鴻圖樓

营业中

休息中

愛好一盅兩件嘅老公話佢前幾日行經觀塘工業區見到間外觀好有特式又搶眼嘅酒樓，見佢地嘅價錢都好大眾化，所以就趁週末同我嚟歎茶。傳統中式酒樓樓高兩層，整體上燈光柔和而且枱與枱之間唔會迫迫夾夾，所以環境都好舒服，如果早啲嚟可以坐窗邊睇街景應該仲正。嘢食都有好多選擇，點心、燒味、煲仔飯同小炒等，咁我地就當然係食歎茶食點心啦。先嚟至尊蝦餃皇，蝦餃皮做得夠薄，外表晶瑩通透，入面嘅蝦肉就夠大粒又彈牙，一咬爆汁有咬口。再嚟蟹籽燒賣，口感同味道都唔錯，入面嘅豬肉同鮮蝦餡都好足料，上面嘅蟹籽都幾多，整體上就係大大粒有口感。當然唔少得我至愛嘅魚翅灌湯餃，灌湯餃都有成隻有手掌咁大，而且皮薄軟潤，入面嘅餡料就以鮮蝦、冬菇、豬肉等組成，當中又真係有條魚翅，一啖咬落去即刻有爆汁嘅口感，食得好滿足。之後就嚟多一碟四寶滑雞扎， 雞扎超大件又足料，以腐皮包住兩件滑雞、一條火腿，爽滑嘅豬肚同埋軟綿嘅芋頭，而且蒸得剛剛好，夠晒入味。最後見酒樓做緊脆皮BB鴿優惠，所以我地又叫返兩隻嚟食，上檯時仲係微熱，油溫炸得剛好香脆，雖然細細隻但依然燒到皮脆內嫩，啖啖都充滿肉汁而且肉味香濃。