diudiu_cat的個人專頁

門面的紅色光管燈很吸睛，內裏燈光柔和，設有舒適的卡座、二至四人枱，座位不少，環境闊落，骨子企理。選擇不少，有焗類、滑蛋包飯、洋風滋味、鐵板飯、二及四人餐、披薄、飲品及甜品。主菜加錢配是日餐湯沙律及甜品（$21），是日餐湯是羅宋湯，味道非常濃郁，啖啖充滿酸香，越喝越醒胃。內有甘荀、西芹、椰菜等蔬菜，湯料豐富，味道美味。沙律 新鮮爽嫩，配了甘香的芝麻醬，簡單美味。黑椒牛柳粒飯($68)大大碟，牛柳腍嫩，配上香辣惹味的黑椒汁，刺激味蕾，正！鮮蜆白酒煙肉蒜香意大利麵（$68）同樣份量十足。蜆肉鮮味；煙肉鹹香，扁意粉有嚼勁，淡淡蒜香，少油少鹹，不錯！甜品有三款蛋糕選擇，我地揀了榛子摩卡蛋糕和柚子芝士蛋糕，兩款都很精美。榛子摩卡蛋糕 鬆軟，忌廉幼滑，啖啖朱古力和榛子香，好好味！柚子芝士蛋糕 酸酸地，口感細滑，啖啖芝味。草莓沙冰（+$12）成座山，大大杯，感覺好冰涼。真的冰涼透心，味道酸咪咪，好清新！熱柚子茶（$0）暖笠笠，酸酸甜甜好滋潤。…查看更多

今晚約了一位好耐無見的朋友吃飯，知佢鍾情於西餐，所以揀咗間舒服嘅西餐廳同佢一聚。餐廳環境很舒適，裝潢優雅，燈光柔和，室內和室外都有座位，卡座相當闊落，是暢談食嘢的好地方。晚巿有很多選擇，有二人晚餐、一人晚餐、單點菜式、甜品和飲品。今晚我地各選一份一人晚餐，再追加前菜和甜品，好豐富！每款晚餐包是日餐湯和$32或以下餐飲一杯。是日餐湯竟是我最愛的南瓜湯($0/跟餐)，太好彩！口感綿密幼滑，稀稠度適中，味道稍稍香甜，喜歡！另外升級法式蟹肉龍蝦湯（+$38），內有些鮮嫩嘅蟹肉，陣陣鮮香，入口順滑，味道濃郁，好得！北海道帶子沙律（+$38）肉質鮮嫩，面層稍稍輕煎，帶些焦香，內裏半熟，柔軟嫩口，好食！沙律清爽新鮮，配咗一些酸咪咪黑醋汁，好醒胃！軟殼蟹黑松露忌廉意大利飯 （$138）原隻軟殻蟹上枱，賣相一流！炸至乾身而不油膩，外脆肉腍，香口入味。意大利飯滿有黑松露嘅幽香味道，唔會過於濃烈，沾滿香濃的忌廉，相當creamy，較易咀嚼。露絲絲瑪莉香草燒羊架（$218）指定七成熟，燒至有些焦香。肉質相當腍嫩，內肉呈粉紅，啖啖肉汁，肉味香濃，能嚐到微微的羊羶，更顯羊肉風味，蘸些燒汁也美味。旁邊嘅焗薯焗得剛好，粉綿得來又有咬口，滿有薯香，伴着蛋黃醬同吃，好味！熱玫瑰朱古力 （+$14）和熱榛果朱古力（+$14）的拉花也得美，令人喜悅！朱古力味香濃，味道甜美，但玫瑰和榛果味不太突出。開心果麻糬提拉米蘇 (+$48) 賣相一流，見到都開心！香滑嘅開心果忌廉芝士配上濕潤嘅手指餅、煙韌嘅麻糬、香脆嘅開心果碎和焦糖餅，美味的組合，用心之作！…查看更多

