pangdeedee的個人專頁

同朋友去食吓甜品，見到佢哋嘅dirty tiramisu 咁出名就去咗食。叫咗一個。pulled pork burger, 佢送嘅薯條都係番薯薯條，另外再嗌多咗個黑松露炒蛋。薯條係甜甜哋都幾特別，而且新鮮炸出嚟好好食。黑松露炒蛋都好食，非常滑唔會炒到老晒，黑松露味都好強。漢堡包就食得係用心整嘅，調味唔會太重手、人工，裏面仲夾咗紫洋蔥同埋生菜，整體食起嚟都好輕盈。跟住就係期待已久嘅Tiramisu，本身佢serve出嚟我覺得好細件，但係食落去就覺得係非常美味，手指餅食到中間咖啡味會出啲，但係個cream真係非常好食。略嫌有啲貴，但冇試過可以食吓，而且仲可以享受埋個優質環境，可惜嘅係冇廁所用。…查看更多

同朋友夜晚睇完show，諗住搵啲輕食，發現咗呢間嘢。店員好友善咁樣叫我哋入去試吓，一食就不得了，我哋叫咗個燒豬頸肉，芝士牛油焗雜菇，鹽燒烤牛脷，燒白鱔，蒜香茄子。全部叫咗少少辣調味都好好食，燒豬頸肉夠腍，牛脷留香同埋油香味，燒白鱔都係好香有鮮味，蒜香茄子就大大碟，泡油剛剛好唔會太多，最令人驚訝就係芝士牛油焗雜菇，平時嗰啲都係細細啲，啲芝士都細到睇唔到，但呢一個啲芝士係煙煙韌韌，而且都真係幾多種有金菇或鮑魚菇等等口感十足，同芝士融合為一體。雖然食得飽可能會有少少貴，但係我覺得對得住價錢。 …查看更多

叫咗佢哋最出名嘅芝士奶蓋茉莉茶同埋茶凍。一入口個芝士味道係車打芝士嗰種味道，有少少似某芝士夾心餅嗰一隻味但係變咗液體，鹹鹹香香同平時用忌廉芝士有啲唔同，我覺得係幾特別，但係飲到最後嗰啖會覺得個鹹好似鹹得滯，而且嗰一種鹹食嘅感覺稍為同個茶唔係好夾。屬於嗰一種你覺得佢唔係好好飲，但係你會想再飲吓佢嘅感覺。茉莉茶就唔使講係王牌項目，所以都係好香嘅，茶凍就冇乜特別可能因為嗰個茶本身已經好香，所以變相食落去就唔係話好出色，可以唔使加，如果齋嗌一杯茶個價錢其實都唔係話特別貴，以一間咁知名嘅有網紅加持嘅舖頭，我覺得可以一試。…查看更多

試咗朱古力，蜜糖同埋原味。本來覺得朱古力應該會係幾好食，但係食完之後發覺個朱古力醬本身冚咗原理嘅香味。原味本身都冇食，係最食得出嗰款冬甩嘅煙靭，不過蜜糖味真係驚為天人，糖粉有少少脆，令到成件事有咗口感，而且個甜味輕輕地帶出埋個冬甩嘅油香，真係唔食唔知咁好食。整體而言三款都幾高質，本身個底就好好食，但係令人估唔到嘅係本身你應係好食嘅醬，竟然會令到個冬甩冇咁好食。整體嚟講都唔會話好油膩，食落去會有麻糬嘅感覺，覺得就算唔係食開啲好油嘅甜品嘅人都應該會幾鍾意。…查看更多

一向都喺度叫開豬柳蛋漢堡餐。唔知係咪冇乜人叫，通常個包都係叫先有人整，但係出餐都幾快，而且拎上手個包熱辣辣，啲芝士蓉落個肉度真係好好食，通常我會叫粟米，粟米都係熱辣辣，而且係甜甜地嘅。今次都係叫咗杯熱朱古力，都係新鮮沖，雖然都係平時嗰隻即沖朱古力，但係熱就係會加分。而且我好喜歡廣源邨呢個環境，一間麥當勞喺一個紅磚小屋裏便睇住出邊咁舒服嘅環境就會覺得冇平時食快餐咁急。不過唯一嘅缺點就係冇廁所用，而且附近都淨係得酒樓嘅廁所可以用。…查看更多

叫咗豬骨湯底紅薯粉加牛展。豬骨湯底有少至中辣，送咗啲肉碎榨菜，都幾足料。薯粉係幼身，而且有少少亂嘅，口感不錯而且唔使另外加錢牛腱10分高質，有少少辣，連住筋嘅部份都幾多，本身以為一個餸好少但係都幾多。而且唔會好硬咬唔入。另外再叫咗個豬頸肉做小食，附送酸辣醬。煎得剛剛好，香脆，另外再有調咗少少味。亦都10分大碟，覺得對得住佢個價錢。稍為有試到朋友嘅其他餸，腩肉比較多肥膏都有少少辣，但係如果係食肥膏嘅一口咬落去會覺得好爽。雞腎有咬口，生腸爽口，而且份量都係好多。下次會想試吓食其他餸！…查看更多

