金和潮菜

Open Now

Now Closed

一直都好鍾意食潮州菜，因為可以一大班朋友一路飲酒一路食，但係好多潮州菜多數都比較污糟，如果有時約女仔朋友就會好尷尬，朋友介紹，呢間潮州菜嘅裝修同埋環境都好乾淨，咁就一於嚟試吓啦。首先我哋叫咗個滷水鵝片，估唔到份量咁多，佢嘅鵝片切得唔會太薄，口感啱啱好，點埋佢個酸辣汁真係好出色。另外我哋仲叫咗個桂花醉雞半隻，一上枱因為佢嘅份量好大，以為比錯咗一隻，原來半隻已經咁多。佢嘅酒味唔算太濃郁，不過雞肉食落好嫩滑，而且雞皮都好爽脆，非常推薦大家試吓。呢個籠仔蝦醬豬爽肉飯又係好值得推薦，一上枱個籠仔好大，而且聞到好香，豬筍肉本身就好送飯，仲要加埋蝦醬，本身唔鍾意食飯嘅我都忍唔住食咗兩碗。但係估唔到大家食咁多，最後都有剩返少少。而家做緊優惠，食滿$300 ，加$8就可以要一個滷水雜拼。入面有齊豬耳，墨魚，豬頭肉，鵝腸等等嘅配料，鍾意食潮州嘢嘅人真係唔好錯過啦。呢間打冷潮州菜又平又抵食，而且環境好好坐好舒服，非常推薦大家同朋友敘舊嘅時候嚟試吓。