Master Taste 8的個人專頁

今日放假，知道大埔墟大方食家呢個時間會出羊肉湯，入秋微涼，同阿嫂特登嚟到補一補身。坐低睇緊菜單嗰陣，發現隔籬枱坐咗位好健談嘅人兄，傾多兩句先知原來就係老闆本尊！成餐飯除咗食到好嘢，仲上咗堂免費食材課，真係抵到爛！🐑 蘿蔔羊腩湯（時令推薦！）羊腩炆得鬆化，羶味處理得恰到好處，蘿蔔吸盡肉汁精華，湯底溫潤濃厚，記得要加啲佢哋自己炒嘅胡椒粉，飲完成個胃好舒服！🍲 花膠海參雞湯米粉（梅州米排粉）湯頭濃郁得嚟唔油膩，花膠同海參炆得腍滑入味，梅州米排粉索晒湯汁，掛湯一流，食落暖笠笠。🍗 招牌家鄉（梅县）黃酒雞湯果然係鎮店名菜！黃酒香醇唔搶喉，雞肉嫩滑有咬口，酒香滲透每啖湯，飲完成個人即刻暖晒，正！🥣 新鮮枸杞豬潤瘦肉湯豬潤切得厚薄適中，煮得剛熟爽口唔過老，枸杞葉清香帶微甘，成碗湯清潤鮮甜，好啱秋天乾燥天氣飲。🍵 食完藥膳湯底，飲返杯熱辣辣嘅陳皮桔普茶，消滯解膩，經老闆親授陳皮嘅分界線，杯茶嗒落更加有味道。以呢個用料同分量，幾十蚊碗絕對超值！最難得係學到咁多實用知識，呢餐真係「食又補身，學又補腦」。大方食家絕對值得專登拜訪！…查看更多

考試季終於完結，即刻同另一位媽媽朋友，帶埋兩個細路去荃灣廣場嘅「HomeLand」輕鬆吓。餐廳環境光猛開揚，枱與枱之間有足夠空間，細路有少少走動都唔使擔心撞親。「黑松露牛肝菌蘑菇湯」味道濃郁，飲落好暖胃。主菜「原隻波士頓龍蝦明太子海蝦薄餅」絕對係高分之選，龍蝦肉彈牙，薄餅底香脆，夾埋明太子醬好惹味。「蘭王蛋松露煙腩卡邦尼QQ捲捲意粉」亦煮得恰到好處，蛋汁香濃，每條意粉都掛滿醬汁。小食「酥脆雞翼拼盤」三款口味之中，鹹蛋黃味最得我心，食落超級香口！小朋友就鍾意甜甜地明太子醬。揀Homeland其中一個原因係餐廳嘅畫碟服務。只要點任何甜品再加$35，師傅就可以即場為你畫碟。我哋兩個細路要求畫一間「學校」，師傅真係畫咗間色彩繽紛、好靚嘅學校出嚟，兩個小朋友開心到不停拍手掌。最窩心嘅係，畫完之後職員主動幫我哋同個甜品影即影即有相，送俾我哋留念，真係心思十足！另外餐廳仲有提供身份證號碼優惠同午市四人同行一人免費嘅推廣，詳情可以向服務員查詢。總括嚟講，HomeLand 唔單止食物有質素，環境舒適，最加分係畫碟服務連即影即有留念，加$35令成餐飯加一個開心嘅回憶幾抵。…查看更多

今日同屋企人嚟到大埔舊墟嘅「OX Steak Lounge」！街坊口碑向來唔錯～我哋叫咗兩個set dinner，收費喺大埔區算中上價位，但食完會話值回票價！✨頭盤系蜂蜜芥末燻三文魚沙律，三文魚油脂香平衡得啱啱好，蜂蜜芥末汁醒胃得嚟唔會搶戲。凱撒沙律（雞肉）- 麵包粒脆卜卜，羅馬生菜新鮮爽脆，芝士同醬汁份量剛好。牛肝菌野菌忌廉湯 ，菌香超濃郁！飲到細碎菌粒，真材實料。配自家製牛骨髓牛油包！麵包烘得外脆內軟，塗上牛骨髓牛油後瞬間融化，邪惡度爆燈，但真係忍唔住食晒成個😍🍖主菜香煎鐵板封門柳（五成熟），肉質軟淋得嚟有嚼勁，牛味濃郁，配埋紅酒汁真係絕配。西班牙伊比利亞黑毛豬鞍果然名不虛傳！外層煎得焦香，內裡爽嫩多汁，配清甜蘋果莎莎解膩。🍨甜品完美收官，心太軟流心澎湃，朱古力味濃而不膩。開心果麻糬杯堅果香突出，麻糬Q彈口感加分。服務員態度友善，上菜節奏掌握得幾好。環境偏暗調有情調，適合家庭聚餐或情侶紀念日。以食物質素同份量嚟講，會想再encore！…查看更多

