富記燒味

营业中

休息中

呢晚7點幾唔想煮飯，落車後行咗嚟呢間燒味店買飯食，見到有燒鵝同燒鴨掛出嚟，毫不猶疑叫燒鵝油雞飯，收銀姐姐話要$73噃，我話照去，另外叫多一包豬生腸，$30，一共$103，姐姐話送多碗湯畀我。碗湯係眉豆花生瘦肉湯，但無影到相，碗湯嘅份量足，但無乜湯渣食到，即使瘦肉都只得一嚿仔，慶幸嘅係食唔到或飲唔到燒味店例湯嘅下欄嘢，例如燒豬骨、鴨背脊等，湯嘅味道清甜。呢盒飯師傅畀咗上髀及雞胸我，配上一條菜心及蔥蓉，份量都幾多，啲飯係硬身，而且粒粒分明，好食過好多食店；油雞我嫌色澤未夠深，可能係冰鮮雞關係，所以即使係雞胸，都唔會嚡口，味道不過不失。菜心好腍甜，即使我唔太喜歡食菜心嘅人都覺得好食；燒鵝就絕對有驚喜，一啖咬落，又脆又熱，即使啲飯餸食到一半，有啲燒鵝仲係熱嘅，呢啲先係出色嘅燒鵝，如果肉汁能豐富啲，咁就頂呱呱啦！但呢個部位未必得，下髀就應該可以。最失敗係豬生腸，以前燒臘舖嘅豬生腸好好食，依家好少燒臘舖見到有，而呢間嘅豬生腸，好明顯發水，之後用鹽醃及麻油撈，就賣畀人食，完全唔掂，以後咪搞我。

呢樣嘢，依家起香港好少食得到啦！原因係乜？咪係驚膽固醇囉！呢度$30，值唔值？睇吓你鍾唔鍾意食，同埋睇吓你有幾想食啫！正所謂千金難買心頭好，想食嘅話，多多錢都可能覺得值，唔想食嘅話，貼埋錢畀你都唔想食，你話係唔係？相比呢個用蜜汁燒嘅做法，我更懷念用脆粉去炸嘅做法，甘香酥軟，回味無窮，可惜，以我所知唯一有做呢種做法嘅舖頭已經執笠，往事只能回味。講咗咁耐，大家估唔估到，或者知唔知道呢盒嘢係乜？答案係：燒雞膶

呢間嘅沙薑雞，我耐唔耐會買返屋企食，味道唔錯㗎$35半隻，$70全隻，呢度係半隻，而且睇住佢斬，無得呃。呢個價錢已經加咗價，之前係$35半隻，$68全隻。雖然話係沙薑雞，但佢無提供沙薑醬，只有薑蓉，而且食唔到沙薑味，雖然佢大大隻字寫係沙薑雞，雞呢樣嘢，好食就得啦，理得佢乜鬼嘢雞啫。。呢隻雞，即使凍食都好好食，啲肉好嫩好滑，無論當餸，或者餸啤酒或餐酒都好啱，我一個人可以食半隻，但咁嘅價錢，當然唔使望有雞味啦！

食到我成屋都屙，真係唔好貪平，污糟邋遢。平時見多人排以為好食，唔知原來觀塘人食開呢啲下欄野，嗰晚我地仲要問鄰居借廁所😡買完幾十蚊燒味分分鐘比幾百蚊睇醫生。講就講咗，唔信咪由你，自己睇路