朝頭早六七點去咗飲早茶，人都算幾多，但係都可以坐到好多人一台，可以坐出邊又可以坐入邊。以為係嗰種要自己拎嘅，但係佢幫你拎點心，服務都幾好。腸粉類別嘅點心我覺得可圈可點，皮唔算特別薄，但係都叫熱辣辣好食。鳳爪就普通發揮，唔係話好好食，但係都唔係話唔好食。蘿蔔糕係新鮮煎嘅非常美味，十分之香。雞同鴨腳都好好食，係雞髀肉嚟嘅，非常之滑。而且我第一次見糯米雞真係有糯米同雞，而且仲有個鹹蛋黃喺中間， 10分驚喜。燒賣真係驚為天人，係全場最好食嘅item。做街坊生意嘅飲茶，良心小店…查看更多

叫咗個下午茶套餐，有個主食，小食再加熱飲。主食揀咗個牛肉飯，碗飯就好多，餸就唔係話10分多，但係都好飽，牛肉飯嘅味道就普通啦，同某一間連鎖食牛肉飯嘅差唔多味道。小食非常大兜，雲耳係食咗少少先至再影，但係都好多，比起其他舖頭嘅小食似乎再多一倍，係有少少麻辣，都整得幾好食。飲品係麥可可，應該係類似阿華田嘅飲品， 10分濃郁足料，而且都加咗幾多奶，熱辣辣好好飲。下午茶呢個價錢覺得算係合理，可以當係一個比較遲嘅午飯食。…查看更多

叫咗個北海道士多啤梨芭菲同埋抹茶士多啤梨latte，個芭菲都幾好食，雪糕嘅奶味好重，底下有脆脆同埋士多啤梨醬仲有芝士蛋糕，不過覺得啲配料就普通啦，淨係個雪糕都好好食。杯嘢飲就略嫌抹茶味比較淡啲，上面個抹茶雪糕仲好過杯嘢飲，抹茶味都比較濃，有回甘香。好食，不過以呢個價錢嚟講性價比就唔算高啦。…查看更多

叫咗個牛丼，加咗個流心蛋，同埋咖喱汁。我覺得個牛真係好好食，個飯雖然有啲細，但係因為個牛非常之多油脂，所以其實食起上嚟都幾飽肚。個餐本身送咗個cream，但係覺得個牛本身已經好好食，所以加咗隻蛋同埋個cream都好似唔係特別出，至於個咖喱汁就唔使加了，冇咩特別，仲要加$8都唔係好抵，我覺得係物有所值，不過就預咗個成本去咗個牛度多過係其他嘢，可以一試。…查看更多

飲咗呢度嘅black Dog Lager同熱情果啤酒，熱情果啤酒就唔甜嘅，有少少酸，佢哋嗰款lager就好香麥味同都幾甜，叫咗個薯餅同埋薯條嘅拼盤，覺得比麥記熱啲好食啲脆啲，覺得happy hour過嚟坐吓吹吓水都幾開心…查看更多

喺度叫咗個Tiramisu嘅可麗餅，非常非常足料，吉士嘅比例都幾高，裏便夾咗啲浸咗咖啡嘅手指餅，有啲脆脆，覺得咖啡味唔係嗰種大人Tiramisu嘅口味，不過鍾意食cream嘅朋友應該會覺得幾好食，而且都真係有手掌咁大，一個都可以當一餐食，想試晒全部味…查看更多

見到其他食評話個木糠布甸好似雪糕好好食，一食覺得不得了。個布甸可以分層食，可以疊住一齊食，好似雪糕蛋糕咁樣，同平時啲好creamy嘅texture好唔同，係硬身嘅，一嚿雪咗嘅嘢，中間仲夾住啲餅乾碎，係我食過最特別嘅木糠布甸芒果糯米糍就正常發揮，唔算大粒唔算細粒，芒果都甜，不過皮有啲厚。…查看更多

試咗乾炒牛河，星洲炒米，仲有咖喱焗雞扒飯，三樣都好好食，乾炒牛河非常之有鑊氣，洲炒米除咗有鑊氣之外嗰種咖喱香味又唔會搶咗，但係又若隱若現，而且10分多材料，唔會吝嗇。咖喱焗雞扒飯尤其用心，個飯係炒飯底，非常之香，咖喱嘅椰香味都好出，而且上邊仲有芝士，送餐飲，鴛鴦嘅茶同咖啡同埋奶香味都好出，真係好耐冇食過咁好食嘅茶餐廳啦！…查看更多

冇食到最出名嘅醉雞，食咗雞煲翅同埋胡椒豬肚雞，我哋揀咗食米線同埋刀削麵，米線配啲湯好好食，但刀削麵好出色，麵有筋度，麵側邊仲有啲波浪紋嘅切痕令到佢嘅口感好豐富。雞湯濃郁有料，雞肉香而鮮甜，食得出有條過少少味但係又唔會太重手。胡椒豬肚湯尤其出色，見到一粒粒嘅胡椒喺個湯度，食得出應該係喺雞湯再煮出嚟，豬肚調味都不錯，胡椒嘅辣唔係留喺個嘴好耐，即使唔係食得好辣都可以一試。店員嘅服務態度都好好，面帶笑容咁樣叫我哋坐低。係一間食得好開心嘅餐廳，用心製作！…查看更多