今晚晚餐齊齊去咗間冰室，快靚正，亦平靚正。環境光猛，地方企理，座位唔少，有卡座或長排座位，坐得舒適。晚巿有很多選擇，有幾款招牌厚豬扒菜式、小菜、炒粉麵飯、套餐、常餐、小食都有得供應。禾味燒BB鴿 ($53)雖然細細隻，但相當多肉，皮燒得亮澤香口，肉嫩多汁，味道鹹香，唔駛點淮鹽都夠晒味。Double 厚豬扒飯追加辣肉醬（$69+$5）份量十足，兩大塊厚豬扒黃金香口，啖啖肉，充滿肉汁，果然係招牌菜，推介！辣肉醬都好值得追加，香辣惹味，用嚟撈飲一流，食多幾啖，正！胡椒豬肚雞 （$88）先呷啖湯，充滿胡椒香，辛辣暖胃，得！雞雖不算很嫩，但好有雞香；豬肚爽嫩入味，好味！仲有支竹、芹菜、白果、蒜頭等，豐富入味。二人小菜套餐 （$172）揀兩款小菜外，仲送油菜、白飯和熱飲，抵！有多款小菜選擇，點咗黑椒茄子牛仔骨煲，熱辣辣上枱，牛仔骨好惹味，辣辣地！仲有爆香咗嘅洋蔥、蒜子、紅椒、茄子等，鹹香惹味。梅菜蒸皖魚（+$15）即點即蒸，蒸得岩岩好，好嫩滑，伴着梅菜一齊食，最佳拍擋！灼菜心（$0/跟餐送）翠綠鮮嫩，份量都唔少，讚！抵食好食!…查看更多

從門口就見到廚房的廚窗掛滿了一隻隻肥美的水門雞，非常吸引。店子分內和外座位，內裏有單人吧台和一張大長枱。選擇種類多，有水門雞、沙律、紅咖喱、阿來、小食串燒、泰式船麵、飲品和甜品，還提供生酮飲食。點咗半隻水門雞（$108）配雞汁和湯，單單賣相已很有心思，吸引！雞完全沒有骨，啖啖肉，皮爽肉嫩，唔肥膩，正！再蘸些秘製雞醬，香辣惹味，更美味！仲配了些雞紅、雞腸和雞腎，三款都爽口美味，食得滿足！以優惠價追加香辣牛舌 (8片/$20），抵！好腍嫩，微辣鹹香，令人回味！叫咗碗豬泰式船麵 （$60），有豬肉丸、扎肉和豬肉碎，再加了些四季豆、芽菜、炸脆片，都幾豐富！河粉好滑，豬肉碎就略為肥咗啲，但豬肉丸和扎肉就彈牙，有些香料香，辣辣地，好美味！蝦頭膏炒雜菜 （$56）用料多變，有椰菜、西蘭花、椰菜花、甘荀、粟米芯、蘑菇等，以蝦頭膏爆炒，鹹香惹味，好有鑊氣。老公要咗杯凍泰式奶茶（+$8），佢話完全跟在泰國飲嘅奶茶味道相似，奶香茶濃，甜度適中。我就要杯熱生薑蜜 （+$8）夠晒辛辣，加上蜜糖的甜美，飲到火辣辣。…查看更多

