山本屋 (海運大廈)

营业中

休息中

服務態度奇差，5點入餐廳話晚市唔比坐，第一全場無客，第二，你全日既價錢都一樣，咁5點30晚市又如何？我哋入嚟食嘢唔係淨坐，咁如果我食夜晚想坐入面又唔得？如果係，請貴公司劃分座位有清晰嘅指引！請貴公司劃分座位有清晰嘅指引！全香港唔係剩係得你哋一間山本屋食烏冬海港城唯一一間服務態度奇差嘅餐廳

第一次食，見到店面幾靚，野食外觀幾靚，就衝左入去一試。首先，等食，唔多人，點餐後，野食要等半個鐘先黎到。之後野食黎到，烏東一入口，好似食緊麵粉條咁，烏東口感頗硬，而且不像烏東。等半個鐘就煮出這樣嘅貨色。成一百蚊一個烏東，半個鐘先黎，包埋等，一個鐘就要催還枱，催你走人。仲要不停催。真係不得了，野食已經差，服務仲催你走。最後一口岩岩半個鐘。怪不得飲食業每況愈下。老實說，呢間真係可一不可再，唔明啲食評係喺邊度黎。

食物還可以，小食普通但烏冬麵還可以。但員工服務真心唔掂：呼呼喝喝，放低食物時求其有位就放低，上錯食物，連自己上緊乜野都唔知，地上嘅放袋盒執枱時用腳踢等等，令我只有一個決定 ：無下次

我地一家三口傍晚非繁忙時段入去，被安排中間長檯搭檯，眼見2張卡位都冇人坐，於是問侍應A可否坐卡位，侍應A表示要夠4個人先可以坐。但明明有張卡位都係三個人坐,仲食緊嘢。 由於坐得好迫，而且小朋友對住冷氣風口位好凍，於是再問侍應B，侍應B回答：我唔知，你自己問返頭先侍應A。服務體驗感受非常貼地，唔知以為自己去左茶餐廳，侍應之間談話也大聲，聽到附近有唔少客人都催單，但愛理不理，餐廳員工整體年齡水平應該都可以拎交通津貼，與餐廳形象不相符，香港分店服務體驗也與日本本店不能相提並論，好奇是如何培訓員工的。總括而言，唔會再幫襯，整體體驗感好差。

自從發現係L C X開左呢間山本屋後，我都經常嚟食～一嚟本身烏冬就係吸引，二嚟環境坐得又好又舒服～有幸坐窗口位置的話，小朋友睇船睇海最高興🚢🌊「❤️明太子冷平烏冬」平烏冬係扁身啲，彈牙同埋滑啲，最啱就係凍食～而加上略帶鹹辣香嘅明太子，啱曬夏天食～能夠消暑得嚟，仲可以增進食慾😋😋而且佢哋平烏冬所跟嘅湯底/醬汁都會淡口一啲～比較適合唔鍾意食太濃味嘅朋友～「🐣親子煮烏冬/🦐蝦天婦羅煮烏冬」手切煮烏冬，呢款手切烏冬較為傳統，粗身一點，實在一點～屬於佢哋嘅主打系列，湯底會有3款選擇～我多數都會揀黃金鰹魚清湯～雖然叫清湯，但實際湯頭嘅質地同味道都係比較濃郁～比起一般平時嘅鰹魚湯底嚟得更鮮甜惹味～佢地呢一個煮烏冬，每一款都係好熱辣辣鍋上～每一條烏冬都掛上熱辣辣嘅湯汁，非常入味～親子款式就係雞蛋加雞肉，雞肉似係地雞，質地會較實在而香～而蝦天婦羅🍤，薄薄嘅炸衣底下包住鮮嫩彈口嘅大蝦，又脆又惹味～值得一提，大家記得加配料一定要加年糕，軟糯得嚟充滿濃濃米香，必點品之一！「🦀蟹棒天婦羅」大大條嘅炸蟹棒，少少鹹多多脆～惹味又好味，我兩個小朋友就最鍾意❤️