今日過咗去馬鞍山搵朋友聚聚，發現原來Zen開到嚟Mostown！雖然係新分店，但人氣依然旺到爆，我哋下晝三點到都要等十幾分鐘先入座。我哋叫咗個「下午茶大盛定食蕃茄烏冬」做基底，$48就有碗自家製蕃茄烏冬，湯底鮮茄打蓉，濃郁得嚟好鮮甜，烏冬咬落好彈牙。再加咗幾款配料：蒲燒鰻魚半條燒得啱啱好，甜甜哋嘅鰻魚汁超惹味；南蠻炸雞外脆內嫩，仲有啲酸酸哢哢嘅醬汁點綴；吉列大蝦炸粉薄脆，蝦肉爽口；再加份野菜平衡下，成個定食豐富到呢！特別要提佢加少少錢有杯勁高質特飲，我試咗牛油果士多啤梨乳酪奶昔，口感順滑，果味天然。朋友嗰杯芒果紅桑子乳酪奶昔，果味更加濃郁，真係抵讚！蟹鉗奶油忌廉扁蔥粉真係有驚喜！奶油忌廉汁超濃郁，每條扁蔥粉都掛滿汁，食落Creamy得嚟又唔會膩，仲有淡淡蔥香平衡返，口感滑溜溜，有少少邪惡，但係成碟食晒。開心果梳乎厘絕對係必點！即叫即製，上枱仲係熱辣辣，梳乎厘空氣感十足，入口即化，開心果味香濃自然，面頭灑咗啲開心果碎增加口感，甜度控制得啱啱好，食完滿足感爆棚！埋單兩個人連加一都係合理價，呢個質素同份量，真係抵到爛！以後馬鞍山又多個高質下午茶選擇啦～…查看更多

死黨外國飛返嚟，話要食返碗正宗雲吞麵。我哋摸上麥名記，呢間攞過米芝蓮嘅麵鋪，未入去已經聞到大地魚湯嘅香味，真係「未食先醉」！🍜 碗雲吞麵一上枱，湯底清得嚟帶金黃色，飲一啖——嘩！係傳統大地魚＋蝦殼熬出嚟嘅鮮甜，唔係味精水！麵條揀咗「幼升」（幼身堿水麵？），咬落爽口彈牙，仲有陣陣蛋香。雲吞係細細粒「金魚尾」包法，皮薄到透光，入面隻蝦爽脆仲有少少肥豬肉吊味，一啖一粒唔會「水汪汪」。🥟 碗淨水餃漲卜卜似元寶，皮薄到透出入面粉紅色蝦肉同淺色木耳絲。咬開一啖，湯汁「吱」出嚟，入面除咗鮮蝦仲有少少筍絲同豬肉碎，口感層次豐富！老友話：「外國啲水餃同呢碟比，簡直係BB班對大學教授！」碟牛筋腩可謂一絕！牛筋燜到入口即化，但唔會爛溶溶；牛腩專揀「坑腩」部位，肥瘦分明，啲筋膜位索盡柱侯醬同花椒八角嘅精華。最正係底下墊咗兩條生菜，吸晒啲腩汁... 食到連汁都撈埋！老友話：「外國啲雲吞麵同呢碗比，真係輸成條彌敦道！」呢啲先係香港人嘅集體回憶——唔使豪裝，靠一碗實實在在嘅雲吞麵同燜到入魂嘅牛筋腩，「米芝蓮」招牌系實至名歸！…查看更多