今日唔想煮飯，所以就同老公落商場食。其實新都城都有好多食肆，但就真係唔多喺度食，心態係：都返都屋企附近，不如喺家食，省錢呀！但現在心態變了….唔想煮就唔煮，出街食吧！開放式的設計，門面一個個燈泡和紅光管，非常搶眼。內裏環境光猛，裝潢很有風格，地方亦整齊企理。設有有多張卡座，坐得舒適。有烤魚套餐、小炒套餐、川菜、干鍋、火爆菜式、啤酒菜式、冒菜、飲品、甜品等選擇。小炒套餐有四個價錢，我地兩個人就揀咗$288套餐，有開胃菜一款、經典川菜一款、家常靚湯一款及川式小炒一款，三餸一湯好滿足。開胃菜揀咗蒜泥白肉，面頭舖滿大量蒜泥和辣椒油，好火辣咁…白肉腍嫩油潤，肉味香，夾着鹹香的蒜泥同吃更滋味！家常靚湯好特別，真係未試過青瓜皮蛋湯  嘅組合。清新嘅青瓜片配甘香嘅皮蛋，原來都幾夾，飲落順口，唔錯！經典川菜要烏蠅糖醋魚，酸咪咪好開胃！魚大小中等，炸至金黃香脆，外脆卜卜，肉紮實不嚡口，全條沾上醬汁，還有三色椒、車厘茄和芝麻做配料，全部都得美味，連骨都全部食晒。川菜小炒就要粉絲蝦煲，先煲滾，熱辣辣最吸引！嘩! 足足有六隻鮮蝦，肉質爽嫩鮮味，得！還有大量粉絲墊底，吸收了蒜泥辣椒汁，鹹香惹味，又火辣辣，用來佐飯一流！另加白飯（$12），大大碗，用嚟配任何菜式都好岩。…查看更多

一入門就看到一塊「食飯最緊要開心」的螢光字牌。對！每次食飯都好開心。靠牆有是舒適的卡座，中間還有長枱和圓枱，座位不少，整齊企理，坐得舒適。多份餐牌，選擇不少，有二人套餐、晚餐、常餐、焗飯、咖哩飯、炒粉麵飯、小菜、蒸類、小食、飲品等。二人套餐（$138）有魚或雞揀，另選一樣小菜，配有油菜、白飯/例湯/飲品。揀咗古法蒸馬友，古法是用肉絲、冬菇絲和紅棗蒸，很特別！魚很新鮮，蒸得剛好，又滑又嫩，肉質鮮美。 另一小菜是三杯雞，啖啖肉，皮脆口，鹹香惹味。油菜（$0/跟餐）係灼生菜，很清爽鮮嫩，少油少鹽，清新健康！例湯（$0/跟餐）係蓮藕蘿蔔豬骨湯煲得夠火喉，蓮藕粉糯微爽，沒有味精，家的味道。乾鍋椰菜花腩片 （$78）熱烘烘上枱，鍋氣十足！用料十足，五花腩煎至焦香煸出油脂，吃落一點也不油膩；椰菜花及各配菜都煮很剛好，很爽口！味道香辣惹味，很有風味，推介！型男餐（$65）包一大碗豬扒鮑魚日本出前一丁、火腿奄列及大大個菠蘿油，份量十足，一定夠型男飽肚。豬扒煎得香口，肉腍嫩有肉汁；原隻鮑魚爽口；出前一丁有咬口，滿有麻油香，此組合一流！火腿奄列也不錯，香嫩的蛋皮包着不少火腿絲，豐富！暖烘烘的菠蘿油夾冰凍的牛油，很軟熟，滿口牛油香。凍檸檬蜜（+$3/跟餐）、熱檸檬蜜（+$0/跟餐)都足足有三至四大片檸檬，酸咪咪的檸檬加了甜美的菜蜜，既滋潤又解膩。…查看更多

逢假期都會跟這位朋友食飯一聚，今個假期都唔例外，朋友仲陪我整蛋糕兼晚餐，精彩的相聚日。我地今晚揀了一間拉麵店，日式的設計，橙紅嘅色調，感覺好warm。座位完是面牆的單人座，大家排排坐。有四款拉麵選擇，每款分普通版和特盛版，亦可追加配料，另有幾款小食。睇下menu 嘅簡介，好清晰的！我要赤蝦拉麵（$128）加糖心蛋（+$18）加菠菜（+$12），湯身橙紅濃厚，黏在直細麵，味道濃郁，濃而不鹹。直細麵烹調時間剛好，口感佳，啖啖鮮香蝦味，正！叉燒半肥瘦，腍嫩入味；三大隻赤蝦很厚身，經輕燒，半刺身狀，爽彈鮮味，優質!糖心蛋 流心狀佳，黏滑兼滿滿蛋香，加上烹調入味，稍稍鹹香，味道和口感都咁吸引。菠菜 翠綠，清爽腍嫩，唔油唔鹹，有益！朋友揀淡麗醬油拉麵 （$116/特盛），湯身透徹亮澤，喜歡它唔太鹹，亦唔黏稠，食落唔膩。揀咗粗身嘅手搓麵，人手搓出，多份用心，口味煙韌，有嚼勁。特盛配料腩肉叉燒、紫菜和糖心蛋，本身還配有京蔥、味荀和菠菜，好豐富。腩肉叉燒份量足，嫩肉伴着層脂肪，甘香油潤，肥美腍嫩，好得！另叫咗了一客煎餃子（$28），共有三隻，外皮煎至帶些金黃，肉饀拌入蔬菜，口感佳，味道美味。…查看更多

