豆漿大王

营业中

休息中

野食雖然ok,但老闆娘對客既態度極差。入去食晚飯，點知一杯水都無比，我叫咗個唔辣肉燥麵比個女食，點知個我個女一食係辣，咪飲自己既飲品，老闆娘一見就話我地，咁我都講係你地黎錯咗辣麵比我個女食，而家小朋友個口好辣先飲野啫，有個好心店員明白事理話比我地飲，老闆娘即黑晒面，仲事後捉住個好心員工黎閙。係你地出錯先，仲要話個客就真係有問題，正常都會同個客講對唔住囉，唔係黑晒面對客囉，咁樣做生意有鬼人幫襯咩。

一講起新蒲崗 好多人都會諗到工廠區 但其實工廠區先喺多正嘢食 仲要喺平𡃁正嚟啦 入嚟睇下究竟喺咩吸引到我地吃霸去食-嚟到豆漿大王 見到枱枱都拎住個粢飯起勢咁食 我緊喺又唔執輸跟人食埋一份 招牌正宗上海粢飯 ($13)再望多兩望 原來全加料都只喺加$5即喺多炸菜 多油炸鬼 多肉鬆 都只喺加$5你望下張相 平時啲粢飯喺飯多過餸眼力差啲都會搵唔到啲餸 但呢到竟然喺餸多過飯 絕對好少有一食落去油炸鬼仲喺脆脆卜 食得出喺好新鮮😭糯米又煮得好軟糯佢啲炸菜又唔會喺死咸 夾埋肉鬆食真喺天衣無縫學佢slogan 話濟 真喺「忘不了的滋味」食完成條又唔會好濟 鍾意食粢飯嘅朋友絕對要嚟試下 真喺平靚正之選-生磨蛋白杏仁豆漿 $20間鋪都叫得做豆漿大王 佢啲豆漿一定喺好耍家見呢個生磨蛋白杏仁豆漿好似幾過癮咁 就嗌嚟一試佢底蘊佢有啲似杏仁茶 不過喺豆味重嘅杏仁茶唔鍾意嘅朋友可能覺得陣味好似藥水味但飲落其實幾滑口 飲得出佢杏仁磨得幾幼細而且蛋白唔會煲到好老 仲keep 到嫩滑感

星期日，新蒲崗工廠區一帶餐廳很多都沒有營業。誤打誤撞的情況下見到豆漿大王，所以與朋友齊齊食個下午茶～鹹粢飯 - 捏得夠紮實～配料有榨菜、肉鬆、油炸鬼～油炸鬼炸得爽脆不稔身，榨菜肉鬆份量亦不少～滷水雞中翼 - 醬汁很入味，雞翼肉質嫩滑～不錯的一道小食！小籠包 - 體積尚算大大粒～咬下後汁不算太多！皮不薄亦不厚，中規中矩～玉米漿(餐轉飲加$3) - 以粟米粒捏碎而成，飲落粟米味濃郁又清甜～熱飲一流！咸豆漿加蛋(餐轉飲加$11) - 很多材料～有油炸鬼、榨菜、蝦米！飲落豆味滑溜之餘又充滿咸香的味道～

朋友介紹，我食上海嘢幾十年，要試下有幾好味食咗粢飯，幾好味，油條脆，不過肉鬆太甜酸辣牛肉麵，味道正宗，醬色，酸味，辣香，麵彈牙！不過冇豬紅，牛肉嫩，香，補足！！小籠包皮有筋性，我喜愛！餃子，雲吞經常整，唔使食佢食物大部份即叫做即做，新鮮！！果然必食店！！冇介紹錯！！

走過工業區，這邊的美食餐廳也不少，除了有多間分店的瑞士咖啡室之外，這間豆漿大王也是我不時去吃的餐廳。最鍾意食嘅就係佢嘅豆漿粢飯。今日搵唔到野食，即刻又諗起依間野，於是就黎左食lunch。入面嘅格局其實唔大，所以當好多人嘅時候，就會感覺有少少迫，不過裝修簡明，比人感覺還好。我照例喊左個午餐: 肉骨麵，跟餐一碗熱豆漿，再另外加一個粢飯。粢飯黎先，熱辣辣嘅粢飯幾燙手，就住就住用手指尖撕開來食，糯米香軟，油炸鬼十分脆口，還有榨菜等，配合大碗豆漿的溫潤，總讓人滿足。主食的肉骨麵也是這裡的招牌之一，相比上次來食，肉骨感覺比較老了，上次較嫩，但還是很入味，而且三大條肉骨極之飽肚，大啖肉，大口湯，大口麵，相當抵食嘅選擇。唔錯嘅一餐：)

堅持每日午餐都寫一寫，今日去開工業區做野，0係附近食個粉麵快餐。見到呢間豆品做招睞，可以一試。食左一個雞翼酸辣湯面：老水雞翼算係入味，但煮太耐有點「鞋」。酸辣湯酸味同辣味都太重，入口太酸，後勁太辣，香味欠奉。非常值得欣賞既係麵底，粗幼適中，有麵香，火侯到位，煮透而保留到彈性，抵讚。但服務認真麻麻，無咩人招呼，而上菜亦慢。

