想食避風塘炒蟹，同朋友去咗尖沙咀美麗華商場嘅「喜記蟹將軍」。環境似傳統酒樓，幾闊。最好係店員會主動幫手剝蟹殼同瀨尿蝦殼，啱曬怕麻煩又想食海鮮嘅人。今次試咗幾款招牌菜，仲有送番薯糖水。
🌶️ 喜記正宗炒辣蟹（肉蟹-細）
肉蟹斬件炸到脆身，同多種香料同蒜粒一齊炒，好入味。
蒜粒脆口，蟹鉗肉尤其鮮甜。有人幫手剝殼，吃得好輕鬆。
🦐 喜記椒鹽富貴蝦
瀨尿蝦好大隻，椒鹽炒得香口。蝦膏飽滿，肉質彈牙，幾有風味。
🐚 小炒兩款：
▪️豉椒炒蜆：蜆肉大隻冇沙，豉椒汁夠鑊氣
▪️豆豉鯪魚油麥菜：油麥菜吸收曬鯪魚嘅鹹香，不會太油
🍜 招牌蟹油炒麵
用蟹油炒，麵條夠乾身，有淡淡蟹香，配韭菜銀芽幾好食。
🍠 最後每人有碗免費番薯糖水，薑味溫和，食完濃味嘢飲返碗幾舒服。