今晚要去鰂魚涌上堂，喺聽書之前先醫飽嗰肚。獨個兒的我當然找間cafe 靜一靜，抖一抖。咖啡店歐陸式設計，優雅時尚，燈光柔和，舒適寧靜，正是叉電的好地方。座位都幾多，有大枱、二人枱，仲有望住街景嘅吧枱，適合各人需要。QR code 下單，分別有Happy hour menu、Coffee、Feature Drinks、Chocolate、Tea、Salad、Sandwich 、Toast、Special、Burger、Pasta、Panini和Dessert。牛油果多士配沙律 （$80）睇落好fresh，岩晒我！軟熟嘅多士塗了鹹香醬料，放上牛油果件和車厘茄片，相間擺放，好靚！配搭清新，健康美味。旁邊有大量新鮮爽脆的雜沙律菜，加了些車厘茄、合桃和芝士片，再自己淋些檸檬橄欖油醬，酸咪咪，好開胃。咖啡胡桃蛋糕（$34）幾厚身，鬆軟乾身，並不油膩。入口微暖，淡淡咖啡味，亦有啲果仁香，甜度適中。Baileys Chocolate ($76)  拉花圖案清楚優美，陣陣朱古力香和酒香，令我陶醉。入口順滑，濃濃嘅朱古力中嚐到Baileys酒嘅香甜，例比好岩，太喜歡！如果大杯啲就更好。…查看更多

老公最喜歡火鍋，特別係食牛嘅火鍋，佢搵到間新開嘅手切牛火鍋店，一於陪佢去！店舖整齊企理，環境光鮮，有多張卡位座、長枱和大圓枱，大夥兒、三五知己或倆口子都合適。餐牌好清晰，主要有三款潮汕手切牛肉火鍋套餐選擇，150分鐘任食放題，不同時段不同收費。另有各式配料、手工小食、特色飲品和雪糕等，好豐富！我地揀咗精選海鮮拼盤+潮汕手切牛肉放題（$338/正價時段）。先上湯底，六款中揀了潮汕牛骨湯，牛骨好香，湯頭鮮甜，用來配鮮牛肉，更能嚐到牛的鮮味！先上一個迷你轉盤，放了各款的手切牛，附有部位名和所需時間，很精美，有心思！全是人手即時切，共五款，包括五花趾、吊龍、匙柄、雪花和牛胸油，每款都好紅潤亮澤，夾雜着油花，真係好新鮮！我地都最喜歡雪花，牛味極濃，又鮮嫩，優質！精選海鮮拼盤有龍躉、鮑魚、桶蠔、海蝦和沙白，五款都極新鮮，龍躉嫩滑；鮑魚鮮爽；桶蠔肥美；海蝦爽牙和沙白鮮甜，全部都喜歡！另外仲有很好火鍋配料 可下單點選，點了鮮味彈牙的手工蟹籽蝦滑、鮮甜的脆魚腩、爽脆的脆肉鯇魚片，三款海鮮都得！還試了美國特級牛板腱，薄身紅潤，牛味濃，肉質嫩。自助區 都有很多火鍋配料任選任食，揀了雜丸、魚腐、花雕醉雞和黃喉，各款丸都彈牙，特別是牛丸，很多汁，推介！還有很少見的黃喉，竟然這裏都有，口感非常爽脆。另取了一盆蔬菜，有南瓜、蓮藕、粟米、准山、海帶、支竹、菜等，選擇很多，不錯！亦下單點了幾款小食，潮汕南乳炸雞翼即點即炸，非常香口，肉嫩兼啖啖肉汁，鹹香美味。避風塘粟米粒粒飽滿，香辣惹味。手工咸蛋黃炸魚皮脆卜卜，沾滿咸蛋黃醬，鹹香惹味。自助區除了有火鍋配料，仲有幾款熟食、飲品和甜品，豐富得很！有大座飲品雪櫃，包括有多款汽水、茶、台灣、罐裝果汁、紙包飲品、自家製奶茶、自家製茶飲等，另一邊還有兩款熱飲任君選擇。拎咗一支自家製白桃烏龍茶和熱洛神花茶，可有助消滯解膩。甜品有雪糕、冰條、雪糕批等，冰凍甜美，作為火鍋後甜品就最適合。…查看更多

