為食妹日記's Profile

今日同班friend走咗去屯門神燈會館食晚飯。之前食開佐敦嗰間，而家屯門都有啦黑松露琵琶鴨（半隻）一上枱已經聞到好香黑松露味，唔係得陣油膩味。皮燒得啱啱好，唔算好脆但夠薄，鴨肉唔肥好嫩滑煎釀原條鯪魚呢道係功夫菜，出面愈來愈少見。魚皮煎得金黃，入面釀嘅魚肉同配料，好彈牙。食落無腥味，師傅手勢唔錯。爆汁現烤雞真係無改錯名！雞皮燒到薄脆，肉質好juicy，一切開真係有汁流出來。味道醃得夠入味，唔會淨係得層皮有味。金銀蒜粉絲蒸扇貝扇貝幾新鮮，金銀蒜落得足，蒜香夠但唔會太辣。粉絲吸晒扇貝同蒜蓉嘅汁，好入味。總括嚟講，神燈會館真係幾有水準，菜式有傳統亦有少少新意，環境乾淨舒服。如果住屯門或者經過，絕對值得試吓。…Read More

馬辣真係一間我幾鍾意既台式火鍋店！食品種類夠多而且質素都幾高！一入到去就見到一架台式火車，係食品自助區，丸類、蔬菜、粉麵類都可以係自助區度拎！自助區仲有炸物、甜品、飲品任飲任食！而肉類就另外落單！今次同班朋友就叫左B餐，對比A餐多左極尚無骨牛小排，手切肥牛，一口牛，d牛既質素好高，岩哂食牛魔王湯底我地揀咗鴛鴦鍋，另外升級咗花雕醉雞！個雞件好滑，陣陣酒香！最令我驚訝係竟然有1664生啤任飲，回本冇難度！甜品都好有誠意，有pancake, 焦糖布甸，棉花糖都有，原價200幾，仲有好多唔同優惠，真係好抵呀…Read More

元朗呢間「花甲先生」過哂食飯時間都排緊隊，今次的起心肝試咗佢個「清湯海鮮盛會花甲先生粉」。一上枱，嘩！個陣容真係夠晒盛會：花甲、元貝、台山蠔、魷魚、蝦，再加時令海鮮，睇見都開心。湯底我揀左清湯，飲落有淡淡海鮮甜味，幾順喉。花甲算幾乾淨，冇乜沙，隻隻都開晒口，肉質嫩滑。台山蠔幾肥美，咬落去爆汁，冇腥味；元貝同蝦都夠鮮，唔會霉。個粉索咗湯汁幾入味朋友嗌咗個麻辣花甲先生粉，話可以自選配料，佢就加咗蝦同芝士腸。試咗啖湯，麻香夠喉，唔會死辣另外叫咗雞皮餃子同南乳雞翼。雞皮餃子個皮真係脆口，入面餡料幾香。南乳雞翼就醃得幾入味，外皮香脆，肉質都算juicy。總括來講，真心高質，唔使返大陸食…Read More

其實我好鍾意食放題，因為食物種類夠多，每樣都可以試少少！ 屯門真係冇乜日式放題店！ 屯門市廣場而家開左御滿屋，性價比都幾高，我地一行4試左基本A餐，都已經好多野食！刺身係放題必有既，款式勁多，連象拔蚌同赤貝都有，正！熟食我鍾意炒蟹、燒扇貝、蒸鮑魚，岩哂海鮮控！燒乳鴿都唔錯，皮脆肉嫩仲好juicy！自助區仲有大量食品，小龍蝦、點心、炸物、凍海鮮等等！甜品區搵到驚喜，係鮮芒果肉棒，第一次放題見到呀！ 當然仲有好多雪糕雪條酒精飲品同生啤都係任飲！仲有烤榴槤，真係好滿足呀…Read More

呢排成日喺元朗搵食，俾我撞正一間外賣小店叫「尋味」，門面唔算好起眼，但經常都有人排隊，試咗幾款招牌鹹魚雞粒炒飯鑊氣夠！一打開盒聞到陣鹹魚香，唔會攻鼻，係啱啱好吊住味嗰種。雞粒唔鞋口，啲飯炒到乾身，粒粒分明，唔會油淋淋，食到底都唔見油。最怕啲炒飯鹹到飲水，佢呢度鹹淡適中，抵讚。招牌炒米粉米粉唔會一餅嘢，又唔會太乾。好有鑊氣，冇多餘油份，感覺幾輕身，做午餐啱晒。蒜香燜鵝鵝肉燜到好淋，唔韌，蒜味好出但唔會蓋過鵝肉本身嘅香味，個汁撈飯一流香茅豬扒蔥油飯豬扒煎得香口，香茅味醃得入味。個蔥油係精髓，唔會太鹹，撈勻啲飯真係可以秒清。例湯飲得出真係冇落味精，正呀！…Read More

