LeeLaksa

营业中

休息中

收工肚餓諗唔到食咩，最後又行返入呢間家附近的星馬風餐廳。之前試過佢哋嘅喇沙，印象唔錯，於是決定再嚟食多次，睇下水準係咪一如以往。餐廳嘅裝修簡單利落，開揚嘅落地玻璃窗令地方睇落幾有空間感，有少少文青feel。平日晚上唔算多人，坐得幾舒服，服務員態度友善。環境感覺輕鬆，適合同朋友慢慢傾計或者自己一個靜靜地食嘢。新加坡喇沙🥢呢個係店內招牌之一，之前食過覺得唔錯，今次再試都係保持水準。湯底椰香味濃，但唔會太膩，辣度適中，配料有幾隻大蝦、芽菜、豆卜同半隻溏心蛋，幾足料。米線口感唔錯，唔會過腍，帶點彈性，🐥海南雞飯拼喇沙呢個拼盤適合想「兩樣都食」嘅人。雞油飯煮得啱啱好，飯粒分明又有少少油香，但唔會太油口，幾啱香港人口味。雞肉嫩滑，皮下係有高湯jelly個種。至於嗰碗迷你喇沙，湯底同大碗一樣，味道濃郁，雖然細細碗但配料亦足，半粒溏心蛋都冇減，性價比幾高。🦐大蝦青木瓜沙律口味清新，幾適合作前菜。青木瓜絲爽口，醬汁酸酸甜甜，上面撒滿花生碎，食落口感豐富。大蝦有幾隻，唔細隻但亦唔算非常大，整體味道協調，食落舒服開胃。