喜牛蘭州牛肉麵 (MONTEREY Place)

同女友經開呢頭，搵野食果時見到佢門口大大隻字寫住免費續麵，望下價錢見性價比係高既，咁吸引就入去幫襯下啦，舖頭好近將軍澳Ｄｏｎｋｉ，店內裝修樸實舒適，有啲小菜18蚊以為佢好細份啦，黎到先發現比想像中大份好多，無論麵底定小菜都一樣大大碟上比你，唔只份量，味道一樣好，我幾欣賞呢間野！蕃茄牛肉麵$68蕃茄味湯底夠鮮甜夠開胃引誘到我大大啖咁食啲麵，濃茄湯永遠都係開胃必選，而麵底我特登嗌左二細較為粗身既麵，依然保持到彈性，牛腱入口即化好細膩，讚！佢仲可以揀細麵或刀削麵，岩哂唔同人唔同口味，喜牛涼麵$60同牛肉麵一樣好大份，正！菜同花生比例岩岩好，女友讚不絕口，份燉牛既味道出色充滿牛味，感覺上比湯麵更厚身，喜歡涼麵既朋友仲可以嗌佢加辣入去涼拌木耳$18如果喜歡清淡鮮味既就要嗌呢個喇，清清地小菜爽口惹味檸檬無骨鳳爪$28極之開胃，如果只可以揀一個前菜，我首選呢款，淡淡檸檬清香融入成隻擺到入口既雞腳，筋腱補下腳都好脆爽魚皮$38微辣既魚皮，比外邊食開既魚皮更厚身但保持到彈牙，好味紅棗枸杞蜜$18杞子明目，紅棘岩女士飲，熱飲竟然係用凍飲杯裝，比較少見，話梅金橘蜜$18超級潤喉，有嫲嫲既味道，如果唔鍾意太甜，可以嗌店家減甜tim…查看更多

星期日係將南閒逛，經過旺角呢間蘭州牛肉麵，身為麵癡嘅我緊係要入去會一會佢！今日試酸菜牛肉麵（$68） 一上枱個賣相都幾得！飲啖湯先。有驚喜！牛骨香氣夠醇厚，飲到淡淡香料味但唔會過鹹，飲完成個口唔會渴。但係！重點嘅麵條就出事啦——叫咗細麵，咬落明顯偏硬，欠缺蘭州拉麵應有嘅彈牙感。可能煮嘅時間掌握得唔夠準，食到最後仲有種「未煮透」嘅粉感，扣分!牛肉方面用咗牛腱肉，切得薄片，證明師傅刀工唔錯，肉質算係鬆化，不過香氣就爭啲。辣椒油反而係亮點，香而不燥，加咗兩勺即刻提升成碗麵嘅層次。叫左幾款小食，葷菜做得唔錯，雞翼可能煮好較耐, 又乾又實。一碗分量已經好足夠，唔需要加麵，大胃王可以挑戰下。…查看更多

行開將軍澳PopCorn，肚餓想食碗暖嘢，「喜牛」碗紅燒牛肉麵真係救命級好食！一上枱就知值回票價——牛𦟌多到疊成小山，仲要係厚切骰子粒，咬落腍到離譜，筋肉間啖啖滷香！重點係佢個牛骨湯底，飲第一啖雙眼即刻瞪大：濃到似羹湯嘅質地，匙羹舀起嚟會掛汁，甜香攻鼻之餘完全唔口渴（肯定冇落味精！）。麵條揀咗粗身刀削麵，吸湯力爆燈，嗦嗦聲食到停唔口～神來之筆係溏心蛋同酸菜！蛋黃流心撈湯超邪惡，自家醃酸菜爽脆解膩，夾埋牛肉食簡直昇華！食完成碗嘴唇黏住晒膠質，忍唔住「啜」乾淨先捨得放低匙羹⋯⋯將軍澳友食牛肉麵首選呢碗，份量夠大胃王都飽到捧肚走。溫馨提示：晏晝12點半前／晚市6點前到，避開人龍唔使等位！…查看更多