見到豆乳狂人出新嘢，係泰國風味，仲有泰奶豆乳，而個人都幾鍾意泰奶，當然要試下叫左個「麻糬泰奶豆乳茶」，泰式奶茶個種茶膽澀香同豆乳嘅順滑竟然好夾，茶味唔會搶咗豆乳個陣豆香，麻糬似融化緊嘅糯米糍，上面仲有焦糖脆餅碎，增添豐富口感另外試左多芒楊枝甘露同牛油果吉列蝦青瓜絲粢飯。楊枝甘露個芒果粒好多，西柚肉好juicy，至於個粢飯真係好正，牛油果蓉夾住脆炸吉列蝦同青瓜絲，個口感似食緊壽司卷但係粢飯版，早餐食完頂到 lunch 都得！…Read More

今次同班friend黎韓泰太真係有驚喜！餐廳有齊室內冷氣位同室外露天位，怕熱怕煙嘅可以坐入面，想chill啲吹住晚風燒嘢食就揀外面，夠晒彈性！重點嚟啦——$300樓下任飲任食，竟然包啤酒任飲！仲要有大牌雪糕任挖，已經回本一半！不過全場MVP絕對係佢個招牌窰雞！一上枱香到隔離枱望過嚟，隻雞醃到入味，皮脆肉嫩，一撕開啲肉汁咇出嚟，雞胸都唔嚡口，真心堅！燒烤料種類都好多，有辣有唔辣，大人細路都岩食，不過我最鍾意燒豬頸肉，燶燶地超香，如果有埋麵包提供就更正額外加錢叫左燒蠔，隻蠔大大隻，超肥美，蒜蓉燒勁惹味整體黎講呢個價錢包啤酒+靚雪糕+爆汁窰雞，一家大細或者一班朋友嚟gathering啱晒…Read More

今日去屯門時代廣場呢間「芋見好圓」試吓，貪佢主打芋圓同台式嘢食。叫左香煎騸牯牛林肉牛丸湯米同香煎騸牯牛林肉煎蛋飯，牛肉煎得幾香，唔韌，牛丸彈牙湯底清，唔會太鹹，個飯同樣係嗰款牛肉，隻蛋係太陽蛋，篤穿蛋汁撈飯幾好飲品同甜品：冬瓜仙草凍 幾清爽，冬瓜味清甜，仙草滑溜，解渴一流。梨山綠茶茶味OK，凍飲幾舒服。仙草3號（芋圓、芋頭、紅豆 + 黑糖鮮奶底）係黑糖鮮奶底幾香，唔會太甜。芋圓咬落煙韌，有咬口；芋頭煮得淋，有芋香；紅豆都煲得夠腍。整體配搭唔錯最後個 黑糖自選四種料刨冰，揀咗布丁、紅豆、蜜花豆同大芋圓。黑糖味夠香，刨冰夠碎。布丁滑身，紅豆同蜜花豆都甜度適中；大芋圓依然係水準之作。份量幾大，兩個人 share 就差唔多。…Read More

今日同閏蜜去咗圓方Luigi's食晚飯，貪佢坐得舒服，唔會太嘈。叫咗幾樣嘢Buffalo Wings一上枱，個樣幾靚，咬落去皮脆肉嫩，辣度適中，唔會話辣到噴火，個酸辣醬幾開胃，送啤酒一流。而佢地既生啤Lamma Island IPA係我杯茶，甘香唔太苦，夠晒解膩。個12" Cheese Burger Pizza幾有驚喜，餅底薄脆，上面有漢堡扒、芝士同酸瓜，食落似食緊個攤平咗嘅漢堡包，幾過癮。兩個人happy share岩哂Tiramisu咖啡味夠，酒香都出到，唔會太甜，質地夠軟滑。總體來講味道同環境都唔錯，係傾計食飯唔錯嘅選擇。…Read More

今日同朋友試咗個燉湯二人餐，整體來講幾抵食，味道都唔錯。個蟲草花花膠魚肚燉雞真係幾好，花膠同魚肚都算多，煮得夠淋，蟲草花帶少少咬口。飲完成個身暖笠笠，呢個湯真心推介。個鹹蛋馬蹄蒸肉餅食落唔會好膩。馬蹄粒加得啱啱好，增加咗啲爽口感覺。鹹蛋黃送飯一流豉汁蒸黃立䱽都算新鮮，魚肉蒸得啱啱好，唔會過老。豉汁味道夠但唔會太鹹套餐包咗飲品，可以加錢升級特飲，個芒果汁都幾清甜總括來講，有湯有魚有肉有飲品，住家風味，食得舒服…Read More

