泰樂小排檔

营业中

休息中

餐廳喺油麻地出地鐵行兩分鐘就到，好適合用唻weekday時朋友喺唔同區返工約個中間點食飯嘅餐廳，本身有少少擔心座位會細，但原來坐得好舒服，比想像中闊落，背囊都有位擺。叫咗個二人餐。🍜 Happy Thai 排骨船麵配金邊粉湯底味道夠濃，排骨炆得好夠腍，好入味，帶少少筋腱位，唔會柴。金邊粉煙韌但又夠滑，湯底偏甜少少辣，濃濃香料味，仲有大量香脆豬油渣，好有曼谷街頭大排檔船麵嘅風味。🐷 泰式椒鹽脆腩肉今餐嘅驚喜之作，炸辣椒蝦米同乾蔥蒜粒香味撲鼻，有啲啲避風塘感覺，淨係配料都夠送飯。腩肉外皮香脆，入口卜卜脆唔油膩。肥瘦比例好平均，咬落去有層次。🥬 蒜蓉炒通菜簡單但出色。通菜爽脆冇渣，菜又夠嫩，蒜香突出，鍾意佢調味唔過鹹，而且仲好大份。🧊 泰式奶茶套餐嘅凍奶茶只係加$8，係正宗嘅泰奶味道。🥥 泰式椰汁珍多冰椰香濃郁，珍多條煙煙韌韌，食辣嘢嘅時候，解暑又解辣。🥭 芒果糯米飯芒果夠熟夠甜，糯米飯煙韌帶椰香，椰漿微鹹，鹹甜平衡得好好。呢個二人餐好飽肚。幾鍾意鋪頭氣氛熱鬧輕鬆，好似泰國街頭食檔咁，平民、實惠又好食。