Amethystcom的個人專頁

今日冬至，同同事們諗住開開心心食個一人一鍋冬至lunch，呢D大時大節，食晏時間有限，同事已經好醒目預先book定位，仲whatsapp落埋單，一心諗住坐低就有用食。我地一行11人準時到達，咁侍應就叫我地撈定D醬料先啦，隔左一陣有個侍應走黎同我地講冇咁多鍋，話要改做單叫，咁ok啦，轉頭又有另一個侍應話我地已經落晒單，只係個鍋鍋由一人前改做兩個大鴛鴦鍋，咁我地都話ok啦。再隔多陣，又再有個侍應好似好驚訝咁話我地叫既野食，係唔包醬汁，但好慷慨咁話今次算啦。再好笑既係，佢話已經冇晒其他野飲，焗我地要飲果D 一 jar既菊花茶，而詭異嘅事件係呢刻要出現，侍應見我地斟完有剩，佢一句都冇問就拎走咗， 竟然係拎走斟俾隔離枱客人，btw，隔離枱遲過我地到，但有一人前嘅鍋用。補充番少少資料，間野係12:00開門，但未一點就話冇晒其他野飲，我估佢地做完個午市都應該係直接收爐。接住就係，我地由12:40坐底等到13:15，個鍋終於出現，不過凈係個鍋only，唔包括野食，侍應話D肉切梗，俾多5分鐘佢，5分鐘後，再叫我地俾多15分鐘佢，話依家多人，咁呢刻多人，關我地咩事？我地坐低嘅時候得兩枱客咋喎，同埋個幾鐘前個人未到期已經落咗單。等到13:30，任何食物都係無出現到，需知道你俾我嘅野係生嘅，我都仲要滾熟佢黎食，2點又要番到公司真係連煲吞我都唔夠時間。我地唯有轉地方，光速食個快飯，所以，呢間野好唔好食我就真係唔知，因為我地冇一個見過D食物，但服務態度嘅差就真切地感受過。相信要心存食法國菜嘅時間先可以享用到呢個火鍋。…查看更多

同朋友係灣仔行完街，順便係附近食埋Dinner，見到呢間好似唔錯，咁岩有位就入咗去食。暗暗地，懷舊裝潢嘅餐廳，入到去多數都係外籍客人，飲野，吹水，好chill咁。剛好安排咗係近窗比較靜嘅位置，不過可能店比較細同位與位之間比較近，所以都比較嘈。同朋友點咗二人餐：Fresh Lemonade酸酸地，非常清新，飲完之後覺得好開胃。Scallops Pasta帶子煎得岩岩好，白酒汁濃而不膩，非常creamy，份量岩岩好。Beef Tenderloin叫咗三成熟，個樣煎得好靚，不過肉質有少少韌，冇乜牛味。炸薯條夠脆。La Poulie法式可麗餅配開心果雪糕，餅皮煙煙靭靭，加埋蜜糖同烤過嘅杏仁片，好味。Le Defi焦糖雪糕加香蕉再加上海量嘅咸焦糖，大滿足。下次應該凈係黎食可麗餅。😆…查看更多

週末約咗朋友食lunch，揀咗呢間都幾多好評嘅cafe試下。歐美木系裝潢，帶點七，八十年代懷舊風格。樓底夠高，空間感強，雖然去到中午，有自然光入店但又唔會覺得曬，感覺舒服，好適合朋友聚餐或者情侶約會。北海道帶子、美國露筍配波菜忌廉汁燴意大利飯 $158帶子煎香兩邊而入面岩岩好熟，露筍夠嫩冇渣，波菜忌廉汁夠濃郁，岩岩好包住晒D飯而唔過多，意大利利飯亦軟硬適中，份量算多。Classic Breakfast $128牛角包完全係主角，非常之鬆脆，唔會好油，炒蛋應該加咗cream炒，非常濕潤嫩滑，其他腸、煙肉、炒雜菌、茄汁豆，正常野。香燒鴨胸伴咸蛋黃芝士汁燴扁意粉 $148鴨胸有少少偏騷，肉質夠淋，意粉加咸蛋黃芝士汁夠乾身唔會太多汁太漏，份量適中。…查看更多