講開將軍澳食蘭州牛肉麵，十個有九個都會諗起「喜牛」啦！佢哋個湯底同麵質係幾得，呢點唔使多講。但係呀，今次我真係要 大力推介佢哋杯「話梅檸檬茶」！飲完真係有驚喜，絕對係成餐飯嘅點睛之筆！講真，出面檸檬茶周街都係，但加咗話梅落去，成件事即刻升呢！喜牛呢杯，一上枱就見到粒 大大粒、飽滿嘅話梅浸喺底，仲有幾片厚切新鮮檸檬，個賣相已經夠哂吸引。一啖飲落去，哇！個味道層次即刻出晒嚟！首先係 檸檬嘅天然清香同微酸，好fresh，唔係死甜嗰種。跟住， 話梅嘅鹹鹹甜甜 慢慢滲出嚟，唔會好霸道，係好溫柔咁同檸檬味撈埋一齊。最正係嗰種 「鹹甜酸」嘅微妙平衡，超級開胃！食緊碗熱辣辣、帶少少油香嘅牛肉麵，間中飲一啖呢杯冰凍嘅話梅檸檬茶，真係 爽到震，勁解膩、勁解辣！ 成個口腔即刻refresh哂，食慾都返晒嚟，可以繼續戰鬥！我諗佢哋真係落足料，粒話梅浸耐啲，味道會愈出愈濃，杯野飲到尾都仲keep到風味，唔會淡茂茂。而且甜度我覺得調得啱啱好，唔會飲完成口糖漿咁滯。大熱天時或者食到身水身汗，呢杯真係 透心涼嘅救星！ 總結嚟講，去喜牛將軍澳食麵， 千祈千祈唔好skip咗呢杯「話梅檸檬茶」！佢唔係普通配角，絕對係 提升成個用餐體驗嘅秘密武器！三十蚊左右一杯（價錢可能微調，以餐廳為準），飲到咁有特色又夾到個麵嘅飲品，真心抵！試過你就知，真係會心思思想encore！下次去開，記住點呀！包你唔會後悔！…查看更多

上星期日同屋企人去將軍澳Donki嗰邊行，見到有間響電梯後面， 十分隱蔽嘅麵店！喜牛牛肉麵！🐮🐮🍜🥣舖頭海報寫住四隻大字：免費續麵！非常吸睛！本身都冇咩興趣，以為係另一個大陸品牌進駐。就響我哋在門口前猶豫不決時，店員上前介紹他們的麵店，本身就係麵痴嘅我，最後決定就入咗去試吓～餐牌上有好多唔同嘅款式選擇，酸菜牛肉麵，蕃茄牛肉麵，不過第一次食，就想試吓佢哋最經典嘅喜牛牛肉麵！店員介紹佢哋嘅小食，例如滷蛋係每日新鮮整，不過驚食唔晒就冇試到😂佢啲麵係新鮮製作，可以揀唔同嘅粗幼度✌🏻✌🏻🍜🍜麵來了！嘩！超！大！碗！手打嘅拉麵，非常之彈牙新鮮👍🏼👍🏼湯底有淡淡嘅牛味，但佢本身唔係台灣牛肉麵嘅路線，唔係紅燒，所以唔深色！佢嘅牛腱好滑，近乎入口即溶，冇臊味👍🏼👍🏼👍🏼👍🏼👍🏼我揀咗小辣，不過覺得唔夠辣。佢有個自助吧可以自助斟水，加辣椒油，加醋。食完之後，膽粗粗問係咪可以免費續面！😂😂真係得！揀咗兩個細碗，份量都超多！真係抵到不得了，面嘅質素非常高！仲要免費續面，即係一個價錢食咗兩碗🤣🤣🤣🤣埋單嘅時候忍唔住向店員大讚：你哋啲面真係好好食！牛好滑！❤️💪🏼簡直就係滄海遺珠！屋企人都話下次再嚟要試埋佢哋啲小食～…查看更多

今日去試咗喜牛蘭州牛肉麵，呢個牛肉麵好有驚喜！一上枱個碗超大，湯頭似燉湯般香濃，一飲就知係用牛骨慢慢熬出嚟嘅，好鮮甜，唔會有嗰啲過重嘅香料味搶風頭。牛肉片得薄厚適中，煮得好入味，咬落好軟滑。麵條可以自己揀粗幼，掛住湯汁，每啖都好滿足。另外叫咗個秘制豬肉腸都好正，腸衣脆卜卜，入面嘅肉質調味好好，咸香適中。仲有佢地嗰杯石斛竹蔗茅根水，清甜潤喉，好解膩。不得不讚嘅就係佢個脆爽苦瓜，真係超正，清爽可口之餘，佢嘅調味料令苦瓜有種苦中帶甜嘅味道，而且嗰種清涼感覺真係為成餐加咗份清新。而呢間店嘅環境都唔錯，坐得舒服。服務員態度亦都好好。總括嚟講，喜牛嘅牛肉麵從味道到服務都好到位，好啱我呢啲鍾意食牛肉麵嘅人，以後想食牛肉麪嘅話，又多一個選擇喇！…查看更多

