三德素食館 (佐敦薈)

营业中

休息中

自從婆婆入左老人院都好難見到佢，疫情期間只可以趁佢去睇醫生之後食餐飯。婆婆雖然唔係食素，但都會同我地一齊去素食餐廳。老人家都係鐘意飲茶食下點心，所以就同佢去左三德飲茶，把握相聚時間。鐘意食香脆野既可以食千絲蘿蔔餅，不過個酥皮就稱為油左少少。金菇素肉崧腸粉唔算滑嘟嘟，但勝左夠熱辣辣同軟身，啱老人家食。其實唔知咩叫棒棒雞，反正就係有啲素雞絲配麻醬，再加素海蜇墊底，仲有中華沙律伴碟。雖然話係香辣，不過其實10小辣都冇，唔食得辣都可以食。最後叫左一人一個素翅鮑片灌湯餃，大大隻灌湯餃加埋熱騰騰既煙，個視覺效果已經好正。咬開入面有好多素翅，素翅本身冇味，但加埋啲湯就好好味。其實真既魚翅本身都係冇特別味道，好味既只係碗湯。為左得到魚翅，漁民會捕捉鯊魚，切左佢地既鰭再掉返佢地落海等食，而魚翅卻唔係啲咩美食。整體黎講三德都好適合同屋企人一齊黎食，下次要再帶婆婆黎先得。