因為係附近有野整但又未夠鐘，經過APM見仲有時間就諗住揀間飲杯野。之前飲過另一間Blooms覺得ok，所以見到APM有就揀佢啦。Blooms selection $54問過店員嘅意見，就揀咗呢杯Blooms selection，微酸帶甘香，質地比較薄身，整體ok。服務方面，店員都幾nice，講解亦清晰。坐位同店鋪係隔開咗嘅，基本上9成人唔係幫襯嘅客人，等咗一陣，好彩地有人離開先有位，呢樣就唔及其他分店嘅安排。今次無留意呢點，下次真係就咁買走先會再幫襯。…查看更多

平日下午約咗朋友係觀塘見面，選擇咗呢間歐美工業風嘅cafe chill下。因為平日下午3，4點嘅時候客人唔算多，所以一去到已經可以安排入坐。店面非常光鮮，裝潢為歐美工業風，地方闊落，樓底高，牆上有不同嘅graffiti增強店內嘅藝術感。店內有雜誌架，放有藝術方面嘅單張同雜誌以供客人翻閱。因為係Tea time時間，同朋友就點兩個野飲同一個小食。Hawaiian $58平時飲開檸檬啡多，係menu見到呢個菠蘿汁既就試下，原來個味道都好夾，菠蘿汁加青檸加濃縮咖啡，飲落甜甜地好清新，同時又飲到咖啡帶有嘅甘味，非常之適合夏天嘅飲品。Pour Over Coffee - Ethiopia $78喜歡飲咖啡嘅人當然就唔會放過飲手沖，因為比較喜歡帶有果味嘅咖啡，所以揀咗呢款Ethiopia豆，乾香有橙花香味，熱飲嘅時候有少少甘香果實味，但攤涼之後d微酸嘅果香味就出番黎，整體唔錯。Hunter Fries $48識食梗係食粗切嘅薯條，外表脆，入面軟，份量多，可能落鹽重手咗，少少偏鹹，但整體味道唔錯。服務方面，店員都幾Nice同有禮貌。…查看更多

飲過好多間大大小小嘅涼茶舖，覺得養和堂嘅涼茶藥材味比較濃，而且唔會太甜。因為個人係濕疹底，一轉天氣食錯野就瀨野，每次初初起濕疹嘅時候，都會買呢間嘅龜苓茶飲，太約飲4，5日就會有好轉，應該真係去到個人體內嘅濕毒，咁當然人人嘅體質唔同，所以都要睇番自己情況決定飲咩涼茶啦。因為keep住一排就會買唔同嘅涼茶黎飲下，清下熱，去下濕咁，所以都會買定套票，咁就會抵好多。服務方面，呢間d姐姐都好Nice好有禮貌。…查看更多

同朋友行開APM，咁就順路食埋個dinner，朋友想食東南亞菜，見唔洗等位，就揀咗呢間試。同朋友點咗三款菜式：泰式青木瓜沙律配炭燒豬肉正常甜甜酸酸嘅青木瓜沙律，炭燒豬肉偏乾身，肉質偏硬。農夫包配星洲咖喱軟殼蟹超多汁，超濃味，軟殼蟹嘅炸漿完整地吸晒d汁。香葉肉碎炒飯個飯比較油，少辣，味濃。整餐飯既野都偏濃味同鹹，食完之後，超口渴。環境方面，都舒服嘅，唔會坐到好逼咁，位與位之間都有充足嘅空間。服務方面，個人覺得麻麻地，點餐嘅時候，侍應表現得冇乜耐性，好似阻住佢收工咁。…查看更多

