Master Taste 8的個人專頁

考試季終於完結，即刻同另一位媽媽朋友，帶埋兩個細路去荃灣廣場嘅「HomeLand」輕鬆吓。餐廳環境光猛開揚，枱與枱之間有足夠空間，細路有少少走動都唔使擔心撞親。「黑松露牛肝菌蘑菇湯」味道濃郁，飲落好暖胃。主菜「原隻波士頓龍蝦明太子海蝦薄餅」絕對係高分之選，龍蝦肉彈牙，薄餅底香脆，夾埋明太子醬好惹味。「蘭王蛋松露煙腩卡邦尼QQ捲捲意粉」亦煮得恰到好處，蛋汁香濃，每條意粉都掛滿醬汁。小食「酥脆雞翼拼盤」三款口味之中，鹹蛋黃味最得我心，食落超級香口！小朋友就鍾意甜甜地明太子醬。揀Homeland其中一個原因係餐廳嘅畫碟服務。只要點任何甜品再加$35，師傅就可以即場為你畫碟。我哋兩個細路要求畫一間「學校」，師傅真係畫咗間色彩繽紛、好靚嘅學校出嚟，兩個小朋友開心到不停拍手掌。最窩心嘅係，畫完之後職員主動幫我哋同個甜品影即影即有相，送俾我哋留念，真係心思十足！另外餐廳仲有提供身份證號碼優惠同午市四人同行一人免費嘅推廣，詳情可以向服務員查詢。總括嚟講，HomeLand 唔單止食物有質素，環境舒適，最加分係畫碟服務連即影即有留念，加$35令成餐飯加一個開心嘅回憶幾抵。…查看更多

今日同屋企人嚟到大埔舊墟嘅「OX Steak Lounge」！街坊口碑向來唔錯～我哋叫咗兩個set dinner，收費喺大埔區算中上價位，但食完會話值回票價！✨頭盤系蜂蜜芥末燻三文魚沙律，三文魚油脂香平衡得啱啱好，蜂蜜芥末汁醒胃得嚟唔會搶戲。凱撒沙律（雞肉）- 麵包粒脆卜卜，羅馬生菜新鮮爽脆，芝士同醬汁份量剛好。牛肝菌野菌忌廉湯 ，菌香超濃郁！飲到細碎菌粒，真材實料。配自家製牛骨髓牛油包！麵包烘得外脆內軟，塗上牛骨髓牛油後瞬間融化，邪惡度爆燈，但真係忍唔住食晒成個😍🍖主菜香煎鐵板封門柳（五成熟），肉質軟淋得嚟有嚼勁，牛味濃郁，配埋紅酒汁真係絕配。西班牙伊比利亞黑毛豬鞍果然名不虛傳！外層煎得焦香，內裡爽嫩多汁，配清甜蘋果莎莎解膩。🍨甜品完美收官，心太軟流心澎湃，朱古力味濃而不膩。開心果麻糬杯堅果香突出，麻糬Q彈口感加分。服務員態度友善，上菜節奏掌握得幾好。環境偏暗調有情調，適合家庭聚餐或情侶紀念日。以食物質素同份量嚟講，會想再encore！…查看更多

阿Sir請食飯，揀咗尖沙咀加連威老道「牛站（駅）」嘅火鍋放題。地點方便，樓上舖算係闊落，坐得幾舒服。一坐低，阿sir直接order 3号餐，睇嚟佢都成日喺度開餐，熟晒架步。特上牛小排脂肪同肉比例均勻，輕輕一淥就食得，肉質軟嫩，牛味香濃。澳洲M5和牛嘅油脂感更重，入口柔軟，確實有即溶嘅感覺，食多幾塊都幾有滿足感。而極黑和牛片同安格斯牛板腱都唔錯，前者肉味實在啲，後者就爽口一啲，可以換吓口味。和牛五花趾比較有咬口，但唔會韌。海鮮拼盤上枱時有啲驚喜。花膠厚身，煮完之後口感軟滑。鮮蠔同鮑魚都幾新鮮，冇雪藏味。大頭蝦同海蝦都算大隻，肉質結實。以放題嚟講，海鮮質素交到功課。自助區選擇多，熱食炸品、涼菜、甜品、Häagen-Dazs雪糕等，應有盡有。欣賞佢蔬菜新鮮，洗得乾淨。我encore咗好多次佢嘅豆苗。整體嚟講，食物質素對得住價錢，上菜速度合理，冇漏單。環境同服務都好好。如果一班人想搵個地方盡興咁打個邊爐，牛站（駅）係一個穩陣嘅選擇。…查看更多

