一品滷水專門店

Open Now

Now Closed

本人特別鍾意食滷水食物，包括雞髀雞翼、豬大腸、滷水蛋等等，滷水嘅精髓在於滷水汁要夠香濃，食物要煮得夠入味。嚟到北角就去呢間一品滷水專門店，雖然佢舖頭細細，但對正英皇道非常容易搵。門口嘅收銀姐姐態度好親切。睇住個餐牌有太多選擇，諗咗一陣我揀咗滷水豬大腸、紅腸、雞蛋、鵝肝同鵝翼，廚師老闆好好人，話送多幾嚿豆腐俾我食，我梗係即刻講多謝啦，成個餐盒放到滿晒都係$100左右，非常抵食！可能係做開街坊生意，老闆同啲客人都好熟絡，記得晒啲熟客食咩，客人嚟到都好有親切感。講到食物，呢間嘅滷水汁真係非常香濃，未入到店已經聞到嗰陣好香嘅滷水味，而且不論豬大腸定係鵝肝都完全吸收晒啲滷水汁，一啖咬落去除咗食到本身嘅肉味之外，裏面嘅滷水汁滲出嚟，充滿個口腔，其實唔使點汁都好好味。我個人最欣賞佢嘅滷水蛋同紅腸，滷水蛋夠入味，紅腸夠爽口，食完一塊接一塊。鍾意食滷水嘅朋友，一定要你試一試！