而家成日都話百物騰貴，一眾上班族搵錢之餘仲要捱貴飯，開飯仔就搜羅各區嘅平價飯堂畀大家，食得飽仲可以錫住個銀包。今次嚟到觀塘區喇，睇吓有邊間餐廳抵食～
目錄
沙田篇
潮州心機小店 潮滋味
圖: ylxjay
估唔到lunch time都有得食潮式菜！餐廳主打傳統潮汕菜式，價錢親民之餘仲有好多特色小食，款式多元又有心思。一定要試呢個特色海豐小米，小米似細細粒嘅粉果，皮用蕃薯粉做，煙煙韌韌包住鹹香肉餡，一咬爆晒汁，加埋蠔油或辣椒油一齊食更香口惹味，啱晒想試新嘢嘅你。潮式叉燒菜脯煎蛋飯都唔錯，份量十足，煎蛋夠晒大塊，外脆內嫩仲有少少蛋汁，配埋叉燒、菜脯、洋蔥絲同紅蘿蔔絲，好味又飽肚～另外手拉腸粉、鹹麵猴同斑蘭多士都值得一試！
新派港式茶記 鴛鴦奶茶
圖: whalefoodie
店名有地道情懷，但賣嘅唔止港式餐，西餐同特色小食都一應俱全，絕對係寫字樓人嘅福音。午餐推薦試吓佢哋嘅鐵板餐配是日餐湯，鐵板黑椒西冷牛扒肉質嫩滑彈牙；鐵板巨雞髀配煎蛋外皮酥脆、肉嫩多汁，而且份量大好抵食！如果放lunch時間遲少少嘅仲可以食到佢哋嘅熱香餅芝士豬柳蛋漢堡，甜甜鹹鹹好上癮，仲包薯條同飲品，CP值爆燈！
必試原隻烤雞 CHICKEN FACTORY
圖: 呢間主打烤雞嘅小店，佢地烤雞套餐超抵食，仲要包埋兩款配菜，性價比超高！烤雞方面外皮烤得香脆，肉質嫩滑又多汁，連雞胸位都唔鞋，真係做到內外兼備。醬汁有3款揀，包括香濃黑椒、惹味辛辣同濃郁咖哩，但其實原味已經夠晒入味，唔點汁都已經好好食。如果想健康啲，配菜可以揀焗薯、烤粟米或者炒雜菜～餐廳仲貼心提供膠手套同自助洗手區，食雞都唔怕整污糟。如果係兩個人嚟大大推介二人套餐，有原隻烤雞、雞油飯或蘑菇飯兩碗、烤粟米條、焗薯、雜菜同兩款飲品，飽到捧住個肚走。另外仲有海南雞飯同沙薑雞飯供應～
真材實料餃子 袁記雲餃
圖: 陳真
主打現包現煮餃子嘅連鎖小店，雖然舖頭細細，但門口一角設咗專門包餃子嘅位置，店員嘅手都冇停過，成個畫面好有人情味。招牌之一係全家福餃子，一碗有12隻6款唔同口味，包括白菜豬肉、粟米豬肉、韭菜、薺菜等多款組合，樣樣都各有特色。可以揀乾拌或者配湯，推介佢哋嘅網紅混醬乾拌食法，醬汁係辣醬、麻醬加花生醬，香辣惹味又有層次，啱晒鐘意重口味嘅朋友。另外幾乎每枱都會加配一杯熱辣辣嘅鮮榨玉米汁，飲落似粟米湯咁濃郁但無咁鹹，反而帶甜，暖胃又滿足。
地道豆漿粢飯 豆漿大王
圖: LindaWong
老上海風味小店，有得食地道嘅豆漿粢飯～鹹粢飯用薄薄一層飯包住炸菜、肉鬆同油條，炸得香脆，配搭有層次。一啖咬落去，幾種口感一次過出現，好香口好滿足；鹹豆漿熱辣辣上枱，豆味香濃，入面有炸菜、蔥花、蝦米同脆卜卜嘅油炸鬼，鹹香惹味。店內仲有唔同口味嘅豆漿，傳統甜豆漿豆味濃郁夠厚身，甜度啱啱好；薑汁豆漿就好暖胃。
觀塘篇
抵食西餐cafe 意堡
圖：saruka
隱身喺宜和街街市旁邊嘅小巷，呢間小店主打即叫即製嘅意粉同漢堡，配上懷舊裝潢同店內坐鎮嘅貓貓店長，感覺格外窩心。最受歡迎食品包括芝士和牛漢堡、香茅豬扒漢堡，前者牛肉厚身多汁，配搭濃郁芝士，入口肉香四溢；後者亦係招牌之一，豬扒炸得香脆，切條放入鬆軟嘅包中，口感豐富。想試啲特別款式，可以揀豬頸肉漢堡，肉質彈牙，醃製入味，令人一試難忘。配菜方面推薦七味粉蒜香雞翼同黑松露醬粗薯條，雞翼外脆內嫩，薯條嘅黑松露味夠晒香濃～