之前友人介紹我呢間小店得，今日就帶同老公黎試下....粢飯＄13粢飯好正，飯唔多但饀料多，難得之處係炸菜幾好味，不過可能枱枱都叫，都等左15分鐘先有！熱豆漿＄7豆味濃，最好係自己落糖。五香肉骨麵＄31肉骨好淋好入味，麵身OK，係滑口嗰種，湯底加埋炸菜肉絲幾清甜，應該無乜味精！肉鬆奶脆多＄14特別，香口好味，但本人對炸野無愛，食左一舊，其他俾老公食晒酸辣雲吞＄32對於唔食得太辣的我黎講，酸辣度剛好，但老公係重口味的人，佢覺得應該可以再酸D辣D，成個湯好足料，雲吞皮薄有咬口。姜汁奶花＄11其實已飽到上心口，其實係好味嘅，不過實在太飽啦@.@食唔晒味讚：整體黎講，成餐都好滿意，出品係有質素，希望佢可以保持，因為宜家好難揾到又好食又唔貴的小店環境：企理乾淨，多人，通道比較窄價錢：非常親民，全單＄108食得飽飽同滿足，性價比高服務：可以啦，入得小店都唔預有五星級服務，唔知係咪繁忙時間，出餐慢左小小

D嘢食真一般 麵太淋 冇咬口 油豆腐粉絲湯冇成意 求其了事 完全不是那回事 小龍包皮太厚雪肉味太勁 酸辣湯一點酸及辣味都冇 ，豆漿冇豆味 ，唯一可取是次飯真了得，地方污糟 職員極冇禮貌

飲食男女介紹之前已經想俾嗰like佢，不過到今晚先啲起心肝開個户口寫下食評。招牌粢飯無得輸，飯量不多餡料足油炸鬼勁卜卜脆，所以一直單賣無套餐都差不多枱枱叫就知道佢幾招牌啦!!除此以外，呢度嘅酥炸雞翼麵係我必食之選，雞翼有少少甜味脆口好食，而麵我轉咗酸辣湯麵，酸辣適中又足料...用心製作嘅食肆買少見少，誠意推介!!

今次食五香肉骨麵，發現可能係依間野性價比最高既午餐。 三四塊大大的肉骨，煮得軟爛入味，咬落鬆化，有濃郁醬香，份量十足。 推介必食。 除左肉骨外，啲麵都值得一提，幾爽滑，配搭埋唔會過咸既湯，依餐食得好飽。 隨餐附送一碗豆漿，滑而豆味頗濃，未去到超凡入聖，但食得出係自家研磨。總結而言，成餐係水準以上。

食左個酸辣湯麵，豆漿加粢飯。酸辣湯麵個味道都幾到位，酸辣得幾爽，麵條應該是上海麵，較粗身，我比較鍾意。豆槳上的時候沒有加糖，可以憑自己口味加糖。 飲落在一般水准以上，可以收貨。 粢飯先係今餐既重點。 切成兩半既粢飯陳在碟上，拿起一咬，外面溫熱軟糯的糯米，接下來是好香既榨菜同肉鬆，最後咬到卜卜脆既油條。 送一口豆漿，那種味道配搭上來非常之好食。 其實依間野最好食既，就係粢飯，好少有粢飯可以做到入面既油條係熱辣香脆，但依間做到，係唔錯既。

應該係新蒲崗工廠區最有質素既小店，只須看看午飯時間，在門外排到長長的人龍，即使左右都有餐廳，但人們都在這間門外排隊，就可對其水準略知一二。第一次去，食左個秘滷肉碎拌麵，冇飲豆漿，轉左杯咖啡。拌麵既份量ok，只係肉碎感覺上唔係太飽，不過的確好味。關鍵有二: 一，佢個秘滷非常之惹味，有很濃但不過火既胡椒味道，食落微辣，非常之爽快。二，佢個麵條幾好食，軟得黎又條理分明，有啲彈性，撈埋容易食上癮，我自己食完一碗之後唔夠喉，差啲想叫第二碗。咖啡稍淡，但都香濃過一般茶記貨色，可以收貨。

新蒲崗有很多美食這日突然好想食粢飯一坐下就點了兩份粢飯 @HK$13、凍豆漿 +HK$7 和咸豆漿 +HK$14這兒的粢飯是即叫即做，加上是很多食客必食的皇牌食物所以要耐心的等一下喔 !!!粢飯有咸和甜兩款，甜的餡料有砂糖和油條而我們點的咸粢飯的餡料有油條、肉鬆和炸菜即叫即做的粢飯，上枱時仲暖烘烘的香軟的糯米，包著脆卜卜的油條、爽口的炸菜和香口的肉鬆，好豐富的餡料外層的糯米不太厚，吃起來不會飽飽滯滯，好滋味呢 !!!我點了平時很少地方有的咸豆漿咸豆漿不是豆漿加鹽咁簡單，而是加入了醬油和配料一起煮的這碗咸豆漿好足料，有蝦米仔、油條、蔥花、榨菜粒 ...除了油條，所有配料都切到很細粒，味道也不會太濃太咸飲完一大碗豐富又實在咸豆漿，惹味又滿足 ~~** 以上是以我的口味、喜好和情況作出分享和感受，一試 / 合用與否請自行決定

早餐時段7至11時半，二人剛好以$48吃了個滿足的早點，感覺經濟實惠。我們點的有粢飯、煎菜肉飽、醬爆肉碎夾饅頭，配熱豆漿及玉米漿,最令人回味的始終是餡料十足的粢飯及自家製的玉米漿。前者的油條不但鬆脆，還可據個人口味多加炸菜、油條、肉鬆或全料，也不過是加$1-5。後者漿身並𣎴會太稀薄，味道亦算濃郁，可謂較少能在香港餐廳喝到這款「熱飲」！吃飽以後，看到他們換上午市餐牌，又有晚市 （至9p.m.), 已急不及待相約再來吃麵！

新浦崗都系經常會踏足既地方，但一路吾知有一間隱世美食在民間。豆漿 ：有豆味，夠凍！－－好栥飯：夠熱，肉鬆夠鬆，油條係脆，竟然系脆！！－－不得了肉鬆奶脆多：靚肉鬆＋外脆內軟奶脆多－－好好