渝痴漁醉

营业中

休息中

見網上評價甚高，咁啱今晚有老細，即刻諗到上去試下。可能我哋去得早，又係閑日，唔需排隊即刻入得。每人128文，滿四人仲可以揀多個雞煲，加多十文仲可以上多兩碟牛肉，正，唔需講嘢即刻開食。條魚一上枱，即刻打左個突，點解聞唔到嗰陣攻鼻嘅麻辣味，一滾即刻夾塊魚肉試下，D魚肉都算滑，不過就真係冇乜魚味同埋麻辣味，唔通我呢排口味重咗😂問下D朋友，都係同樣嘅感受。可能真係習慣咗深圳嗰啲烤魚味，未封關前嗰半年，真係超鍾意食烤魚，一星期起碼食兩至三次，而家呢條魚真係冇乜食欲，唉，算數，仲有香辣啤酒雞。整雞煲加啤酒真係好鬼正，當年喺公司整雞煲食一定落啤酒，次次D雞俾人搶哂，剩返D配菜，三條友一隻半冰鮮鷄都唔夠食，近期D人腳唔啱先冇乜煮嘢食。個雞煲一上即刻有中伏嘅感覺，第一，又係聞唔到咩香辣味；第二，兜嘢黑蚊蚊，師傅落老抽咪手震；第三，D雞肉好嚡，一D都唔滑。好在兩碟牛肉味道ok,加多兩罐啤酒入去拾下拾下又幾滑，卒之即刻清哂。全場最有驚喜嘅係隻啤酒，飲完口度有D甜味🤣另外任食嗰D配菜入邊隻魚片都算可以，加返烤魚個湯底度感覺比條魚好食。最後總結一下，價錢係抵，環境尚可，味道就真係麻麻，管飽就可以。