今日過咗去馬鞍山搵朋友聚聚，發現原來Zen開到嚟Mostown！雖然係新分店，但人氣依然旺到爆，我哋下晝三點到都要等十幾分鐘先入座。我哋叫咗個「下午茶大盛定食蕃茄烏冬」做基底，$48就有碗自家製蕃茄烏冬，湯底鮮茄打蓉，濃郁得嚟好鮮甜，烏冬咬落好彈牙。再加咗幾款配料：蒲燒鰻魚半條燒得啱啱好，甜甜哋嘅鰻魚汁超惹味；南蠻炸雞外脆內嫩，仲有啲酸酸哢哢嘅醬汁點綴；吉列大蝦炸粉薄脆，蝦肉爽口；再加份野菜平衡下，成個定食豐富到呢！特別要提佢加少少錢有杯勁高質特飲，我試咗牛油果士多啤梨乳酪奶昔，口感順滑，果味天然。朋友嗰杯芒果紅桑子乳酪奶昔，果味更加濃郁，真係抵讚！蟹鉗奶油忌廉扁蔥粉真係有驚喜！奶油忌廉汁超濃郁，每條扁蔥粉都掛滿汁，食落Creamy得嚟又唔會膩，仲有淡淡蔥香平衡返，口感滑溜溜，有少少邪惡，但係成碟食晒。開心果梳乎厘絕對係必點！即叫即製，上枱仲係熱辣辣，梳乎厘空氣感十足，入口即化，開心果味香濃自然，面頭灑咗啲開心果碎增加口感，甜度控制得啱啱好，食完滿足感爆棚！埋單兩個人連加一都係合理價，呢個質素同份量，真係抵到爛！以後馬鞍山又多個高質下午茶選擇啦～…查看更多

死黨外國飛返嚟，話要食返碗正宗雲吞麵。我哋摸上麥名記，呢間攞過米芝蓮嘅麵鋪，未入去已經聞到大地魚湯嘅香味，真係「未食先醉」！🍜 碗雲吞麵一上枱，湯底清得嚟帶金黃色，飲一啖——嘩！係傳統大地魚＋蝦殼熬出嚟嘅鮮甜，唔係味精水！麵條揀咗「幼升」（幼身堿水麵？），咬落爽口彈牙，仲有陣陣蛋香。雲吞係細細粒「金魚尾」包法，皮薄到透光，入面隻蝦爽脆仲有少少肥豬肉吊味，一啖一粒唔會「水汪汪」。🥟 碗淨水餃漲卜卜似元寶，皮薄到透出入面粉紅色蝦肉同淺色木耳絲。咬開一啖，湯汁「吱」出嚟，入面除咗鮮蝦仲有少少筍絲同豬肉碎，口感層次豐富！老友話：「外國啲水餃同呢碟比，簡直係BB班對大學教授！」碟牛筋腩可謂一絕！牛筋燜到入口即化，但唔會爛溶溶；牛腩專揀「坑腩」部位，肥瘦分明，啲筋膜位索盡柱侯醬同花椒八角嘅精華。最正係底下墊咗兩條生菜，吸晒啲腩汁... 食到連汁都撈埋！老友話：「外國啲雲吞麵同呢碗比，真係輸成條彌敦道！」呢啲先係香港人嘅集體回憶——唔使豪裝，靠一碗實實在在嘅雲吞麵同燜到入魂嘅牛筋腩，「米芝蓮」招牌系實至名歸！…查看更多

正好明天係公眾假期，可以好好犒賞自己一下。帝京向來以高質食物聞名，果然冇失望。BOOK唔到繁忙時間，估唔到8:30都好FULL，一入到餐廳，即刻QR CODE點返個刺身拼盤先，赤海蝦、甜蝦、赤貝、北海道鮮帶子、油甘魚、三文魚、泰式虎蝦、蜜柑鯛薄切，樣樣都好新鮮，特別係鱘魚籽醬同北海道鮮帶子，鱘魚籽鹹香，帶子又滑又嫩，食落口感真係一流。最啱我心水嘅係波士頓龍蝦，啖啖龍蝦肉，搭配特製醬汁，真係好享受。蒜蓉粉絲蒸蟶子王，蟶子新鮮得嚟又多汁，蒜香味配上粉絲，簡直係完美搭檔！仲有避風塘炒蟹，用嘅係新鮮蟹，香辣味十足，非常惹味。壽司方面，海膽拖羅鱈魚干手卷，海膽滑溜配上鱈魚干，口感好豐富！還有牛油果蟹肉最中餅，牛油果同蟹肉嘅搭配，味道好得意，細細件食多幾件都無負擔。仲有一品料理嘅美味，燒香草羊鞍同醬燒牛肉都好正！羊肉香氣四溢，牛肉又嫩又滑，明太子玉子燒嘅口感柔滑，真係好好味。總括來講，帝京呢個海鮮任食每一道菜都真係用心之作。下次有機會，我一定會再來探索多啲美味！…查看更多

