御品特色火鍋

小妹第一次寫食評, 不過第一次獻俾呢間火鍋店我都覺得值得~話說男朋友係一個火鍋痴，成日都話要食火鍋，咁岩有朋友推介食間家庭式小鋪，雖然暫時只係接受私人訂坐，不過見朋友講到咁正所以就去試下啦！鋪頭位置算易搵，係信和行過去就係，約5分鐘左右。鋪位唔大所以唔會太嘈，上面仲有一層閣樓。一坐低就有人拎左好大盤調味料過黎比我地自己撈，款式都算多，然後就揀湯底啦！老闆就推薦胡椒豬肚雞同花膠雞湯，由於小妹熱氣，所以就揀左花膠雞湯，老闆話仲可以養顏添！係我同男朋友仲「討論」緊叫啲咩野食時，個湯底話咁快就送左上黎！第一個印像就係好似屋企煲既老火湯，個湯底好清之餘，仲要有滾下滾下既老雞f。老闆話湯底自家煲，無落味精之餘，仲可以直接飲用，好似屋企食飯前飲湯咁，的確係一飲就會上癮。煲入面既湯料除左有老雞，仲有唔少既花膠。邊飲邊等野食黎的確幾爽！傾下食下，啲野食好快都到哂，黎張大合照先！不過呢個時候我地發現雞湯中既湯料仲有一半未食...都唔知係湯料太多定我地攻擊力太弱⋯⋯打邊爐又點少得牛肉呢！我地選擇左老闆推介呢個牛頸脊拼盤！老實講，老闆介紹每個部位既名我已經唔多記得啦，但單論種類，出面通常要分開叫，價錢自然幾倍咁升啦，老闆話做拼盤係想俾大家試多幾隻牛既唔同部份，唔會淨食肥牛咁寡，不過佢特別提醒唔一定經常有拼盤，如果果日啲牛唔靚就可能會只得一兩個部位。而質素有老闆把關就自然唔會差啦，睇下啲雪花幾靚就知！我就唔係專業食家，但除左牛味重之餘，最特別既係唔同部份既口感可以有差天共天既分別，有舊睇落去肥到漏油既肥膏，入口反而爽口無比，仲要完全無肥膩感，驚喜度同好玩度爆燈！而牛頸脊香口得黎入口即溶，我呢個肥牛控表示大滿足！另一個招牌菜就係依個醉蝦！老闆介紹既時候話呢個係佢地餐廳既特色菜，除左由老闆每日去街市揀靚蝦之外，上菜既時候仲會搵個透明高身樽入起d蝦，入面用酒浸住。一隻隻插喺度好得意架！我鐘意佢地既係酒味唔會好重，焯既時候仲會有花雕味飄出黎，就算我男友平時唔多飲酒都話好味！的確無介紹錯！而呢間店既特別之處係訂座時可以預訂海鮮，有鑒於我男友係個極度鐘意食海鮮既人，所以為左俾驚喜佢我就留隻兩隻龍蝦仔，話說我都係第一次用龍蝦打邊爐，所以都幾期待架！本來都有啲擔心會難Handle，不過上菜既時候師傅已經將龍蝦仔開邊，大細約莫為一隻手掌左右長啦！而最令人驚喜既係開左邊既龍蝦，在碟上⋯⋯仲郁緊架！見到啲腳仔仲有少少郁既時候真係feel到好新鮮，但係於心何忍呢⋯⋯呢個時候我男友本住大無畏既精神話幫佢快啲解脫啦就將佢掉左落個鍋度。老闆教焯既時間大約五分鐘左右，見到離殼就食得！味道除左好鮮之外，肉質仲好彈牙，感覺同平時酒樓食既龍蝦伊面好唔同，用黎打邊爐真係好正! 不過價錢就可能稍為貴少少啦，作為驚喜或特別菜式係唔錯既選擇。當然食既野就唔只咁少啦，佢MENU上既選擇除左有大路既豬肉同雞肉外，仲有菜盤同烏冬等等今次既消費人均約莫係HKD 300左右啦，但個滿足感絕對唔止呢個數目，有電視睇又坐得舒服之餘，最緊要見到男朋友食得咁滿足，無咩投訴，幾少可！…查看更多