到將軍澳探朋友, 更好客地被邀到呢間主打正宗蘭州牛肉麵嘅餐廳, 意想不到令我一試愛上!餐廳面積不大, 但地方整潔, 主打牛肉麵配有獨特湯底, 提供八款粗幼麵條選擇, 另有少量小食同飲品供應。招牌喜牛牛肉麵:牛肉選用了牛腱部位, 切得幾薄, 口感林滑, 牛味香濃。湯底顏色清澈, 有別於傳統牛肉麵, 但味道出奇的鮮美, 加了大量蔥粒, 自選了最幼嘅麵條, 麵條口感彈滑, 稍吸咗個湯汁, 啖啖清香鮮甜。+$6 追加鹵蛋:鹵蛋鹵得入味, 淡淡鹹香, 跟湯底味道很夾。蕃茄牛肉刀削麵: 同樣湯底中額外加了蕃茄蓉, 自行攪拌令蕃茄蓉溶於湯底中, 湯底味道清甜, 不會過於重口味。自選了刀削麵, 全人手做, 有口感夠煙韌, 分量非常足。同樣追加了鹵蛋, 確實美味。麵食可加錢追加飲品,+$20 餐飲: 鴨屎香檸檬茶淡淡清新鴨屎香, 手打令檸檬肉整碎, 令飲嘅時候間中飲到檸檬肉, 令酸甜味更突出。豬耳: 豬耳分別為軟骨位同肉位, 同樣切得薄, 夾集京蔥同埋莞茜食, 惹味香口。魚皮: 口感超爽脆, 麻辣惹味又開胃, 令人不禁一口接一口吃。…查看更多

將軍澳澳南最近新開了一間主打蘭州牛肉麵的小店，裝修十分別緻，坐得舒適。價錢又合理！眾多選擇之中，點了酸菜牛肉麵和喜牛涼麵。酸菜牛肉麵配以自家手打麵，當中有唔同粗幼選擇。酸菜的酸度和辣度平衡得好，不會過分搶鏡。點了二細麵，麵質食落煙靭，都算掛湯。有時都擔心湯底會好油，但係呢一個調味都啱晒香港人口味。而牛肉薄身，而且炆得好淋。可以免費續麵添，大食都唔使怕。而喜牛涼麵就冇得揀面底，配上青瓜絲、蘿蔔絲和花生，當然唔少得仲有牛肉，味道清爽，幾啱夏天食。涼菜都好出色，點了涼拌土豆絲、涼拌魚皮等，每款都細細碟，啱晒食量唔大嘅你。另外芝麻雞份量都好多，滿滿都是辣油，幾惹味。飲品小店除咗汽水之外，仲有檸檬茶，話梅檸檬茶鹹鹹酸酸幾開胃！…查看更多

今午2人到此叫了2碗牛肉麵，首先叫侍應落單時，女侍應A小姐好cool 地說她的公司手機未入到menu那頁，我們也耐心地等，之後她一直入不到，期後更一聲不响地吩咐另一位女侍應B小姐協助落單，道理上A小姐應和我們說聲‘’不好意思，等我同事幫你們‘’。吃完後覺得牛肉無牛肉味，所以：無。下。次。了。…查看更多

今日去咗將軍澳探朋友，係Monterey呢個商場下面就有呢間牛肉麵店，叫喜牛蘭州牛肉麵，商場在同區好多人識嘅，因為上樓上已經係donki啦。呢間牛肉店，地方算好大，而且座位都好闊落，不過我今日係買外賣拎去朋友屋企食。我嗌咗一個蕃茄牛肉麵，牛肚麵，喜牛牛肉麵。另外仲嗌咗鹵蛋同埋雞翼。外賣唔使等好耐就有得拎喇。佢嘅麵底可以揀唔同嘅麵嘅麵型，我就揀左細麵。三碗麵湯底一流，很鮮甜美味，牛肉味濃。蕃茄牛肉麵就蕃茄味濃郁，好食，牛肉嫩淋好好食。而牛肚麵就係辣嘅，佢牛肚同埋辣嘅醬汁係分開嘅，所以可以自己調教辣度。最後喜牛牛肉麵更加好食，係佢招牌嚟，麵可以配其他食物，除了素菜，仲有葷菜，我點了鹵蛋同雞翼，都很入味，價錢合理，服務好，味道一流，一定會再幫襯。…查看更多