今日聽完講座，同學提議去旺角創興廣場的安平燒肉食烤肉，正好可以討論下講座內容。Level 4嘅套餐主推日本A4和牛烤肉、醬燒一口和牛丁、M8和牛肩胛同壽喜燒，和牛肉質柔嫩，兩種食法同樣出色。不得不提嘅係招牌「極．厚切檸檬牛舌」，一整條牛舌放喺砧板上枱，仲有沙漏計時，圖文並茂教埋你點樣燒，烤到恰到好處，擠上新鮮檸檬汁，果香中和咗油脂，入口爽脆彈牙，真係好味到我哋一人一條。120分鐘內可以任食日本A4+和牛外，仲有頂級海鮮，霸王蝦、鮑魚、扇貝、白鱔任點任食，CP值超高！醬汁方面選擇多樣，有招牌黃金醬、蒜味鹽醬、沙茶醬等，讓人品嚐到台燒獨特的風味。自助區新鮮瓜菜、菇類多樣，仲有QR code多款台式小食、飲品、芋圓甜品，任君選擇。首次體驗食燒肉前飲啖湯，安平嘅慢熬清雞湯湯頭鮮美，為整頓飯揭開完美序幕。環境舒適，食材新鮮、高質，真係一個放鬆同享受美食嘅好地方。秋高氣爽，好適合聚會既季節，安平燒肉以優質既食材，配合豐盛既味道，如果你諗緊去邊度享受美食，安平值得一試。…查看更多

呢間牛大人餐廳地點超方便，喺銅鑼灣地鐵站c出口行兩步就到。裝修有台灣夜市風情，坐得幾舒服。我哋揀咗「鴛鴦鍋」，一邊係聰明魷魚沙茶鍋，會跟一碟木魚同蔥段比你加落去。另一邊係養生菇菌燉雞鍋，滿滿嘅菇菌超濃郁。呢個放題套餐最正當然係可以無限食呢款A4和牛！油脂花紋真係好靚，好似大理石咁。淥幾秒就食得，牛味香濃，油脂甘香，我哋每人都點咗起碼三四轉，食到停唔到口！絕對對得住個價錢。除咗A4和牛，仲跟一盤海鮮拼盤，有鮮魷魚、鮑魚、帶子、生蠔，啲生蠔成隻手掌咁大隻，超creamy!另外澳洲M9和牛牛丸都係超正，牛味濃超juicy!除咗和牛，食得最多就係鮑魚，因為佢有好幾款做法，有美乃滋鮑魚酥，柚子燒汁鮑魚，而我最鍾意係佢嘅古法醉飽魚，酒味超香濃！期間限定套餐贈送每人一隻江蘇太湖大閘蟹，平時好少專登買嚟食，今次咁啱可以試吓。飲品有多款特飲可以揀，無酒精試左芒果檸蜜西米爽，啖啖果肉超足料。另外試咗兩隻有伏特加嘅柑橘梳打和芒果梳打，都相當唔錯。自助區有多款蔬菜、丸類、麵類、飲品同雪糕。蔬菜乾淨新鮮，丸類都有好多選擇。飲品櫃有好多台灣特色飲品，好似黑松沙士、蘋果西打，仲有自家製茶。雪糕有Häagen-Dazs、Mövenpick，完美作結。…查看更多

星期六加完班，去咗公司附近間Latter Cafe嘆返個靚下午茶充電！舖頭位置幾就腳，灣仔謝斐道金聲大廈地下，裝修走簡約文青風，坐得舒服，啱晒同朋友傾偈chill下～芝士火腿哈密瓜沙律配搭好清新！份量十足，材料豐富，適合 share 食，味道清新有層次。鹹蛋黃蟹肉扁意粉係必點之選！鹹蛋黃醬超濃郁，掛滿每條扁意粉，蟹肉份量都唔少，鮮味同鹹香夾得啱啱好！Latter芭菲賣相靚到唔捨得食！層次好豐富，士多啤梨、麻糬、企鵝造型棉花糖、tiramisu一層層疊上去，甜度控制得剛好，食完唔會膩～蘋果冷萃咖啡味道清新，肉桂、果汁、咖啡嘅比例平衡得幾好，好特別，好治愈！總括嚟講，食物有水準，環境舒服，服務態度都好 nice，係灣仔區一個隱世放鬆好地方！…查看更多