一行四人到御品火煱試食，今天一入門口就有位，環境都唔錯。首先一黎到，老闆娘即時介紹花膠雞湯，個湯好甜，非常好飲，無介紹錯。醉蝦絕對新鮮，隻蝦夠彈牙一流口味。特級牛脊肉，絕對要試。有打墨魚丸，彈牙口感唔錯。魚皮餃等等丸類食品，之後老闆仲送帶子，令我地喜出望愛。總括第一次試食完，必定會再來。…查看更多

朋友生日聚餐，給推介一試這新開火鍋店。我們6人都是首次到此，開頭對附近環境有點保留(正在金x宮夜總會隔離), 舖頭不大，但萛整潔，而且非常友善的靚仔老板服務一流，感覺良好(有點私房菜的感覺)。訂位時，介紹人幫我們預留了超正的花膠雞湯底(花膠真材寶料，淆了足夠的時間，而且軟硬適中)。海鮮(魚較)是老板跟訂單專程到街市新鮮買回，亦只不過收回$7x/碟，新鮮，所以鮮味軟滑。(如果要花膠及海鮮，記得訂位時預留). 另外還有老板推介的芝士包及芥末丸, 亦非常值得試。…查看更多

適逢呢幾日天氣咁凍, 最好就一班人去打邊爐, 友人提議去旺角呢間新開張嘅火鍋試吓, 地方唔大, 但乾淨企理!一行8人, 點咗以下幾款食物: 招牌花膠雞鍋 - 個湯底超掂, 好濃嘅雞味, 唔係清雞湯貨式, 花膠亦足料唔腥!  打邊爐點少得牛呢, 推介佢哋有個精選牛拼盤, 可以一次過試幾種唔同嘅牛,  有手切本地肥牛, 牛頸脊, 牛舌, 牛胸油夠爽脆, 風門柳...[正] (店員話呢個係限量供應)  手打蝦滑 - 爽口之餘, 裡面真係有蝦㗎! 流心芝士包 - 鍾意食芝士嘅一定要試 脆炸響鈴 - 名符其實 [正] x 2 花雕醉蝦 - 新鮮, 酒味夠 黑椒牛筋丸 - 夠大粒同彈牙 ~其他仲有魚皮餃, 韮菜餃 ~ 不過不失, 最後加多過超滑烏冬作結尾, 大滿足!!!Order咗咁多的食物, 每人都係二百幾蚊, 食物新鮮有特色, 值得再去!  …查看更多

去到旺角周圍都要等位, 誤打誤撞入左呢間火鍋小舖, 老細話只係開舖兩星期, 可能因為咁所以唔係太多客,咁反而坐得仲舒服, 唔會好迫同嘈亂巴閉同其他火鍋店一樣有調味架, 值得一提係個豉油, 應該係間舖自己調過味, 大家都覺得唔錯~~ 老細推介間舖既特色湯底 - 花膠雞湯, 即管試下 湯底一到大家非常驚喜, 原隻雞再另上一碟熱辣辣既花膠, 老細建議先飲湯, 真係唔錯, 好濃既雞湯仲有淡淡既藥材味, 好似好足料, 花膠同平時火鍋ORDER既好大分別, 今次係又大又淋, 有膠質既感覺, D湯仲愈煲愈甜, 之後碌其他野, 特別係菜同菇都好甜, 超讚 另一樣超讚既係 - 野生竹笙, 碌完D湯又甜又爽, 非常好食見到MENU有樣平時比較少見到既醉蝦, 酒味啱啱好, 女仔都啱食, D蝦都好新鮮最後梗係要試試火鍋中最重要既肥牛, MENU上有好幾種牛肉, 於是同老細表明我地係鍾意食牛味重又有咬口, 咁佢就幫我地ORDER左碟本地手切肥牛, 果然啱晒口味~~~食完呢餐發現小店有小店既好, 至少坐得舒服又唔會俾人趕走, 服待又好,老細又會主動介紹, 好過好多大集團!!!…查看更多