LCX祥仔辣辣原來轉左做名古屋手打烏冬店，見唔使排隊就試下啦。兩個人被安排座位同隔離枱好近，一坐低就聽到晒隔離枱講緊乜，唔講我以為自己去左茶餐廳。① 招牌咖喱吉列豬扒煮烏冬 $118吉列豬扒正常既，唔會好油膩，唔係好柴皮，收貨。至於個砂窩咖喱烏冬，滾住上餐好期待，但咖喱味道無乜特別，招牌手打烏冬口感硬身，我仲懷疑未煮熟同個店員講，佢話佢地既手打烏冬係咁…只怪我唔識食② 蝦天婦羅平烏冬 $98失望過後，呢個平烏冬口感滑身，冷食幾清新，天婦羅蝦感覺就偏細隻。③ 冷豆腐 $18胡麻豆腐正常的滑，加胡麻醬好難唔好味。④ 燒地雞手羽 $48完全係放題炸雞翼質素，以為係雞全翼，原來得3隻雞中翼及雞尖，呢個價太進取吧

係海港城行街時見到呢間餐廳的menu有咖喱烏冬🤩未食過咁就緊係試下啦😆餐廳仲可以望到維港海景，可惜我唔係坐海景位😓吉列豬扒煮烏冬 $108（湯底轉招牌咖哩 +$10）咖喱湯底好香，都幾濃味，但又唔會好鹹。湯底仲有唔少腐皮，腐皮吸引哂咖喱味，好好食。烏冬好扁身，食落都幾煙韌，條條都蘸滿咖喱湯，都幾好食😋烏冬本身有隻雞蛋跟埋，蛋漿好香，烏冬蘸蛋漿味道極好😍好欣賞烏冬用瓷煲盛住，食到後面都仲keep到熱👍🏻吉列豬扒分開上，豬扒炸得非常酥脆，就咁食都已經好正，蘸咖喱湯底更加好食，豬扒更濕潤，又有好香的咖喱味。和風沙律 $38沙律都幾大碗，份量都唔少，沙律落滿咗和風沙律醋，食落好fresh，唔錯👍🏻山本屋 (海運大廈) (尖沙咀)尖沙咀廣東道3-27號海港城海運大廈3樓LCX 32號舖*上述文章只供參考及以當時價格為準

首先入到去坐低問可唔可以轉檯 staff A就話落要夠低消 然後我地蚊低消幾多 唔夠可以再order 跟住Staff A都話唔得；然後Staff B過來話要4個先可以轉 明明隔離張4人檯都係坐緊2個人；之後經理過來 問據點解隔離4人檯可以坐2個人ga？據話人的坐左成個鐘嘎啦 what？9唔搭8嘎對話；之後都肯俾我地叫夠兩碗烏冬+3款小食轉檯。唔明點解可以每個staff都唔同講法…之後最worst係食到三分一 發現碗烏冬裡面有錫紙 食物質素十分堪憂 …

星期二晚，大約6點幾到達，唔洗排隊等位。頂住日本百年過江龍名號，所以期待滿滿。寫紙落單，野食款式唔算多。吉列豬扒煮烏冬 $108湯底揀左-老店傳統味噌熱明太子平烏冬 $88加配蝦天婦羅 (2件) $28加配燒地雞手羽 (3隻) $48餐廳境觀好，一入去係好吸睛，一排大玻璃窗對正維港食物方面，好咸!烏冬口感唔錯，但兩個湯汁都好咸，食左一半已經咸到食唔落。小食上枱時係熱辣辣，但都係偏咸。另外一提，員工人手不足，買單係拎單出去比錢，企左好耐都冇人出黎，同食野位又有段距離，想搵人幫手都唔得。

🇭🇰山本屋🇭🇰手工烏冬真的少之又少，晚上逛街途中看到這家又不多人排隊就決定去試一下啦。價錢合理，在海港城中比較划算的餐廳。座位也不錯，還可以看到美麗景色👏👏👏👏點了親子煮烏冬還有黑豚煮烏冬，湯很濃郁🤤，很喜歡他們的腐皮，沾滿了湯汁，十分好吃！烏冬很結實，果然是手作的🫶🏻，但唯一不足就是烏冬面比想象中淡了一些。小心燙口😂😂如果想吃點東西又不多人排隊可以一試 但未必需要特別來這邊吃。

