鰻魚既味道，絕對冇功高蓋主之嫌👍🏻。雞蛋絲切得好細好香蛋味，撈埋少少鰻魚汁同鰻魚一齊食，真係口感+味覺大滿足呀🤩！鍾意食鰻魚飯既你一定要黎試吓丫！
牛油果軟殼蟹卷 $77
牛油果好靚完全冇爛，而且切得好均勻唔會太厚，軟殼蟹亦炸得脆卜卜，香脆可口😋！卷得幾實淨，唔會一夾就散晒👍🏻！
嗌完埋單，仲有甜品送添！