身邊大部分朋友都去過啟德體育園，但我還未喎……就趁今日同老公一齊放假，要到此一遊，仲要去晒三個零售館食玩買，yeah! 真係好靚的建築物，讚！三個零售館都有很多食肆選擇，老公就俾這間疏乎里班戟吸引了。餐廳環境舒適優雅，闊落嘅卡座，柔和的燈光，好舒服寫意。平日有午餐，另有一些單點菜式，如全日食、漢堡、沙律、薄餅、薯條、甜品、飲品等。老公想食漢堡，單點了一份安格斯牛肉芝士漢堡配波士頓龍蝦及檸檬牛油汁（$228），賣相很吸引！巨型的漢堡夾着一塊厚厚嘅安格斯牛肉、半溶嘅芝士、清新嘅蕃茄片和生菜，配上千島醬和秘製醬料，配搭美味！安格斯肉鮮嫩多汁，煎得香口，帶點焦香，亦有濃郁嘅肉香，優質！波士頓龍蝦彈牙鮮嫩，還有不少甘香嘅龍蝦膏，蘸些檸檬牛油汁，不錯！我就點了一份午餐，包餐湯/是日沙律、主菜、甜品和餐飲，滿足！是日沙律（$0/跟餐）很新鮮清新，有沙律菜、羽衣甘藍、青瓜和車厘茄，仲配了甜美多汁嘅哈蜜瓜。奇尊蝦肉香草蕃茄汁手工闊麵（$138）面排了六大隻蝦仁，賣相好吸睛。手工製作的闊麵口感彈牙，沾滿蕃茄汁，還有鮮活嘅番茄肉，啖啖都滿有濃郁的番茄香。蝦肉鮮嫩彈牙，搭配上香草和辣粉，香辣惹味。甜品係窩夫配雪糕（$0/跟餐），窩夫外香脆內鬆軟，配上一球冰凍香甜嘅雲尼拿雪糕，簡單而美味嘅配搭，作為飯後甜品好滿足！Mocha (+$10 /跟餐）拉花圖案好清晰，無粗泡，靚！陣陣咖啡香，入口溫暖細滑，咖啡和可可互相融合，滿意！百香果烏龍茶（$42）足足有兩杯。清新可口，甘香嘅烏龍茶配上酸甜百香果的酸甜。茶香濃郁，百香果味淡淡，可解渴去膩！Matcha Cream Pancake （$122）的確重量級，兩大塊厚班戟震動着，好輕盈呀！頂頭塗滿抹茶忌廉醬，加了些脆米，旁邊還伴着Q彈嘅抹茶蕨餅、甜美嘅紅豆和新鮮嘅雜莓，賣相一流！班戟好鬆軟，仲好有蛋香，老公超讚。最驚喜係中間還流出抹茶醬，加埋面頭嘅厚厚嘅抹茶忌廉，全件都充滿抹茶嘅甘香，仲有回甘，抹茶迷必滿意，大讚！食飽飽之後，我哋仲去咗碌保齡，你哋睇下嗰賽果，我….唉….雖然落後很多，但今日食得開心，玩得開心，滿足的一天。…查看更多

