GoldBobo的個人專頁

從來都唔會寫食評，因為覺得間餐廳唔好就可以唔使再去，講都慳番。但係今次真係忍唔住要寫出嚟警世。首先，坐位已經夠迫，枱同枱之間一個人都未必行得過，某啲枱仲係坐嘅旁邊已經有人，好似搭枱咁。但係地方細又想做多啲生意，呢個都明白嘅，始終香港係地少人多嘛。然後，啲嘢食有少少遲嚟都同樣可以理解同明白，始終餐廳坐滿人，好正常，廚房煮都要時間。但之後就真係嚟料啦，我地份餐上咗枱唔夠15分鐘，就俾個經過嘅黑口黑面嘅黑衫女經理問都唔問衝過嚟收走我份餐。佢拎走完我都仲呆咗喺度反應唔到。大佬呀，翻工食晏都有一個鐘，我地食15分鐘都無就俾人趕住走，你仲要一個我得罪你嘅樣，我就算食M記都唔會咁樣俾人搶走個餐啦吓話！？點解我覺得呢個女人係經理？除咗佢著住黑色衫無制服，係因為我成餐飯都聽到佢不斷喺度大叫同呼喝其他員工。咁樣真係令到成間餐廳氣氛好差。總結係正常食飯時間俾我唔到，正常嘅餐廳環境都俾我唔到，你地午市仲要學高檔餐廳收加一，你地真係仲好意思收？有人想去食餐不受尊重嘅飯就去啦，我同我全部朋友都一定唔會再嚟，真係第一次食Lunch可以咁激氣！！…查看更多