行開海港城果邊中午唔知食乜好，見呢間烏冬店有個師傅喺到整緊烏冬，中等價位又唔使等位，就試一試。餐廳地面好油，有點跣腳。.✨黑豚肉煮烏冬（味噌）✨用瓦鍋熱辣辣咁上枱，要灘凍少少先好擺入口🙊味噌濃郁，中意食重口味既我食到味都唔會覺得咸，烏冬質地煙靭，有麵粉香🍲配菜既腐皮吸晒湯最好食。黑豚肉份量唔多，過熟，而且幾片肉都疊到痾埋晒一齊，進食比較困難，肉質就同平時打邊爐果隻差唔多。✨蝦天婦羅煮烏冬（味噌）✨蝦天婦羅賣相比較細條，頹頹地，但食落比賣相好

碗麵係我食唔落時候影嘅， 個個都話啲麵彈牙好食？？根本啲麵煮都未煮熟， 烏冬個芯入面仲係白色嘅！！！！！個湯底超鹹完全唔想食。好彩嗰日食唔使排隊，如果唔係真係火都嚟。香港人飲食文化即係離曬地，越唔好食，服務越差嘅，啲人就會走去排隊。真係痴線

之前看到這是日本過江龍的廣告，又聽說大圍店排長龍，發現尖沙咀竟然也開了，這天十二點多經過，發現沒有人排隊，便打算試一試。 聽說大圍店門口有一個窗口會看到裏面的師傅製作烏冬的過程，很吸引眼球，但是尖沙咀店似乎沒有這個設計。 看到菜單上廚師推薦有親子煮烏冬，今天想吃得輕盈一些，就選了這個雞肉料理。他的湯底看上去濃濃的，但是其實並沒有很鹹，裏面除了烏冬和雞肉，附上一顆生雞蛋，還有油揚和一些大蔥。由於烏冬是手打的，所以長度形狀不一，口感煙靭，雞肉則是切成一條一條連皮，沒有什麼味道，也沒有雞肉鮮味，實在有點普通。比起上來，我自己會更喜歡韓式烏冬或是平常包裝的烏冬，口感滑溜，更適合我的口味。

呢間日本野專食烏冬嘅，主要有兩款烏冬︰平烏冬及煮烏冬，都唔錯。呢個係招牌野，蝦天婦羅煮烏冬配老店傳統味噌湯底，$108，個老店傳統味噌湯底就得個鹹字，所謂嘅傳統味噌唔係好突出，蝦天婦羅就得兩件，蝦肉都算新鮮，不過個天婦羅粉漿就麻麻地。湯入面有蛋同腐皮，好彩個烏冬做得好好食，佢話係師傅手切嘅，咁又真係有粗有幼有厚有薄，有D似山西刀削麵，個烏冬嘅口感唔錯，都幾有彈性，如果唔係就真係全部都麻麻地。呢個係吉列豬扒平烏冬，揀咗冷烏冬，幾清爽，吉列豬扒都OK，$98。呢個係蝦天婦羅平烏冬，$98，就係上面兩樣的混合體，所以唔多講了。

呢間舖頭住打手打烏冬，叫咗佢signature嘅麵豉湯底，湯底睇落好濃，但係第一啖飲落去，覺得其實唔濃味，但係當你食曬成碗烏冬之後，就明白點解唔可以整得太濃味，因為真係會覺得偏咸叫咗吉列豬扒烏冬，首先真係想講下個豬扒，令人非常失望，首先冇豬味不突止，仲好似合成肉咁樣，跟住食落去唔知點解我覺得似麥樂雞。。。總之成件事好詭異，淨係講個豬扒我會用非常難食嚟到形容但係手打烏冬係正常嘅，煙韌偏硬，但係其實我比較鍾意食軟身嘅烏冬，所以整體嚟講呢間舖頭is not my cup of tea我試過一次就算喇