史馬田's Profile

除左傳統糖水，有時總會想食非傳統野，今次試左廟街呢間。芒果雪糕西米露，西米露西米夠多，椰汁都好夠味，唔會係椰水。加舊雪糕多個味，味道頂多係D字頭水準，是正常味道。朱古力雪糕豆腐花，豆腐花偏向硬身，豆味都麻麻地，唔多OK。雪糕同上面一樣，都係正常味道。Hungry Bird，係店方推介，其實只係咩都有，整兜野只有一個感覺，就係大件夾抵食，食完飯黎食真係攪唔掂，味道就都係咁啦。這類型既糖水，味道真係唔會相差得好遠，都唔會有太大驚喜，其實一般水準都係正正常常，仲想點呢！！！…Read More

耐唔耐都會幫襯這裡，都係貪水準夠穩定，再次幫襯，依然保持水準。碎吞拿魚飯，係我首選，今次魚偏向肥，魚味就普通，不過依舊份量十足，都係食得滿意，定食跟個蛋同湯，蛋其實都係高班野，蛋味不錯，都好好食。個湯就麻麻地。未食過燒魚，想食非魚生類，今次試下個燒鯖魚定食，魚燒得剛好，唔會太老，係有少少驚喜。可以唔配飯配烏冬，幼身烏冬，不過煮得太腍，影響咬口。吞拿魚水準依然唔錯，係值得繼續幫襯既地方。…Read More

晚飯時間，人在蘇豪區，沒有西餐同日餐的意慾，蕩下蕩下見到呢到食印菜，又黎試試。沙嗲，肉燒得乾身，對我黎講都算好乾下，不過醬汁出色，有幾香花生味，都幾唔錯。燒原條魷魚，魷魚軟腍腍，係新鮮野，正常既爽口，配上甜甜地既醬汁黎燒，係幾好食。咖哩軟殼蟹，稀稀地既咖哩汁，不過食落係兩回事，唔係水水地果d冒充貨，除左咖哩味，仲有其他香料味，個味幾特別。軟殼蟹都唔錯，係東南亞餐廳食炸野普遍係有信心既。薄餅要黎配咖喱，夠鬆軟夠熱，好食。未係飲酒既時候，要杯芒果汁，無咩芒果味同幾甜下，下次都係飲返啤酒好了。食物都幾好食，特別係個燒魷魚。…Read More

係一個繁忙日子既late lunch，見過左繁忙時間，就走黎一風堂碰碰運氣，終於唔洗等位，可以試下這裡的拉麵。兩個人，要了一個豬骨一個wasabi加多個小食。豬骨，湯底幾濃郁，很不錯。塊叉燒薄薄一片，半肥瘦，幾好食，糖心蛋係真糖心，麵係幼麵條，整理碗麵都好唔錯。另一款wasabi味，配料跟豬骨一樣，係湯底唔同，多份wasabi味，淡淡既wasabi，唔會太過火，比剩豬骨多份層次，都好食。小食要左紫菜墨魚鬚，唔太油，無一般炸墨魚鬚香口，不過墨魚鬚夠軟身，都算係咁。這裡都幾好食。…Read More

突然好想食玉子，想起的只有一遊同千兩，千兩其實都係一時時好味，都係去返水準穩定一點既一遊。食過數款玉子，最好的係蟹肉同海膽，今次食蟹肉玉子，蛋燒得一層層，亦燒到未熟透既感覺，水準依舊，都係好食，蟹肉係中間薄薄一層，份量唔多，唔係舊舊都有。這裡的吉列豬扒都做得唔錯，豬扒鬆化度係正常水準，不過邊位既肥就舊舊都有，充滿脂香，都好唔錯。是日都要左鰻魚石鍋飯，個鍋唔係幾夠熱，唔兜一大段時間都出唔到丁點兒飯焦。鰻魚就少之有少，只可以話係埋尾頂飽個肚。其實這裡既銀杏都係好唔錯，用黎送酒真係唔少得。這裡幾唔錯，特別係厚燒玉子。…Read More