大大粒手工餃子 餃子爺爺
圖：nam1019
主打手工餃子款式多樣化，餃子餡料飽滿、味道鮮香，皮薄彈牙，無論係水餃定煎餃，味道同口感都見心機。西洋菜鮮肉餃比較少見，餡料清香健康，特別啱鍾意淡口味嘅朋友；而煎京蔥牛肉餃則係必試之選，牛肉鮮嫩多汁，京蔥味道香而不嗆，加上底部煎得香脆，食落層次感十足。仲有素食之選如鮮野菌粉絲素餃，照顧唔同食客需要。店內仲有多款中式小菜，包括花雕雞翼、麻辣手撕雞、涼拌海蜇、蠔油西蘭花等。
番茄湯麵專門店 番茄18
圖：呢間隱身於工廈內嘅冰室風茶記，裝潢充滿港式懷舊氣息，綠白紅三色招牌令人勾起無限回憶～餐點主打自家熬製嘅番茄濃湯、瑞士雞翼同港式經典美食，人氣之選瑞士雞翼撈公仔麵配牛乳炒蛋及丹麥多士，雞翼肉質嫩滑入味，瑞士汁甜中帶鹹，滲透住豉油、薑蔥、冰糖香氣；出前一丁吸盡瑞士汁，加上香滑嘅牛乳炒蛋同鬆脆多士，飽肚又邪惡。另有招牌番茄湯底通粉，味道濃郁，酸甜度適中，配搭肥牛或瑞士雞翼都非常夾。
地道港式茶記 番尋味
圖：憑住親民價錢同用心出品，深受街坊同上班族喜愛。餐廳主打多款抵食又夠飽嘅飯麵選擇，款款都大件夾好食。人氣小鍋米線可選酸辣或上湯，配料靈活配搭，如豬膶、魚腐、餃子等都夠晒惹味，米線爽口彈牙，湯底夠味又唔過火。泡飯同樣值得一試，如上湯菜膽雲吞雞配白飯雞肉嫩滑，雲吞大粒足料，飯粒吸滿上湯精華，令人一啖接一啖。珍寶炸雞髀餐都好抵食，大大隻雞髀外脆內嫩，甜品方面可以試埋阿華田脆脆西多士，炸得香脆，配上煉奶同阿華田脆脆，極邪惡又滿足。
高質抵食上海菜 小明珠
圖：主打地道上海菜，走家常風味路線，價錢親民，出品有水準，係區內一間低調實力派嘅好選擇。人氣之選當然係佢哋招牌小籠包，皮薄摺紋細緻，咬開即爆湯汁，餡料鮮嫩唔會過肥，每日下午1:30至3:00仲有限時優惠價，性價比極高。鍾意辣味嘅朋友唔好錯過紅油抄手，餡料紮實，配上麻香微辣嘅醬汁，夠晒惹味。小炒方面櫻花蝦炒高麗菜炒得爽口，蝦香滲入菜心；豉椒炒蜆鑊氣十足，鹹香惹味。甜品推介豆沙窩餅，外皮炸得酥脆，內裡紅豆餡香甜綿密，係飯後嘅完美句號。
灣仔/銅鑼灣篇
懷舊車仔麵店 麵檔
圖：以懷舊港式風為主題嘅車仔麵，背景音樂播放住經典金曲，為食客帶嚟一種熟悉而溫暖嘅氛圍。多款餸菜之中，推介滷水孖筋，彈牙而且滷得入味；豬紅則嫩滑冇腥味，口感近似啫喱，吸收湯底後更加惹味—；糖心滷水蛋蛋黃則晶瑩剔透，入口即化。除咗車仔麵，店內亦提供多款飯餐選擇，蔥油脆豬扒蛋飯同香煎肉餅脆蛋飯都唔錯，前者豬扒炸至金黃香脆，配上滑蛋同豉油冇得輸；香煎肉餅兩面煎至焦香，肉質紮實多汁，簡單又好味。
自設工場製作配料 三才魚蛋粉麵
圖：呢間小店藏身喺渣甸坊街尾，舖頭唔大，但每日都人頭湧湧，門口仲分開外賣同堂食排隊，可見佢有幾受歡迎。必試佢哋嘅魚蛋魚片米線，湯底可以加腩汁，味道更濃郁；魚蛋彈牙有魚味，魚片大片爽口，簡單但夠晒滿足。雙拼餃子粗麵都係唔少人鍾意嘅選擇，鮮蝦水餃蝦肉新鮮，配埋木耳爽口彈牙，西洋菜餃亦好清甜～即炸魚片頭同炸墨魚蝦條都好受歡迎，每日新鮮炸起，外層香口又唔油膩。
