影片
呢晚7点几唔想煮饭，落车后行咗嚟呢间烧味店买饭食，见到有烧鹅同烧鸭挂出嚟，毫不犹疑叫烧鹅油鸡饭，收银姐姐话要$73噃，我话照去，另外叫多一包猪生肠，$30，一共$103，姐姐话送多碗汤畀我。碗汤系眉豆花生瘦肉汤，但无影到相，碗汤嘅份量足，但无乜汤渣食到，即使瘦肉都只得一嚿仔，庆幸嘅系食唔到或饮唔到烧味店例汤嘅下栏嘢，例如烧猪骨、鸭背脊等，汤嘅味道清甜。呢盒饭师傅畀咗上髀及鸡胸我，配上一条菜心及葱蓉，份量都几多，啲饭系硬身，而且粒粒分明，好食过好多食店；油鸡我嫌色泽未够深，可能系冰鲜鸡关系，所以即使系鸡胸，都唔会嚡口，味道不过不失。菜心好腍甜，即使我唔太喜欢食菜心嘅人都觉得好食；烧鹅就绝对有惊喜，一啖咬落，又脆又热，即使啲饭𩠌食到一半，有啲烧鹅仲系热嘅，呢啲先系出色嘅烧鹅，如果肉汁能丰富啲，咁就顶呱呱啦！但呢个部位未必得，下髀就应该可以。最失败系猪生肠，以前烧腊舖嘅猪生肠好好食，依家好少烧腊舖见到有，而呢间嘅猪生肠，好明显发水，之后用盐腌及麻油捞，就卖畀人食，完全唔掂，以后咪搞我。
继续阅读
食到我成屋都屙，真系唔好贪平，污糟邋遢。平时见多人排以为好食，唔知原来观塘人食开呢啲下栏野，𠮶晚我地仲要问邻居借厕所😡买完几十蚊烧味分分钟比几百蚊睇医生。讲就讲咗，唔信咪由你，自己睇路
继续阅读