佢哋嘅七色魚生丼，上枱嗰一刻真係有少少驚喜，因為啲刺身鋪到好滿、色澤又靚，望落已經好吸引。入面有帶子、吞拿魚腩、左口魚、三文魚、海膽、甜蝦等等，款式真係多到有啲唔知由邊款開始食。帶子大大粒，入口好滑帶甜味；吞拿魚腩油脂分布好平均，舌頭輕輕一抹就化開；最令我有驚喜嘅反而係左口魚邊，有輕微炙香，油脂香味一爆出嚟，成件事即刻升級。海膽都幾乾淨，冇腥味亦唔會苦，甜蝦同其他魚生都幾新鮮～底下嘅醋飯溫度啱啱好，微酸但唔搶味。
另一碗極上粒粒魚生丼完面層鋪滿魚子、蟹子、再加上魚生粒，基本上一匙撈起嚟都係滿滿嘅料。魚子同蟹子爆卜卜嘅口感好過癮，但鹹度又控制得好，不會太攻擊性；吞拿魚碎軟滑，同魚子一齊食層次感好豐富；海膽依然係乾淨冇腥味，整體好好入口。
套餐跟嘅兩份沙律雖然唔算大份，但蔬菜新鮮，食落清爽，剛好用嚟平衡吓啲重口味嘅刺身。加錢轉嘅魚湯都比預期好飲，係清甜淡雅嘅風格，魚味夠但唔腥，飲到尾都唔覺油膩。
下次會試其他款😋