朋友係附近返工約食lunch，見有位就入咗去食。地方寬敞，燈光比較暗。QR code點餐，有會員制儲分，要另外download app， 積分可以換禮物或者野食/飲。一行二人，被安排咗係四人卡位，坐得幾舒服。點咗兩個午餐：套餐包湯加一款前菜(可再添) ，有芽菜/薯仔絲/醃蘿蔔/泡菜揀，同朋友就揀咗芽菜同醃蘿蔔，個湯就係牛肉湯黎嘅，清清地，有少少牛肉味。泡菜豬肉蛋包飯 $51肉係薄切五花肉，肉質好硬，好似食梗豬肉乾咁，勁多泡菜，勁多泡菜嘅汁，所以除咗泡菜味，食唔到肉有咩味，蛋包飯嘅飯底撈咗茄汁，不過味道唔係好勁，係淡淡嘅茄汁酸味，蛋皮偏薄，蛋面keep到少少未完熟嘅蛋汁，配帶麻醬嘅沙律菜，整體食物分量多，味道一般。特級泡菜芝士五花肉韓式拌飯 $62泡菜汁勁多，非常濃味、有點over，蓋過咗芝士味，五花肉偏硬，整體食物分量多，但肉份量偏少。用積分換嘅青檸梳打，淡淡嘅青檸味，唔甜。…查看更多

同朋友行開街想食泰國野，咁路經就見到呢間。因為平日食晏時間比較多人，無得拎飛又唔會 mark 低人數，只可以企係出面排住等，呢方面就有待改善啦，大約等咗 15分鐘左右就被安排入座。店內前半部份近門口有 LUNCH BOX、乾貨、零食賣，後半部份就係餐廳，室內樓底高，D 位排得唔密，所以都幾寬敞舒服既。服務方面就真心麻麻地，好似 KEEP 住唔多望到你既情況，其實我都只係想拎張 QR CODE 落單遮。點餐方面，QR CODE 自己入單，四個女仔叫三款野食 Share 食，份量岩岩好。泰式烤豬肉溫泉蛋鍋飯置頂既炸豬皮要快手食咗先，淋咗就會韌，份量夠，材料都多既，味道ok。泰式金不換炒金邊粉多汁，味濃，味道正常。水門雞配湯河雞肉夠滑夠淋，湯河嘅牛肉湯底幾夠味，但河粉份量就偏少。…查看更多

放假同朋友行經，見到一間隱藏係近工廠區的小小咖啡店，店鋪外觀簡約，令人有種好想入去chill下。門面簡潔店內燈光柔和加埋自然光岩岩好。有少少裝飾，感覺舒服。非常友善嘅店主，有細心講解手沖豆嘅選擇。想Chill梗係飲手沖啦，店主推介咗兩款手沖豆。Colombia Diego Bermudez 乾香超甜軟糖味，濕香就無咗果陣超甜味，飲落果香味相對無咁出，不過都仲帶有少少紅色果實嘅果味，如果好鍾意果味嘅，就會覺得一般。Colombia El Paraiso Rosete黑色果實甜香之選，乾香唔算好出，有茶葉嘅香味，濕香聞到淡淡桃茶香味，飲落都比較似桃茶，灘涼咗飲，再好飲d。好靚嘅分享壺同杯。…查看更多

約咗朋友食dinner，見到呢間都幾多好評，地點就腳，所以就經openrice book咗呢間。藍色系餐廳，店內燈光柔和，每枱之間都有充足空間，唔會好逼，服務應很好，好適合朋友聚會或者情侶用餐。巴馬風乾火腿無花果堅果沙津配和風柚子汁 $108少少鹹嘅火腿同完熟嘅無花果非常夾，加埋和風柚子汁，令人胃口大開，即刻ready好食下一度菜，推介之選。意式鮮茄露筍蟹肉意大利飯 $138睇得到嘅蟹肉加豐厚嘅醬汁，份量適中，因為加有蕃茄帶少少酸，所以唔會食完好滯。安格斯至尊薄餅 $188餅皮厚咗少少，口感比較韌，面料都幾豐富，牛係肉碎狀，如果係肉粒，口感會較好。焗開心果脆皮羊架配番薯條 $348個面舖開心果碎，但因為撈埋太多鹽，所以太鹹蓋過咗開心果嘅堅果香味，羊嘅肉質好淋，無乜羶味，放涼咗都無影響口感，而配襯嘅藩薯條，如果可以切粗d，會再好味d。…查看更多