沒有太大期望，係見新開張，又黎試試，水準都幾唔錯，又分享下。小食要左幾款，少不了的當然係沙爹，要左豬串同雞串，兩款都燒得剛好，唔會d肉乾哂，醃味就普通，唔係幾夠味。至於個靈魂沙爹汁，味道就調得麻麻，不過唔係太花生，都好過唔少連鎖泰式店。蝦餅，唔係好膠，食到有蝦肉，個皮唔會好油，偏向剛身，係有誠意的蝦餅。仲有小食係炸雞翼，好街頭小食檔既感覺，不過無咩調味，係三款小食中最唔ok的一款。到主打，要左泰式海南雞，雞肉爽滑，有點香芽味，想不到地區店有呢個水準，係好野。爐魚，個湯底係唔錯，不過條魚本身唔多ok，d肉好實下，影響哂成碟魚既味道，仲要係愈煮愈出事。仲有要左既係青咖哩豬扒，青咖哩睇落幾水，只有微微既咖哩味，食落都好一般，豬扒反而唔錯，挺鬆化，另叫左個蒜蓉飽用黎配咖哩，應該係即烘，熱辣辣，蒜蓉略為少了點，多一點應該會更好。最後要左個金邊粉，味道唔太突出，正常金邊粉味道，係飽肚之選。晚飯有甜品送，味道都不過不失。四個人，每人百三蚊，以地區計，水準都唔錯既泰國野。…Read More

上哂頭版同天書，攪到變做人龍店，雖然評價參差，不過是日早食午飯，唔洗排隊，都黎試下。先講腸粉，個招牌第一腸好台灣魯肉飯既感覺，可能係肉碎既關係吧，個皮厚薄適中，未算係滑，可以講係有點粉，不過整體個腸粉都係正常水準，始終沒有我腸粉既首選堂記驚豔。另一款係豬潤腸，除了餡料，跟第一腸沒有太大分別吧。當飯食，要左個排骨飯同豬骨粥。掛骨飯真係好唔錯，排骨配上蒜蓉黎蒸，蒜味淡淡來得正好，唔會只係食到蒜味，整體個味道剛好，可能個人都幾鐘意食蒸飯，好多時蒸飯都係一路蒸住過哂火，呢到無呢個問題，係好食的排骨飯。另外豬骨粥，粥底幾甜，料說適中，正路野。十幾廿蚊，正正常常，最好味既係個排骨飯，係下午茶/小食/宵夜既好地方，當飯食就真係唔多飽。…Read More

係執相既過程發現其實近個月食左呢到幾次，就一次過分享下。榛子脆餅，係我覺得最好食既一款。脆餅質地濕潤，食落軟錦錦，很不錯呢。朱古力味濃郁，帶有輕盈榛子味，味道真的很吸引。見之前幾個食評都係食拿破崙同waffle，其實個脆餅都係好野。香蕉拿破崙，脆皮夠鬆化，吉士夠香，吉士份量都唔少，都幾好味，其實水準唔差過名牌餅店。Waffle係呢到名物，只係覺得唔係太乾唔係太硬，坦白講真係正正常常。不過見識少，真係唔知waffle可以有幾特別。Cream Brulee，面頭焦糖唔係太重手，重手d應該會更好。奶味濃郁了點，蓋過本身既蛋味，不過都係夠哂滑溜，都算係咁樣，整體不過不失的Cream Brulee。心太軟，切開沒有澎湃既朱古力，不過效果都ok，濃郁既朱古力配上焗得剛好既外層，做得都唔錯的心太軟。拖肥布甸雪糕，都幾甜幾溜下，唔係講笑，食兩啖已經夠皮。店仲有All Day Breakfast 食，水準真係一般，正常蛋，正常腸，正常茄汁蛋，沒有太多賣弄，正正常常。咖啡反而不錯，都飲得過。這裡都係一間水準不錯的西式甜品店。…Read More

想來點輕食，又試試GREAT入面的CAFE。先食係意大利雲吞，不過散散地，食落亦無咩味，南瓜偏向硬身，成碟都唔係咁ok。隔離超級市場的意大利雲吞應該水準更好。跟住係pizza，餅底夠脆，餡料係早餐野，有火腿同蘑菇，蛋係留心，焗得熱烘烘，幾好。甜品係芝士撻，我真係唔識形容，個底又凍又硬又粉，最正常只係雪糕。仲有要左杯咖啡，係暖都算唔上，好似沖左一段時間咁，仲要好水下，救命。食得唔滿意，下次都係食返隔離漢堡包。…Read More

大埔區工作，食個下午茶先出返市區，原先想係群姐食完個麵再食腸粉，，不過好多人，應該半個鐘都無得食，轉左黎第二選陳漢記食腸粉。要左兩款，一款係叉燒腸一款係豬潤腸，皮薄到見到餡，先聲奪人，餡料方面，叉燒正常味道，豬潤切成條狀，食落唔算粉嫩，成兜腸粉問題唔太大，不過鼓油出左事，偏向比一般鼓油咸，蓋過哂d腸粉味。腸粉可以跟餐，要杯菠蘿冰，其實係糖水，早知飲返奶茶好了。腸粉都唔錯，係鼓油影響了個味道。跟我既腸粉首選堂記比較，我還是喜歡那邊多一點，不過這裡就唔洗等上十五分鐘以上。…Read More

