地點：上環
菜式：上海菜
餐牌：皇牌推介、健康菜飯類、湯麵類、拌麵類、蟹粉類、小食類、涼拌類、餅類、飲品，都有人氣熱賣皇牌套餐。落單掃QR code。
2
人氣熱賣皇牌套餐可以選擇唔同配搭加唔同數量生煎包。
麻醬手撕雞絲粉皮 + 生煎包2隻 $54
生煎包
生煎包熱辣辣上枱！一咬入去就爆汁，而個湯唔會太油，啲肉都鮮，份量唔少。個底好脆，面頭灑上蔥花同黑芝麻粒。可以加枱上面黑醋食，更好味又可降溫。
麻醬手撕雞絲粉皮
麻醬手撕雞絲粉皮好大碗。粉皮份量最多，質素正常。加有幼條青瓜絲同粗雞絲，灑上白芝麻粒。叫左麻醬另上，自己加最好。
迷你雞絲酸辣湯 + 生煎包6隻 $59
迷你雞絲酸辣湯果然迷你，大概飯碗份量，不過都好多料。除咗雞絲，仲有冬菇，黑木耳，豆腐粒，味道酸酸辣辣，唔錯。
皇牌套餐奉送豆漿一杯。豆漿用茶杯裝，係凍嘅，都幾好飲。
雞絲酸辣湯小雲吞 $36
雞絲酸辣湯小雲吞就係正常大碗size，小雲吞6粒，塊皮又薄又滑，都唔算太細，質素唔錯。
袐製上海炸排骨 $22
袐製上海炸排骨一開6件，炸得外脆內嫩，一級棒。
手工豆沙窩餅 $28
手工豆沙窩餅一件切開八小件易入口，皮脆唔太油，如果再多啲豆沙餡就正啦。
總括而言，呢度生煎包多汁又脆底，其他食物質素都唔錯，炸排骨特別好食。店舖裝修光猛，座位正常，星期五午市好多人，好彩我12點9前到就唔洗等，中上環黎講好抵食。