一直都想去呢間飲茶，屋企人又鍾意飲茶，所以就揀呢間係悅來酒店30樓嘅中菜廳。被安排坐係角落靠窗位置，境觀非常開揚，雖然隔離係醫院，不過成30樓，高過晒晒附近嘅樓，所以視平線睇係好ok嘅。因為人手唔夠，客人又多，想俾點餐紙都要d時間。墨西哥雞包 $46雞批味嘅包，有好多洋蔥係入面，雞肉夠淋，最重要係唔太鹹，ok。椒鹽九肚魚 $128 外脆內軟，d肉無炸到好乾，岩岩熟晒，夠熱，所以唔腥，非常好。泡菜煎薄罉 $50少少辣，正常野。紅棗桃膠燉雪燕 $50唔記得咗叫起，第一樣出現，食完其他野先食已經凍晒，好多桃膠同雪燕，唔算太甜，味道唔錯。蜜汁叉燒腸粉 $54呢個係唔會再食選項，個皮好厚好粉，完全唔滑，叉燒麻麻地，肉質好似煲湯肉咁，鞋鞋地又散散地。…查看更多

呢間店都已經開咗一段時間，咁岩經過就諗住買兩件cake送咖啡啦，揀咗兩個口味試。伯爵牛奶朱古力 $48頂部係朱古力鏡面加牛奶朱古力慕絲內餡、伯爵茶軟蛋糕包住伯爵茶甘納許、底係伯爵茶達克瓦茲。甜度適中，食得出伯爵茶味，朱古力同伯爵茶都幾夾。抹茶歌劇院 $50最上抹茶馬卡龍、抹茶朱古力、中間間住抹茶甘納許＋抹茶軟蛋糕＋抹茶慕絲、底係牛奶朱古力脆脆同抹茶達克瓦茲。抹茶好濃，但就偏甜，如果可以減少少甜度就好，咁可以再突出抹茶本身嘅回甘。…查看更多

見到食評OK，所以放假行開呢頭就BOOK位試下啦，早到左少少，但因為用餐有分時段，所以夠鐘先被安排入座，安排咗坐係側邊靜少少嘅卡位。可能因為假期，客人比較多，但人手唔夠，等咗陣先有人理我地。兩個人每人各揀咗一款餐：泰式豬手飯 $65 豬手飯份量係適中，但質未夠淋，個豬皮偏鹹但d肉就未夠入味，而整體個味道比較似中式鹵肉。豬頸肉撈檬 $60豬頸肉撈檬份量係適中，味道ok夠味但肉質偏硬同乾身。隨餐免費揀泰茶，味道ok。…查看更多

難得放假經開西灣河，就梗係要去太安樓買下小食食下啦，因為唔算太肚餓，今次就凈係揀咗買蛋記嘅芝士雞蛋仔食，呢間舖頭只係賣雞蛋仔同格仔餅兩種，另外就有個雪櫃放野飲。製作時中間D餡用既係芝士粉，雖然見到灑咗好多落去，可以用密舖平面黎形容，但唔知點解食落就冇乜芝士味，我諗如果能夠用芝士粒代替芝士粉，咁味道應該可以好D同出D，不過呢樣都應該關成本事，而口感就唔錯嘅，做到外脆內軟，唔會得個外殼，又唔會滿到實咗面包咁。…查看更多