想食泰國菜，但又想試啲特別嘅？【FoodHall by Moon Thai】正正係一間融合地道泰式風味同創新元素嘅餐廳，帶你體驗一場味蕾探索之旅！餐廳採用簡約時尚設計，落地玻璃令空間感十足，環境舒適自在，俾人一種休閒又高級嘅感覺。

【FoodHall by Moon Thai】係一間非一般嘅泰國餐廳。佢有兩個唔同嘅運作模式，日頭就係FoodHall，提供多款創新泰式料理，仲有半自助餐添！夜晚變身為泰式餐廳，以精選單點為主，俾你細味米芝蓮級泰式美饌。呢個概念延伸自【Moon Thai】，曾經喺上環連續五年獲米芝蓮推介，備受肯定，呢次喺觀塘重新打造更全面更創新嘅泰式飲食體驗，將地道泰國味道結合新派創意，帶出一種新潮又細緻嘅泰式料理風格。

食All Day Breakfast當然唔少得！但你又試過泰式版未？泰式粥選用薑絲、蔥花、雞肉，入口綿滑。沙嗲雞串配開心果醬，係意想不到的組合，但食落幾驚喜。仲有酸種包配培根、雜菌同煎蛋，充滿異國風情，係一款融合多種元素嘅特色早餐。

【FoodHall by Moon Thai】亦提供多款地道泰式佳餚。例如炭烤沙嗲雞肉串燒，外皮微焦，雞肉肉質嫩滑，濃郁又惹味。肉碎生菜包鑊氣十足，炒得乾身，搭配生菜同青檸汁，既清新又開胃。而牛肉船麵湯底超濃郁且帶胡椒香，牛肉柔嫩入味，配上炸豬皮同菜，令人回味無窮。

另一款值得推介嘅就係烤香茅豬頸肉，豬頸肉厚薄適中，微焦帶脆，入口散發淡淡香茅香，配埋泰式酸辣醬，送飯一流。蛋咖喱配牛肉及薄餅亦值得一試，咖喱味道濃厚但唔辣，適合唔食辣嘅朋友，搭配洋蔥與甜椒，口感豐富。薄餅煎至金黃酥脆，沾埋咖喱，食落一流。



甜品方面，芒果糯米飯質地細膩，椰香濃郁，甜度適中，配埋新鮮芒果，非常出色。而斑蘭椰汁千層糕層次分明，食落香甜唔膩，斑蘭味幾濃！泰國奶茶加湯力水？呢個組合夠大膽！超特別嘅泰式茶湯力結合泰奶嘅甜同湯力水嘅微苦，入口茶味濃郁但唔會澀，非常特別。

無論你鐘意傳統泰菜，定係想試試新派融合菜，都可以喺呢度搵到驚喜！餐廳環境寬敞，適合朋友聚餐或週末放鬆享受。想試高質泰式美食，去【FoodHall by Moon Thai】try try啦！