**立逃遠的个人专页

行過佢哋門口開始落雨，原來係百年一遇大暴雨來臨，門外見餐牌有梅菜扣肉飯$50凍飲加兩蚊，有懷疑，咁平！落雨天留客，入去試試啦！同扣肉初次見面有驚喜，真係梅菜扣肉，唔係嗰啲梅菜“瘦”肉，仲係飯餸分開，居然有唔少份量學斗墊底，梅菜夠香冇沙，扣肉腍化唔係柴，呢個價錢超值，唔夠喉要多個節瓜粉絲蝦米$62，可能覺得細咗，味道好，冇煮一擗嘢，廚房師傅有料到，環境就普通，唔係而家嗰類茶餐廳大光猛裝修，最鍾意係冇櫃桶檯，唔使食餐飯都撞到膝頭，獨食，撐檯腳，小家飯都啱使，要再試下其他菜式，希望做到飯堂。…查看更多

綜合收到情報，分析後到此一探，睇吓行動不便嘅，出入方唔方便，去廁所有冇困難，試試早茶預備明晚帶人嚟打打佢邊爐，試嘅途中已有念頭搵另一間，首先強調食物品質及味道係好嘅，但員工就有問題，尤其啲著西裝褸嘅領班，入到場冇帶位，自由揀位坐，接受，坐低冇人理，一般情況都係咁，爭取時間剔點心紙，到有人嚟開茶，要求畀多個空茶壼，到茶嚟到冇空壼跟𠹺，問問亞姐，佢攞咗剔好嘅兩張點心紙就去如黃鶴冇答覆，唯有自己搞掂啦！拎住個空茶壼未坐番低，畀個著“西裝褸”嘅女人截住，揸住個黑色夾單本，用落口供口吻，問我叫咗乜嘢食？吓？？？妳手上都有份點心清單，係想問乜嘢呢？咁話佢知兩張點心紙上便剔嘅都係，跟住點心只嚟咗，叫嘅8樣嘅其中3 樣，隔籬遲我入坐客人已經食緊同我未到嘅同款點心，追問啦！跟住另一個著背心嘅亞姐幫我追單，問我有乜未到？8樣只嚟咗3樣，攞起張清單，剔起未到嗰5樣去追，跟住只嚟咗兩樣，仲有3 碟呢？過一段時間再追問，佢話咪問咗“你爭啲乜未到囉”，？？妳攞住張剔住邊啲未到嘅清單，咁都仲瀨落我喥冇講爭乜嘢？佢跟住仲話你等得就等啦！唔等得就唔好要啦！嘩！唔要我就唔會多次追問啦？我都話番句，妳做得嚟就做啦！做唔嚟就咪做份工喇！呢檔係乜嘢嚟㗎？唔係要求你間嘢，有乜嘢貴賓式服務態度，應有嘅達到客人基本要求唔會過份呀？必要嘅亦可收番相當費用，為何要為難客人呢？後來從另一渠道得知，原來著西裝褸嗰位，認為我唔可以要8款點心，主動刪除咗5樣，到我再追所欠5款時又再刪除3款，我冇光頭又冇扎髻，點睇都唔係和尚道士嚟化緣呀？抑或覺得我係惡人嚟食霸王餐？如果有咁顧慮，你哋可以收定錢先𠺝！咁咪唔使擔心啦！一定推薦親朋戚友唔好嚟呢間，食品嘅質素唔係高到讓人受氣囉！…查看更多

行過見到光鮮試一試！手轆乳豬！？一食就知點解！其他都係寫化皮乳豬,佢寫手轆原因係啲乳豬皮係冧靭！得大半件脆皮！試食咁要試𠹺招牌菜,嚟個燒鵝拼燒排骨！正喎燒鵝,皮脆肉滑！燒排骨肉嫩有汁！見有炖湯要咗個烏雞試一試,不過不失！水牌有梅菜扣肉飯，查詢一吓！原來限量發售！只在午市！只供有緣人！下次嚟唔會叫乳豬！樓面得一個亞姐,可能有人射波,一人要內外應付,力有不逮！要咗兩個餐$171埋單！新開冇耐地方好乾淨！…查看更多

行過門口見佢擺喺喥嘅魚片，色澤唔錯好吸引！坐低要碗淨魚蛋$30，好多地方賣緊廿零蚊，跟炸魚皮$8，抵食！正價$15，腐乳通菜$10，抵！份量足夠！汽水$8，估係因為近荃新天地，舖租貴啲，賣貴少少！魚蛋最弊就係有骨！碎骨！口感極差！雖然炸魚皮同油菜又抵食又正！當埋你啲墨魚丸都好正嘞！但魚蛋係招牌嚟啵？點解會噉差？魚蛋有骨…係証明師父懶！過兩三次機已唔會食落有骨！只有懶同冇誠意先至會搞到啲魚蛋有骨！金玉其外！敗絮其中！外形點吸引，但食落唔掂！睇個舖嘅環境氣紛都唔會有任何改善！好在高質魚蛋粉，週圍都有！冇有怕！…查看更多