張公館

营业中

休息中

如果想有一個休息嘅時間，可以享受美景同美食，張公館係不二之選。🥣陳皮水鴨燉湯熱辣辣，聞到好香嘅陳皮味，又見到幾粒成粒嘅乾瑤柱，一飲就知係好足料。🥡脆脆笑哈哈，係用腸粉粉皮包住油炸鬼再夾住蝦滑，滑捋捋撳入口，睇落去就脆卜卜，直到中間就彈又爽口，好特別。🥢蟹籽麻辣燒賣，燒賣上面嘅蟹籽，一啲都唔孤寒，麻辣味亦都好出，夠晒辣，平時食燒賣都鍾意點辣椒油嘅真係點辣椒油都慳返。推介！🦐潮式香炸蝦棗最特別嘅地方係佢嘅炸皮好薄，裏便超爽口彈牙，直頭好似感覺到師傅有幾用心打個蝦滑出嚟🤣配埋蜜糖醬去食又好夾喎！🍭甜品叫咗我最鍾意嘅生磨蛋白杏仁茶，同桂花五色糕。杏仁茶勁好味，底有燉蛋白，杏仁茶都飲得出真係沙喎，有種沙沙嘅感覺。五色糕由上而下包括桂花糕，斑斕糕，火龍果糕，芒果布甸，同椰汁糕。聽到火龍果嗰下都覺得幾特別！好奇心極重嘅我當然就要試吓每一層分開咁食！食咗火龍果嗰陣佢真係有火龍果肉好驚奇！