唯一雲貴川風味

营业中

休息中

同先生喺荃灣買完嘢，忽然有啲掛住呢度嘅小窩米線，由細食到大，咁多年嚟人氣不減，門外依然係大排長龍。簡陋嘅裝潢，狹小嘅空間，平民小店嘅形象十年如一日。每次必點腩肉加酸辣，佢嘅酸辣唔係酸菜，係湯底調味上有唔同，雖然當一個餸係有啲貴，但個人認為加咗酸辣係好味好多，令湯底層次更豐富，但以前嘅酸辣係有好多黑色點點，我冇去深究係啲咩，但食落係好香，有種好有鑊氣嘅感覺，而家已經冇咗，而且湯底偏鹹，令人失望。腩肉份量亦少咗好多，而且冇以前咁軟腍入味。先生叫咗一餸米線，同樣都係腩肉，但冇加酸辣，湯底嘅味道就比較單一，而且感覺比較油膩。我俾先生試下我嘅湯底，佢都覺得差別好大。豆漿由荳品廠製造，係本地產品，不過不失。可能回憶中嘅味道總係美好嘅，而家嘅質素同以前比係有落差，而且價錢亦貴咗好多，但有機會依然會繼續幫襯，希望可以食返回憶中嘅味道。