正好明天係公眾假期，可以好好犒賞自己一下。帝京向來以高質食物聞名，果然冇失望。BOOK唔到繁忙時間，估唔到8:30都好FULL，一入到餐廳，即刻QR CODE點返個刺身拼盤先，赤海蝦、甜蝦、赤貝、北海道鮮帶子、油甘魚、三文魚、泰式虎蝦、蜜柑鯛薄切，樣樣都好新鮮，特別係鱘魚籽醬同北海道鮮帶子，鱘魚籽鹹香，帶子又滑又嫩，食落口感真係一流。最啱我心水嘅係波士頓龍蝦，啖啖龍蝦肉，搭配特製醬汁，真係好享受。蒜蓉粉絲蒸蟶子王，蟶子新鮮得嚟又多汁，蒜香味配上粉絲，簡直係完美搭檔！仲有避風塘炒蟹，用嘅係新鮮蟹，香辣味十足，非常惹味。壽司方面，海膽拖羅鱈魚干手卷，海膽滑溜配上鱈魚干，口感好豐富！還有牛油果蟹肉最中餅，牛油果同蟹肉嘅搭配，味道好得意，細細件食多幾件都無負擔。仲有一品料理嘅美味，燒香草羊鞍同醬燒牛肉都好正！羊肉香氣四溢，牛肉又嫩又滑，明太子玉子燒嘅口感柔滑，真係好好味。總括來講，帝京呢個海鮮任食每一道菜都真係用心之作。下次有機會，我一定會再來探索多啲美味！…查看更多

阿Sir請食飯，揀咗尖沙咀加連威老道「牛站（駅）」嘅火鍋放題。地點方便，樓上舖算係闊落，坐得幾舒服。一坐低，阿sir直接order 3号餐，睇嚟佢都成日喺度開餐，熟晒架步。特上牛小排脂肪同肉比例均勻，輕輕一淥就食得，肉質軟嫩，牛味香濃。澳洲M5和牛嘅油脂感更重，入口柔軟，確實有即溶嘅感覺，食多幾塊都幾有滿足感。而極黑和牛片同安格斯牛板腱都唔錯，前者肉味實在啲，後者就爽口一啲，可以換吓口味。和牛五花趾比較有咬口，但唔會韌。海鮮拼盤上枱時有啲驚喜。花膠厚身，煮完之後口感軟滑。鮮蠔同鮑魚都幾新鮮，冇雪藏味。大頭蝦同海蝦都算大隻，肉質結實。以放題嚟講，海鮮質素交到功課。自助區選擇多，熱食炸品、涼菜、甜品、Häagen-Dazs雪糕等，應有盡有。欣賞佢蔬菜新鮮，洗得乾淨。我encore咗好多次佢嘅豆苗。整體嚟講，食物質素對得住價錢，上菜速度合理，冇漏單。環境同服務都好好。如果一班人想搵個地方盡興咁打個邊爐，牛站（駅）係一個穩陣嘅選擇。…查看更多

今日聽完講座，同學提議去旺角創興廣場的安平燒肉食烤肉，正好可以討論下講座內容。Level 4嘅套餐主推日本A4和牛烤肉、醬燒一口和牛丁、M8和牛肩胛同壽喜燒，和牛肉質柔嫩，兩種食法同樣出色。不得不提嘅係招牌「極．厚切檸檬牛舌」，一整條牛舌放喺砧板上枱，仲有沙漏計時，圖文並茂教埋你點樣燒，烤到恰到好處，擠上新鮮檸檬汁，果香中和咗油脂，入口爽脆彈牙，真係好味到我哋一人一條。120分鐘內可以任食日本A4+和牛外，仲有頂級海鮮，霸王蝦、鮑魚、扇貝、白鱔任點任食，CP值超高！醬汁方面選擇多樣，有招牌黃金醬、蒜味鹽醬、沙茶醬等，讓人品嚐到台燒獨特的風味。自助區新鮮瓜菜、菇類多樣，仲有QR code多款台式小食、飲品、芋圓甜品，任君選擇。首次體驗食燒肉前飲啖湯，安平嘅慢熬清雞湯湯頭鮮美，為整頓飯揭開完美序幕。環境舒適，食材新鮮、高質，真係一個放鬆同享受美食嘅好地方。秋高氣爽，好適合聚會既季節，安平燒肉以優質既食材，配合豐盛既味道，如果你諗緊去邊度享受美食，安平值得一試。…查看更多