同班牛魔王朋友搵食，去咗旺角呢間主打潮汕牛肉嘅放題。今次試佢個B餐，重點係手切牛任點，手切五花趾、吊龍、匙柄、雪花、牛胸油任食，對於食肉獸來講，真係啱晒！套餐仲會送海鮮拼盤，有鮑魚、桶蠔、海蝦同沙白，全部好新鮮！坐低後店員就送上個「牛肉拼盤」，有晒咁多款手切牛肉，打卡一流牛肉方面真心唔錯，各個部位都有特色，牛胸油真係好正問，口感爽脆，好香嘅牛油味！佢哋係見手切牛肉，唔係機切，所以厚度適中，唔會一淥就散出面有個自助區，有好多火鍋料、丸類、蔬菜、小食同飲品雪糕，呢個價錢包埋紅酒、白酒、同指定啤酒任飲，岩哂一班人吹下水、打邊爐，真係爽好多！…Read More

今晚同班friend去咗荃灣極大瀛喜試佢個放題B餐。B餐比A餐多左限定食品金䱽魚腩刺身、凍紅花蟹、上湯芝士龍蝦伊麵、A5黑毛和牛薄燒🦀凍紅花蟹蟹肉唔會霉，帶少少海水鹹鮮，拆開蘸少少醋已經夠清鮮。鍾意拆蟹嘅可以encore。🧀上湯芝士龍蝦伊麵龍蝦肉算彈牙，唔係雪藏到死實實嗰種。上湯芝士汁幾得意，唔會好似一般酒樓咁膩，掛滿伊麵嗦嗦聲幾過癮。記得要趁熱食另外推介大家要試吓泰式麻辣皇帝虎蝦 - 辣度夠仲帶香茅香，食咗四隻都唔夠喉。蒜蓉粉絲蒸蟵子王 同燒蠔- 蒜蓉炸得金黃香口，粉絲吸盡鮮味，呢個真心要encore。另外放題必定會有嘅厚切刺身，另外自助區都有好多嘢食包括凍海鮮、涼拌小食、老火湯、中式熱盤同炸物等等當然唔少得飲品任飲，當中仲包括日本嘅果汁酒，仲有生啤，喺生啤機隔離仲發現咗nuttella 醬機，加落去軟雪糕度食超正最後就係要食甜品同埋雪糕，整體環境算坐得舒服，收碟快，唔會漏單，係回頭之選…Read More

荃灣如心廣場間上海婆婆，同班friend試咗幾款招牌菜，整體來講有驚喜！首先個小黃瓜拌海蜇，海蜇爽脆，小黃瓜清新爽甜，係一個完美嘅開始。跟住碗淮揚酸辣湯，料多到呢～木耳、肉絲、豆腐絲樣樣齊。酸味同辣味平衡得啱啱好主菜方面，糖醋魚塊炸得外脆內軟，個糖醋汁唔會死甜，仲有少少酸味吊一吊，好醒胃。至於個川辣水煮嫩牛肉，真心正！牛肉片嫩滑，浸喺紅噹噹嘅辣油裡面，夾埋大豆芽一齊食，麻香味十足，食到唔停口。當然唔少得上海小籠包，皮薄餡靚，一啖咬落去，啲湯汁爆出嚟，鮮味十足！最後叫咗個炸銀絲卷，外皮炸到金黃香脆，入面嘅銀絲軟熟，點埋煉奶食，邪惡但係超滿足。…Read More

佢哋啲甜品真係不得了，我同朋友試咗三款，食到舔舔脷！首先講下個榴槤奶蓋豆花，一上枱已經聞到陣陣榴槤香，個奶蓋濃到呢～仲有啲榴槤肉絲絲喺面，撈埋下面滑捋捋嘅豆花，一啖入口，榴槤控肯定尖叫！豆花嘅清淡啱啱好平衡返榴槤嘅濃郁跟住係多芒楊枝甘露，啲芒果又甜又香，仲有爆汁嘅柚子肉同爽口嘅西米，每一啖都係料，口感豐富到不得了。最後個多芒西米，滿滿芒果肉。西米煮得啱啱好，煙煙韌韌。雖然冇楊枝甘露咁多花款，但係芒果嘅香甜完全突出，清涼解渴，夏日必點！…Read More

屯門虹橋嘅「嘆甜品」🍮，甜品唔止高質，賣相都幾靚，而且仲有多款鹹點小食，一次過滿足哂甜鹹兩個胃！推薦：🥥 椰皇榴槤飄香：原個椰皇上枱，D24榴槤肉超濃郁，同清甜椰皇撞出驚喜，榴槤控一定唔可以錯過！🧇 榛子朱古力石板街窩夫：窩夫即叫即整，外脆內軟，加埋石板街配料同冰凍芒果雪糕🍦，一冷一熱口感超正！🥭 芒果芋圓小丸子：芒果鮮甜，芋圓同小丸子煙煙韌韌，口感豐富又唔會太膩～🍉 西瓜汁：新鮮榨出嚟，清甜解渴，熱天飲一流！想食鹹嘢呢度嘅炸物一樣掂！🍗 炸雞軟骨：脆卜卜，食到停唔到口～🍟 炸粗薯條：薯味超出，點茄汁食簡直無得輸！🍢 炸魚蛋燒賣：經典街頭風味，細細粒易入口～食到舔舔脷，心滿意足走人！👍…Read More