今日大家本來約去大澳遊，但呢個勞動節實在太多訪港旅客，真係驚難入難出，都係留喺屋企hea ，夜晚先一齊出去食返餐。有人帶路，今晚去食印度菜。店子裝潢有特色，內有一些民族掛畫、吊燈，仲有一個巨大印度熊仔，好有趣！MENU分得好清楚，共有五款咖喱口味，包括香料咖哩、奶油咖喱、黑扁豆咖哩、腰果咖哩和菠菜咖喱，各有特色。另外仲有特色烤餅、特色小食、印度香料飯和飲品。每款咖喱套餐均配白飯和罐裝或紙包飲品，加$15就可以轉烤餅或蒜蓉包，我哋揀了三款唔同口味和一款特色烤餅。先上胡椒脆餅 ($28) 很薄身，整得極之脆身，咬下去時卜卜聲，帶點香辣的胡椒味，入口無油膩感，單單食它的原味已很美味!香料咖哩牛舌配蒜蓉烤餅 ($83+$15)有唔少牛舌，仲大大塊同厚切，讚！蒜蓉烤餅表面都沾上蒜粒，邊位烤至帶少少焦燶，很香！嚐到淡淡的蒜香味，口感柔韌，好吃！牛舌燒得好靚，味道鹹香，口感爽嫩，伴上獨特的香料咖哩更美味，當然要同埋烤餅一齊食，最佳拍擋。腰果咖哩魚柳配奶油烤餅($83+$15)腰果咖喱滿載果仁香和奶香，質地濃厚，有磨至幼細的腰果粒，味道香辣中有果仁香，非常好味，推介俾鍾意果仁嘅人。魚件好有質素，一大件，好厚肉。外金黃內潔白，肉質好嫩滑，以咖喱烹調，香辣吸引。奶油烤餅好薄身，柔韌有麥香，淋上咖喱醬汁，夾件魚柳，正！黑豆燴羊肉咖哩配蒜蓉烤餅($78+$15) 羊肉份量多，啖啖肉，整得好嫩，用料優質！不錯。揀了配黑豆咖喱，以大量原粒嘅黑豆製作，相當特別！黑豆粉綿，辣度就中等，伴在烤餅上，再加埋羊肉，真係好飽肚，滿足！無糖茶、甘蔗椰汁馬蹄爽、可樂（$0/跟餐）冰涼透心，邊飲邊食香辣咖哩，爽呀！小店真係令我喜出望外，數咗幾點：1）上枱擺得有心思；2）用料優質；3）各款咖哩各有特色；4）好足料：每籃烤餅和主菜都有好多件；5）抵食好食，定價親民。今晚大滿足！…查看更多

趁假期最後一日，就今晚同班朋友餐聚，有朋友帶咗我地去港島食好嘢，係一間特色嘅中菜店。店子整齊企理，環境光猛，座位唔少。適合三五知已或大夥兒聚餐。有很多選擇，分了牛、豬、雞、魚、海鮮類、素類、菜類、豆腐、粉麵飯、小食、鍋物、生滾湯等。我哋就揀咗四款店小二特別推介。薑蔥爆鯇魚泡（$198）熱辣辣上枱，喳喳聲，好香！全煲都係鯇魚泡，份量好足，難得！當中有爽的，也有滑的，很鮮香，用大量薑蔥炮製，整得入味，鹹香惹味，食到我津津有味。萬字醬油雞 （$208/半隻）註明用三種醬油炮製，有日本萬字醬油、台灣醬油膏和李錦記甜豉油，即叫即浸，下功夫之作！半隻雞嘅份量唔少，仲好有肉，皮爽肉嫩，配搭三種醬油，味道果然獨特，還配了一些爽口的菇菌，同樣整得入味。糟鹵蒸咸鮮馬友（$338）註明係來自台灣，有保証！魚起飛狀，賣相很吸引，並以糟鹵蒸製，鮮嫩嘅魚肉啖啖酒香，當相特別，再加了些金華火腿絲，添鹹香之餘又可除魚腥，仲更矜貴，好好味，推介！連墊魚底嘅蔥都有酒香，喜歡！避風塘茄子（$128）件件金黃，外脆內嫩，香口惹味，配啤酒一流！茄子雖係吸油之物，但食落完全無油淋淋，做得好！…查看更多