荃灣區工作，同事話帶我食好野，原來就係黎食奄列，聽就聽得多，食就未食過，一場黎到，又試下。有大有細，要個細好了，一大堆頭，細都幾大份下，裡面係滑蛋，面頭係大量滷水汁，咸咸地，其實只係正常奄列味，賣點只係大大件。伴有份麵包腍哂，仲要好油，救命。要杯咖啡，係奶了點，不過都可以叫做正常茶記水準。地方小小，平日都人氣爆旺，食完要即閃。…Read More

印象中這裡的羊肉餃很不錯，是日再來試試。除了想食羊餃，要個手撕雞飯同白肉，都應該夠飽。羊餃，沒有太多調味下，羊味突出濃郁，又唔會太羶，很不錯呢。皮厚道剛好，唔會太薄穿餡，太厚又影嚮食味，還是做得不錯的羊肉餃。手撕雞飯，賣相真係好一般，味道就正正常常。白肉，切得較薄，無咩咬口，肉實實地，同無咩味，全靠面頭果堆醬汁。印象中彩雲南這味做得唔錯，聽黎搵日都要去再幫襯。中環區，幾經濟既選擇。…Read More

N年前幫襯過，係我赤柱既首選。今次入赤柱，又再黎試試。頭盤係四款小吃，印象最好係個脆脆，香口野真係無得講，永遠都夠吸引。到呢到既名物，海鮮桶，海鮮都係正常水準，成年事都係靠個白酒sauce，夠creamy，又唔係太膩，適合桶入面既海鮮，全部都好夾味。主菜只要了煮鴨肉，煮得熟了點，個醬汁味道都係一般。甜品反而唔錯，特別係青蘋果，果種青澀味，真的很吸引，Lemon Cake，一向唔係我杯茶，不過呢個唔係檸檬香精feel，都唔錯呢。飲品只係要左Cider，果汁味，無咩好講。對住個海食飯，心境舒暢，這裡仍然係不錯的地方。…Read More

週六的午餐，只想飲茶，食返幾個點心，隨意的黎左呢到。燒賣，飲茶唔係燒賣就蝦餃，今次要左燒賣，這裡的蝦同豬肉平均，好食，唔係好似連鋪酒樓一味係用蝦黎賣頂點。春風得意卷，腸粉皮厚道適中，入面春卷鬆脆，都幾好食。臘腸卷，用上稍肥既臘腸，肥膩野本身就很有吸引力，挺不錯呢。雞扎，有火腿魚肚雞冬菇，唔會變奏變左蟹柳魚肚雞無冬菇，穩陣水準。蛋撻仔，個人喜好係茶樓叫既點心之一，因為常有驚喜，這裡的充滿蛋香，酥皮一層層都好鬆化，係好個唔少麵包鋪。蒸飯，飽肚之選，好多地方蒸飯唔係太油就係飯太腍，這裡的適中，都算係咁樣。周圍都係點心店同埋大型連銷酒樓，這類小酒家難免被忘記，又或者可能覺得老店已經水準不再，其實水準都仲ok。…Read More

是大坑晚飯的一晚，首選沒位，最後兜到黎呢到。沒有做任何既準備，唔知咩係呢到撚手，都係揀自己想食果d。先黎前菜要左個白酒煮青口同火箭菜蘑菇。白酒煮青口，個汁好水下，個味仲有點澀，青口新鮮度亦麻麻地，唔太ok既青口。火箭菜蘑菇就好好多，好既地方係蘑菇焗得剛好，幾juice，面頭仲有芝士多份芝味，很不錯的。燒雞，肉夠滑，汁調得好亦幫到成件事，穩陣款式。另一款係臻子羊架，聽個名感覺係幾古怪，不過食落幾驚喜，甜甜既臻子配上淡淡既羊羶味，個味係幾夾，亦適合怕羊羶味既朋友。仲有就係要千層麵，料下得夠狠，無焗過火，意粉唔會腍哂，好食過唔少連銷西餐廳。餐廳本身係酒吧，見仲有酒，亦要左魷魚鬚做下酒小食，即炸熱辣辣，粉亦夠薄，魷魚真係伴酒之選。周不時雜誌都有大坑餐廳既介紹，但都好少介紹呢間，其實水準都唔錯。…Read More