點咗兩個面+兩個小食.刀削麵好有口感，好好味牛展好好食，唔會淋得滯，亦都唔會韌，冇雪藏味，材料新鮮！個辣油都好香小食唔係好特別，但好味好彩係屋企附近，應該會成日幫襯，價錢又唔係貴，麵份量好足，仲可以免費加麵👍🏻…查看更多

自認大食嘅我哋比呢間將軍澳無限續麵嘅蘭州牛肉麵店吸引咗，仲叫多個小食做餸，再加返一碗麵share勁抵食！番茄牛肉麵 $65個湯係牛骨原湯幾清甜，反而蕃茄係一攝醬，比想像中冇咁濃郁，牛肉係薄薄嘅牛腱片，但驚喜嘅係個麵真係好食，揀咗蕎麥棱子，問過店員都係麵嘅形狀分別，呢款比較粗身呈W形好彈牙用餐期間都聽到廚房砰砰聲嘅打麵聲音，要為顧客無限續麵做好準備🤣雞絲涼麵 $65雞絲麻醬，配上青瓜，甘筍絲食落好清新，揀咗標準嘅細麵，都係好有咬口椒麻雞 $68睇落就好辣，但食落都唔算太辣，好香椒麻味，重點係份量超多堆到山咁高，配埋無限添加嘅麵底就啱晒😎特濃檸檬紅茶 跟餐$22咸話梅檸檬茶 跟餐$25即打香水檸檬茶飲落有好多檸檬果肉，話梅鹹鹹甜甜好特別！…查看更多

每次經過澳南海岸都會發現新既餐廳，今日見到ground Floor開左一間蘭州牛肉麵。餐廳入面座位都幾多，而且可以見到師傅拉麵條既過程。- 喜牛牛肉麵餐廳非常仔細，連麵條都有八種粗幼度選擇。湯底清甜唔油膩。牛肉方面用左牛腱部位，牛肉切得幾薄，入口好稔，牛味香濃。- 蕃茄牛肉刀削麵刀削麵係即叫即製，睇得出唔係用機器整，口感煙韌。蕃茄酸甜程度適中，- 鹽焗雞味道鹹香，而且剝曬骨食落好方便。不過肉質唔算好嫩滑。- 蒜香豆角豆角好爽甜，不過我覺得蒜味可以再香濃啲🤔我認為麵食無可挑剔，價錢以香港物價算抵食。值得一提係餐廳可以免費續麵，啱曬食量大既我🤩…查看更多

將軍澳海旁附近開咗好多新餐廳其中呢間麵店主要食牛肉，可免費續麵🍜喜牛牛肉麵，係招牌之一，原汁原味湯底散發濃郁牛肉香氣，令人食指大動～有8款唔同粗幼麵可以選擇，毛細為最幼麵麵條掛湯，附上微微牛肉味道入口滑順，軟硬適中牛腱薄薄地一片，口感軟腍份量比起大陸食嘅蘭州牛肉麵多～蕃茄牛肉麵基本上湯底同蘭州牛肉麵一樣但多咗茄蓉🍅味道冇咁單一酸酸甜甜更開胃～麵型係蕎麥棱于，較為粗厚有口感小食雞翼、豬肉腸亦值得一試！要試下鴨屎香檸檬茶、爆檸檸檬茶即叫即沖，新鮮解渴🍋‍🟩…查看更多

今日去朋友屋企探BB，買啲野食一齊食lunch，揀左呢間喜牛蘭州牛肉麵，比佢食d靚牛補補🤣。點左牛肉刀削麵同蕃茄牛肉麵；另外再揀左鹽焗雞，秘製雞鎚同惹味豬耳。麵底可以揀刀削麵或者細麵。口感就刀削麵好d，但吸湯就細麵正d，各有特色。同埋份量都幾多，抵食。牛肉質素好，類似牛𦟌咁，有筋有肉，好有牛味，有一定厚度，嫩得嚟有咬口，好食。小食方面同樣好味道，而且份量唔少。豬耳惹味開胃；鹽焗雞肉質嫩滑，咸香滋味，雞味濃郁；秘製雞鎚啖啖肉好正，今餐朋友同我真係好滿意。…查看更多