同朋友食完飯諗住搵下場食糖水傾多陣計，當去到鋪頭門外嘅時間，就見到有兩間糖水鋪 一間要排隊 一間就冇人 而我入去嘅呢間就係空無一人，我入去前都諗住比三十幾蚊搵個位坐下 始終醉翁之意不在酒 就冇上呢度睇下食評就行左入去坐底左
一坐底已經成個環境好有壓力
!!!因為我未入過一間冇人嘅甜品鋪係唔播歌 
靜到自修室咁 搞到我同朋友都唔敢傾計傾得咁大聲 廢事搞到我地好似好嘈咁
一拎起個Menu 見到個用文字藝術師同powerpoint砌出黎已經心知不妙 但都係果句 都係想搵個位坐下 三十幾蚊一碗糖水都要嘅 更何況佢位處東大街呢條食街 競爭咁大 諗住差極都有個譜啊
點知?原來沒有最差，只有更差!叫左碗「金牌楊枝甘露」，一拎起支匙羹，就黎可以漿實支匙羹，飲第一啖，唔講以為自己飲緊奶!真係鴻福堂支裝果啲都好飲過佢!成三十幾蚊碗都比啲咁嘅野我
楊枝甘露可以一啲芒果味都冇!係叫做個面頭有啲碌柚肉，有返啲甜酸味!
啲野唔好食都唔其次，服務態度差真係冇情講!!!我地第一次落單嘅時候明明叫4碗，點知就整左5碗出黎!明明睇住佢落果張單寫4碗，個老闆娘自己整多左碗就賴落我地度，話我地落單唔講清楚，仲悔悔氣氣咁話「今次就算啦 下次咁樣要早啲同返我地講!」果下真係無名火都起!!!!你地員工同你溝通有問題就屈落個客度，我黎食碗糖水都要比你明嘲暗諷，咩態度啊宜家?!!咁樣做生意架咩?
題外話，講起員工同老闆娘，我地一入去果陣，果個咁嘅老闆娘就呼呼喝喝個唔知係咪佢個女嘅樓面招呼我地，唔記得拎碟墊住碗糖水又喝個員工拎返啲碟比我地，你點教員工我唔理，但可唔可以唔好系我地客面前用咁負面 咁唔好老脾嘅態度教女
，我入黎食糖水係求開心，唔係聽你點樣西口西面教員工點做，就算係做錯小小野，都唔應該用咁嘅態度教伙計，咁樣係唔配做一間糖水鋪嘅店主，亦都係唔配做個良心僱主!