永利清湯腩，喺太和有D名氣，係主打呢一碗清湯腩。店家選用新鮮牛腩，今日特登過嚟試下。睇個湯底就知有下功夫，用牛骨熬成，色水清得嚟，面頭浮住一層薄薄嘅牛脂油花，聞落去牛香味好出。呢個清湯，確實係成碗麵嘅靈魂。牛腩食落爽身有咬口，牛味實在，同冰鮮腩常見嘅鬆散同「削」口感確實有分別；牛筋夠淋，牛肚爽身無異味。麵身夠彈，掛得起湯汁，每一啖都係湯同麵嘅融合。由湯底到牛腩，都食得出係用心製作。喺今時今日好多舖頭貪方便用現成湯底嘅環境下，仲肯花時間熬牛骨湯，呢份堅持已經值得支持。如果經過太和，想食碗真材實料、牛味香濃嘅清湯腩，呢度係個穩陣嘅選擇。…查看更多

今日去咗啟德Airside覓食，Airside Cafe 空間感好闊落，坐低後發覺唔單止環境舒服，服務態度仲好好，服務員好耐心介紹，同我地有溝通，推薦既菜色，全部好啱食，而且無限時，我地嘆足一整晚，值得一讚！冷海鮮拼盤一上枱已經超震撼！拼盤有齊龍蝦、生蠔、海蝦、帶子、磯煮鮑魚，每款海鮮都睇得出精挑細選。重點係個龍蝦，煮法真係好特別——表面望落似刺身，食落先知係啱啱熟，肉質爽彈又鮮甜，同全熟嘅口感完全兩回事，絕對係驚喜！生蠔勁鮮美，海水味濃郁；海蝦同帶子鮮味十足；磯煮鮑魚入味又唔會韌。拼盤附上三款醬汁：海鮮醬、味噌蛋黃醬、柚子胡椒醬，各有特色，個人覺得海鮮咁出色，醬汁只係錦上添花！服務員建議烤白羊架可以試７成，的確羊架烤得火候啱啱好，肉質粉嫩，完全冇羶味，配埋燒西蘭花，簡單又好食。甜品鳳梨沙冰配冧酒果凍幾特別。手工乳酪雪糕配蛋白脆餅，口感豐富。兩杯Mocktails賣相靚，果味清新。整體食物高質，服務到位，海鮮拼盤尤其出色，絕對會再嚟！…查看更多

位於尖沙咀金巴利道嘅「殿大喜屋」，地點就腳，出咗地鐵行幾分鐘就到，主打全港獨有嘅波士頓龍蝦同鱘魚子醬任食，真係好有看頭。一坐低就梗係要狂點佢哋嘅招牌波士頓龍蝦，啖啖肉又鮮甜，龍蝦膏仲好香濃。至於矜貴嘅鱘魚子醬，可以就咁食或者配塊餅乾，鹹鮮味喺口裡面爆開，個感覺好滿足。刺身方面，金槍魚腩（拖羅）油脂好靚，入口即溶，質素拍得住出面專門店。熱食嘅選擇都好多，避風塘炒蟹夠鑊氣，蟹肉新鮮仲有膏；蒜蓉粉絲蒸蟶子王鮮甜爽口，蒸得啱啱好，蒜香XO醬好惹味。如果鍾意食蝦，一定要試油鹽焗大頭蝦，簡單調味已經帶出蝦嘅鮮味。而新加坡大頭蝦喇沙麵湯底香濃，飲埋個湯先夠圓滿。壽司類嘅海膽軍艦用日本海膽，味道鮮甜唔會有怪味。食多啲海鮮之後，可以點返個暖身嘅古法碗仔羊腩，炆得好腍好入味。清番個口就可以食瑤柱扒豆苗，同埋燒得清甜多汁嘅燒北海道白玉粟米。總括嚟講，大喜屋殿嘅食材質素高，款式多，臨走之前食埋佢特別版嘅Häagen-Dazs雪糕，殿大喜屋喺尖沙咀區係一個性價比唔錯嘅高質放題選擇。…查看更多

係大埔寶鄉街嘅洪記，今日嚟到唔同咗，鋪面大咗一倍，仲加咗張長枱，可以即叫即食，熱辣辣風味即時唔同晒！今日買咗芒果糯米飯同鹹蛋黃炸蝦條粢飯係新出品。個糯米飯真心有驚喜，芒果甜又多汁，淋上椰漿嘅糯米飯，暖暖哋軟糯煙韌，好食。我勁鍾意鹹蛋黃炸蝦條粢飯，系腐皮蝦卷變奏版，佢用腐皮蝦卷整，一咬落去「索」一聲，夾住彈牙蝦肉同鹹香嘅蛋黃幾好食，口感豐富。煎餃子皮薄煙靭，煎到皮脆肉香，呢個功夫多年如一日。黃金餃鹹蛋黃好香，蛋黃嘅油香同沙沙口感滲透晒喺肉餡裏面；韭菜餃就一如既往咁正，韭菜味濃，食落好新鮮。綜合芋圓燒仙草料多到滿瀉，食完香口嘢再嚟碗冰涼糖水，真係大滿足。企喺度食呢種風味同人情味，就係小店擴充後難得嘅地方。洪記冇因為做大咗而丟淡個味道，仲肯搞新意思，呢份心思，值得我哋繼續幫襯落去。…查看更多