正宗人手刀削麵 拾味正宗刀削麵館 (渣甸街)
圖：呢間刀削麵館主打每日新鮮現場削麵，無論係湯麵、熱拌或冷撈麵，都有多款口味同配料可以搭配。必試麻辣牛筋腩刀削麵，牛筋腩燜得極腍，配合麻中帶辣嘅湯底，好惹味。如果唔食辣可以改為清湯，同樣滋味十足。口水金錢肚刀削麵亦係人氣之選，牛肚坑紋分明，質感嫩滑且充滿膠質，口水汁比麻辣湯底辣度低啲，但香味更濃郁，配埋煙韌彈牙嘅刀削麵，味道層次更豐富。餐廳仲有上海菜飯、滋味小食等，同樣值得一試～
平民米芝蓮食店 強記美食
圖：由街邊小舖起家，曾連續多年獲選為米芝蓮街頭小食推介，近年搬入地舖，環境舒服好多。主打傳統港式小食，有腸粉、糯米飯、魚蛋魷魚蘿蔔、粥品、生菜魚肉湯、炒麵等等，選擇多，價錢又親民，上班族同街坊都成日幫襯。蝦米煎腸粉煎到外脆內軟，香口得嚟仲有淡淡蝦米香，蘸埋豉油、芝麻同秘製辣醬，味道已經升級，但加埋雞蛋增添蛋香味就更滋味！仲有雜錦臘味糯米飯同砂鍋鮮牛粥都係唔錯嘅選擇，前者煮得軟糯，帶有陣陣臘味香氣；後者粥底夠綿，牛肉嫩滑，落埋薑絲提鮮，味道濃郁又暖胃。
必試沙嗲牛肉通粉 鳳城小食
圖：置身灣仔街角，一間充滿地道香港味道嘅老字號茶餐廳，主打沙嗲牛肉麵、招牌豬扒、各式多士同地道港式飲品。沙嗲牛肉麵係人氣之選，沙嗲湯底香濃帶少少甜辣味，味道濃郁但唔會太膩，配通粉最夾，每粒通粉都吸滿湯汁。招牌豬扒用秘製醬料醃製過，煎至外層微微焦香，內裡保持嫩滑多汁，帶有濃厚醃料香味，配麵包或麵都一樣好味。
鰂魚涌/北角篇
米芝蓮上海小店 麥記美食
圖：CelineCC
餐廳環境雖然簡樸，但出品一向平靚正，深得區內上班族同居民喜愛。主打多款經典上海小吃，必試嘅招牌小吃首推生煎包，煎得金黃香脆，皮薄餡靚，內裡肉汁豐富，咬落爆汁；其次係小籠包，湯餡滿滿，皮薄彈牙，無論配醋薑定係單食都令人一試難忘。如果鍾意食麵嘅朋友，招牌擔擔麵一定唔可以錯過。手工拉麵口感彈牙，配搭以花生醬、辣椒油調製而成嘅濃郁湯底，鹹香帶微辣，層次分明。
馳名瑞士雞髀 祥發茶餐小廚
圖：simi0308
北角區老字號嘅港式茶餐廳，以親民價錢同家常味道見稱。招牌瑞士雞髀係必試之選！雞髀嫩滑多汁，配搭甜香濃郁嘅瑞士汁，鹹甜比例恰到好處，香氣撲鼻；沙嗲牛肉包嘅牛肉香滑惹味，配搭烘至香脆嘅包，簡單又有驚喜。至於主食方面，特濃芝士汁吉列魚柳天使麵係餐廳另一招牌菜，芝士汁真係好香濃！最特別嘅係餐廳不可不試嘅瑞士餐系列，顧客可以任意配搭招牌瑞士雞髀/雞翼、小食同麵類，自由度超高，啱晒三心兩意嘅朋友仔～
鮮味花甲粉 辣先鋒花甲粉
圖：只專注賣花甲湯粉絲，每碗都包含花甲、金菇、芽菜、生菜同粉絲，配料豐富，食材新鮮，湯底選擇多元化。提供6款湯底選擇，包括辣味濃郁嘅麻辣湯底、層次豐富嘅香辣湯底、清爽開胃嘅酸菜湯底、香氣撲鼻嘅蒜香湯底、鮮甜溫潤嘅三鮮湯底以及酸甜可口嘅番茄湯底，食客可以根據自己喜好自由選擇。如果想增加口感層次，可以考慮追加推介配料，包括鮮甜彈牙嘅鮮蝦、肥牛、魚肉春卷以及外酥內嫩嘅炸魚片，絕對令味道更加豐富。