今日走咗上去旺角中心覓食，呢間由正宗泰國人掌廚嘅 Thai Shack，見佢餐牌選擇多，揀咗幾款心水菜式返屋企開餐！🍢 炸泰式春卷一打開盒就聞到香脆味！春卷皮炸到金黃通透，咬落「索索聲」，點埋佢附送嘅咖哩醬，當前菜一流！🍜 冬陰功撈麵配蝦餅必試推薦！冬陰功醬汁濃到掛滿每條麵，偏辣但惹味，有淡淡香茅味。蝦餅雖然外賣返到屋企冇咁脆，但依然彈牙，咬開見到蝦肉，誠意十足！🔥 乾炒豬肉河粉配泰式鳳爪沙律河粉炒得夠鑊氣，豬肉片嫩滑唔韌，但略嫌油咗少少。反而個鳳爪沙律有驚喜！去骨鳳爪爽脆入味，酸辣汁醃得夠透，食完即刻想追啤酒～🥗 粉絲肉碎沙律粉絲索盡青檸魚露汁，加埋肉碎、芹菜絲、洋蔥、甘筍絲，口感豐富又清爽，怕膩嘅朋友一定會鍾意。🍚 甲拋肉碎飯全場MVP！肉碎炒得乾身惹味，辣度溫和但後勁凌厲。重點係嗰隻流心蛋㗎！篤穿蛋黃撈飯，真係忍唔住清晒成盒～$200左右買到成枱餸，性價比高！特別讚佢嘅醬汁同香料落得足，完全還原到泰國街頭風味。如果硬要挑骨頭，就係部分炸物外賣難免軟咗少少，建議即買即食最好～…查看更多

早兩日去咗銅鑼灣「人生有限杯」，睇個名幾得意，原來係食串燒嘅！鹽燒西班牙五花腩，肥瘦適中，燒到脆脆哋，啲油香出晒嚟，正！泰式燒墨魚鬚，爽口彈牙，泰式醬汁酸酸辣辣，好開胃。翠玉瓜就正常發揮，清甜多汁，解膩一流。味噌松阪豬幾驚喜，肉質嫩滑，味噌味唔會太鹹，仲帶少少甜味。鹽燒雞腿肉同雞皮都係必點，雞腿肉juicy，雞皮燒到脆卜卜，邪惡但好滿足！免治雞肉條配日本蛋，點埋蛋漿食，滑溜得嚟又香口。鹽燒牛舌芯同豚肉蘆筍卷都唔錯，牛舌夠爽，豚肉卷住蘆筍，口感豐富。蒜蓉菜脯燒茄子就比較重口味，蒜香同菜脯嘅鹹香好夾，送酒一流。鹽燒和牛牛小排肉質軟淋，牛味濃，值得試。墨魚滑+紫菜+大蝦同椒鹽九肚魚都幾有特色，墨魚滑彈牙，九肚魚外脆內軟，調味恰到好處。最後叫咗個港式燒蜜糖多士夾雪糕，多士燒到金黃，蜜糖香甜，夾埋雪糕，雪糕勁厚切，幾特別。菠蘿可爾必思同桔仔薄荷鴨尿茶就係清新之選，菠蘿解膩，杯茶酸甜清爽，收尾剛剛好。整體嚟講，食物水準唔錯，款式多。如果鍾意食串燒，可以嚟試下，不過記得訂位，我嗰日平日夜晚爆滿座㗎！…查看更多

今日同朋友去咗沙田「自己人」食晚飯，位置喺新城市廣場三期，搵起嚟都方便。店內環境乾淨舒服，坐得幾自在。服務員態度友善，上菜速度都幾快，唔使點等。蟹粉拌麵蟹粉份量足，撈勻之後每啖麵都掛滿蟹黃，香味濃郁，值得一試。呢道女兒紅醉蝦嘅酒香真係夠突出，我自己就幾鍾意佢浸得入味嘅濃郁酒味。蝦肉依然保持到爽甜，不過如果係怕酒味太重嘅朋友，建議可以唔好點咁多汁～椒鹽大鮑魚外層炸得香脆，裡面保持到鮑魚嘅鮮嫩，椒鹽調味剛剛好。粉紅佳人 (龍蝦肉餃)：一籠三件，皮薄餡多，真係食到龍蝦肉，口感同味道都唔錯。潮汕海水炸乳鴿皮脆肉嫩，價錢合理，係一道穩陣嘅小食。梅汁金不換沙白：沙白肉質肥美，鹹酸菜酸甜開胃，幾有特色。潮汕落湯錢糯米皮煙韌，五仁粉香口，傳統風味做得幾好。今餐人均大概$300左右，食物質素好，環境同服務都令人滿意。如果想同朋友食餐舒服嘅晚飯，呢度係個唔錯嘅選擇。已經諗緊下次再嚟試其他菜式！…查看更多