今日係拍拖週年紀念，我地一早計劃咗離島半日遊，可惜….下雨，但也無咗我們出發嘅決心，就向長洲去。老公一落船就話要醫肚，本打算掃街，食大魚丸、糯米糍、平安包….但被多間海鮮店極力推介$188/2款、$278/3款…仲送湯和油菜，抵！飯店整齊企理，座位唔少，坐外面仲可望住海，幾舒適寫意。超多選擇，有多種海鮮外，仲有肉類、蔬菜可選，而粉麵飯就雖單點。馬上送來魚肚粟米羹 ($0)，十分足料，魚肚鮮美，粟米爽口多汁，順滑可口，不錯！白灼生菜 ($0) 新鮮爽嫩，淋上熟油，賣相亮麗。老公愛肉，點了蒜蓉牛仔骨 ($$278/3餸)，好夠鑊氣，舖上炸蒜碎，蒜味濃郁，香氣撲鼻，肉嫩入味，大大碟，好食又抵食！我一揀就揀果皮蒸班頭腩  ($$278/3餸)，每件都份量十足，好厚肉。肉質雪白，嫩滑鮮美，魚皮黏滑富膠質，搭配甘香的果皮，最佳拍擋。再點推介的黃金蝦  ($$278/3餸)，外層沾上香濃的鹹蛋黃，鹹香可口，蝦仁啖啖肉，連殼都可食，口感味道層次豐富。…查看更多

今日去鰂魚涌上堂，上堂前當然要醫肚。行到太古坊，見到間素食cafe，環境清靜，地方光鮮，坐得舒適，感覺輕鬆自在，自助形式，簡單方便。菜式很有特色，有沙律碗、酸麵團麵包卷、漢堡、小食、甜品、飲品等等….點了Sourdough Flatbread：Banyan（$68），以柔韌的酸種薄面餅捲著香口嘅烤天貝、腍嫩嘅茄子、清新嘅番茄片、清爽嘅紫椰菜絲、烤大蒜、幼滑嘅鷹嘴豆泥，口感豐富，再配酸香嘅安巴醬，配搭有益美味。特別一提，餐紙上印了吃餅卷嘅方法，真貼心！升級套餐（+$50）有湯和飲品。今日係Pumpkin Soup，熱度十足，質感濃稠綿滑，加了些香草和蔥花，味道濃郁甜美，還加了些脆餅，浸至半腍，口感吸引。Turmeric Latte又稱「黃金牛奶」，據說有止痛、消炎、益肝、消脂、護膚等功效。味道香，口感滑，加了少許黑胡椒，這組合具有強效抗炎作用，完美嘅配搭，好好喝！…查看更多

今日去完灣仔素食展就在灣仔搵食。要悠閒就當然要去cafe。行下行下，見到間白色嘅咖啡店，感覺好舒服呀！環境光鮮企理，原來係間新店。燈光柔和，薄荷綠和白色嘅配搭，感覺自然明亮，有數張二人枱，坐得舒適。自選滋味套餐（$288）可有前菜、薄餅/意麵和甜品各一。前菜：和風凱撒沙律 賣相一流！沙律菜非常新鮮清爽，配上香脆嘅多士粒、鹹香嘅芝士碎、清新嘅苜宿芽，再灑了櫻花蝦，添上日式風味，加埋適量嘅凱撒沙律醬，味道美味！熟火腿薄餅 同樣賣相吸引，餅底脆卜卜，正！配了香草番茄醬、爽口嘅雜菌、鹹香嘅芝士、柔軟香嫩嘅熟火腿，一口咬落去….滿足！甜品：蘋果批 批底濕潤，蘋果片腍嫩，味道香甜。…查看更多