分量十足海南雞 肥仔海南雞專門店
圖：專做外賣海南雞飯，以高性價比同穩定質素聞名，無論飯、雞肉定係湯品都有驚喜。招牌無骨海南雞飯，油飯係呢度嘅亮點，粒粒分明，唔會太油膩，而且有淡淡嘅椰香味，令人一試難忘。雞肉嘅分量十足，配埋幾件青瓜，食落幾清爽。雞胸肉口感略為結實，但如果想試嫩滑多汁嘅選擇，可以加$6轉雞髀。醬汁方面提供海南雞經典嘅黑豉油同泰式酸辣汁，酸辣開胃；再附送一碗清甜元貝冬瓜清雞湯𠻹。
健康日式雙餸飯 日食 
圖：對於打工仔女嚟講，平價兩餸飯係糧尾恩物，但要搵到健康又唔乏味嘅選擇就唔容易。呢間餐廳就用實力打破「頹飯」印象，以健康為理念，每日供應新鮮製作無味精嘅便當。每日提供8款菜式，其中包括港式家常小炒同日式料理，如豚肉生薑燒、日式照燒雞扒同蒲燒鰻魚等，仲會特別設計兩款素食菜式，好貼心！每日仲供應一款湯品以及多款自家製茶飲，暖胃又健康。
中上環篇
皮薄餡多餃子店 餃掂手工餃子雲吞專門店
圖：位於中環嘅小店，主打各式手工餃子同雲吞，提供煎餃同湯餃兩種選擇，滿足唔同口味嘅客人。餐廳嘅招牌湯底「狀元九鼎湯」以粉葛、順德活鯪魚、春山活鰂魚、新會陳皮以及鮮排骨等製成，味道清甜，配搭餃子或雲吞都咁滋味。而韭菜豬肉餃同雲耳椰菜豬肉餃，都係抵食及人氣之選，前者香氣撲鼻，餡料鮮美；後者口感豐富，清新爽口。
道地港式粥麵店 忠記粥品
圖：阿啦
以傳統港式粥品聞名，每日新鮮製作，深受街坊喜愛。餐廳提供多款粥品選擇，如皮蛋瘦肉粥、艇仔粥等，粥底綿滑，配料豐富。此外，佢哋腸粉、炸両等小食亦備受推崇，油炸鬼每日新鮮製作，外脆內軟，配上腸粉簡直絕配。餐廳環境簡樸，價格實惠，係附近上班族同居民嘅午餐好去處。
誠意麵食小店 阿爸鮮食
圖：主打台式風味嘅麵食外賣店，以高質素食材同細心烹調見稱。台灣熟成牛肉麵以多種中藥材熬製，味道濃郁，牛肉經過14小時慢煮，肉質軟腍，配上彈牙嘅手工麵條，再加埋白蘿蔔、紅蘿蔔、青菜等配料，超豐富！想食清啲就試吓養生雞絲湯麵，選用新鮮雞肉，湯底清甜，麵條爽滑。秘製雞絲拌麵同而家常見嘅四川口味拌麵唔同，以黑醬油拌勻，清爽鹹香，雞肉分量充足，配有木耳、白蘿蔔、紅蘿蔔等，連埋辣菜脯一齊食，味道層次豐富。
人氣高質車仔麵 麵尊
圖：為食思
知名嘅車仔麵專門店，車仔麵選擇多樣化，配料豐富，當中酸齋、咖喱魷魚、豬頸肉同滷水鴨腎都深受食客喜愛。酸齋酸辣開胃，吸滿湯汁就更好味；咖喱魷魚香辣惹味；豬頸肉嫩滑彈牙；滷水鴨腎經過精心滷製，口感爽脆，配搭各式麵條簡直一流。店內嘅麻辣醬更係一大特色，香氣撲鼻，為車仔麵增添獨特風味。
親民價燒肉店 滿滿食堂
圖：PP ANNIE
喺中環令人意想不到嘅性價比之選！位於呢個高消費地段提供質量唔錯嘅燒肉選擇，呢度嘅石燒套餐同鐵板餐性價比高，雖然比上文幾間餐廳貴，但200g嘅牛肩扒只需$88就食到，再高質啲嘅牛肉都係$100左右就食到，肉味十足！而其他飯餐同麵類都超抵食，如照燒雞肉雜錦丼、豬軟骨拉麵都係五十幾包飲品，平民化又有誠意。
文：Yanica
編：Cathy
最後更新日期：2025年2月19日