作為香港人氣日式放題連鎖店，大喜屋一向都有唔少捧場客，今次我同沙田友去食沙田廣場嘅放題。閒日5:30入座平啲，但一到六點瞬間坐滿。刺身係必食之選！三文魚油脂分布均勻，口感肥美，而且切得夠厚身，完全唔似放題質素。除咗三文魚，甜蝦、北寄貝、帶子都好新鮮，尤其係甜蝦，大大隻又鮮甜，海膽手卷啖啖海膽，好滿足！火炙壽司系列係驚喜！火炙三文魚、左口魚邊、芝士鰻魚都好好味，微微燒過嘅香味加上沙律醬，邪惡但滿足！卷物同軍艦就正常水準，記得留肚食其他嘢。熟食類亦相當豪華，有鵝肝配蘋果/多士，紅燒鮑魚瑤柱飯，大蝦伊麵，蒜蓉燒生蠔，燒乳鴿，豉椒炒蜆，全部都好好味。特別推薦鹽焗大頭蝦，肉質爽嫩，鹹香惹味。唔好錯過嘅仲有蒜蓉蒸蟶子，新鮮嘅蟶子食落真係唔同。甜品選擇多，有Haagen-Dazs雪糕、mochi、蛋糕等。飲品櫃有各式汽水、茶類同果汁，任君選擇。以$300左右嘅晚市價錢，沙田大喜屋絕對係高性價比之選！如果想同朋友盡情食餐好，大喜屋絕對係不二之選。…查看更多

呢排天氣真係話凍就凍，今日仲要陰陰濕濕落雨，搵食腳一齊衝咗入太和「新鹿鳴記」潮州菜館取暖！點知俾我哋發現咗個驚喜之作——雞酒窩！$208咋，老實講自己買材料煮都唔止呢個價，重要係勁足料：當歸片、黨參、淮山、杞子、紅棗齊晒，半隻雞，支黃酒香到未煮已經流口水！煮滾之後飲啖湯，甜得嚟酒香仲係度遊緊花園。老闆好好人，親自過嚟教路點煮先keep到雞肉最嫩嘅狀態，難怪成品咁完美！嚟得潮州鋪頭，蠔餅梗係走唔甩！呢度嘅蠔餅真正外脆內軟，蠔仔鮮甜爆燈，一啲都唔會食到粉粒，同平時出面食到嘅「粉團蠔餅」完全兩回事！另外叫咗椒鹽海魚，老闆話佢哋每日嘅海魚都冇定款，總之邊款新鮮靚仔就入邊款，今次我哋食到嘅魚炸得香口得嚟肉質依然嫩滑，椒鹽鹹香啱啱好，送酒一流！總結：寒流殺到唔使驚，呢個雞酒窩絕對係驅寒神器，加多件脆皮蠔餅，飽住個肚暖住個心，正到呢～～…查看更多

今日去咗大埔昌運中心嘅「甜言蜜語」，買咗幾個外賣返屋企當下午茶，慢慢嘆。煎餃子揀咗雙拼，粟米同韭菜兩款口味。餃子係自家製，皮薄餡足，煎得香口，外皮脆身，裡面餡料飽滿。粟米餃清甜，韭菜餃味道濃香，兩款都好夠味，食得飽肚，當一餐正餐都夠飽。多芒楊枝甘露同芒果西米桃膠芋圓，兩款甜度都啱啱好。芒果用新鮮芒果蓉，香甜自然；芋圓同西米煮得煙韌Q彈，桃膠滑身，食落好舒服。另外仲叫咗花枝丸，炸得香脆，咬落有墨魚粒，鮮甜彈牙，未返到屋企已經忍唔住食晒。呢間舖頭嘅食物質素唔錯，老闆娘用心製作，餃子、芒果蓉都係自家製，超級足料，性價比高。大家如果喺附近，不妨試下。…查看更多