南下來公幹嘅同事想食正宗港式燒味，於是去咗上環「新德興」。最好不過系5寶，我哋叫咗招牌燒鵝同乳豬五寶飯。燒鵝皮脆肉嫩，帶陳皮清香，汁撈飯真係一流；乳豬皮脆而不膩，油脂香恰到好處。同事話內地燒味偏甜軟身，呢度嘅明顯更香脆濃郁。燻蹄例牌切得薄身，爽口入味，點蒜蓉醋汁非常開胃，正好平衡燒味嘅濃郁。蜜汁叉燒米粉嘅半肥瘦叉燒淋上蜜汁，味道香甜，米粉份量足夠，食落飽足。整體而言，同事大讚新德興嘅燒味火候同調味出色，尤其脆皮同蜜汁嘅平衡做得好好。呢度每碟份量都超級大，真係相當抵食！如果想體驗傳統港式燒味，「新德興」確實係好選擇。…查看更多

呢間牛大人餐廳地點超方便，喺銅鑼灣地鐵站c出口行兩步就到。裝修有台灣夜市風情，坐得幾舒服。我哋揀咗「鴛鴦鍋」，一邊係聰明魷魚沙茶鍋，會跟一碟木魚同蔥段比你加落去。另一邊係養生菇菌燉雞鍋，滿滿嘅菇菌超濃郁。呢個放題套餐最正當然係可以無限食呢款A4和牛！油脂花紋真係好靚，好似大理石咁。淥幾秒就食得，牛味香濃，油脂甘香，我哋每人都點咗起碼三四轉，食到停唔到口！絕對對得住個價錢。除咗A4和牛，仲跟一盤海鮮拼盤，有鮮魷魚、鮑魚、帶子、生蠔，啲生蠔成隻手掌咁大隻，超creamy!另外澳洲M9和牛牛丸都係超正，牛味濃超juicy!除咗和牛，食得最多就係鮑魚，因為佢有好幾款做法，有美乃滋鮑魚酥，柚子燒汁鮑魚，而我最鍾意係佢嘅古法醉飽魚，酒味超香濃！期間限定套餐贈送每人一隻江蘇太湖大閘蟹，平時好少專登買嚟食，今次咁啱可以試吓。飲品有多款特飲可以揀，無酒精試左芒果檸蜜西米爽，啖啖果肉超足料。另外試咗兩隻有伏特加嘅柑橘梳打和芒果梳打，都相當唔錯。自助區有多款蔬菜、丸類、麵類、飲品同雪糕。蔬菜乾淨新鮮，丸類都有好多選擇。飲品櫃有好多台灣特色飲品，好似黑松沙士、蘋果西打，仲有自家製茶。雪糕有Häagen-Dazs、Mövenpick，完美作結。…查看更多

講座坐到腰骨都硬，同同學諗住坐車返屋企，點知佢突然摸住個肚話：「好餓啊……不如食碗糖水先走？」我望望手機，即刻反白眼：「大佬，而家幾點啊？邊度仲有糖水舖開啊？」點知佢神神秘秘咁笑：「跟我嚟啦，附近有間！」八寶鮮草芋圓～三色芋圓夠煙韌，小丸子軟糯，西米同奇亞籽增加口感，紅豆煮得腍身起沙，仲有滑溜嘅仙草做底，料多到差啲滿瀉！加埋球曲奇雪糕，脆脆嘅餅碎融入微甜嘅糖水度，個胃大滿足！🥣 三色芋圓豆花+ 朱古力雪糕底係嫩滑嘅豆腐花，豆味香濃。配上三色芋圓同西米，仲有少少紅豆點綴。凍冰冰嘅濃郁朱古力撞上微溫軟滑嘅豆花，味道不錯！…查看更多