Janisu的個人專頁

想獨自食個快lunch嘅時候就會諗起呢間麵舖，比較鍾意去地牢呢間分店，因為佢大間啲、寬敞啲，所以多數都會有位，仲坐得舒服啲，唔使好似威靈頓街嗰間咁，要喺店外排隊，同埋坐低食嗰陣要同隔籬個人手踭撞手踭！鍾意食佢哋嘅招牌鯪魚球同滑牛肉雙拼。大大粒嘅鯪魚球，鮮味十足，食落去爽彈。牛肉係鮮滑牛，肉質鮮嫩，仲有好香麻油味。油菜可以揀湯菜，通常都係通菜或者菜心，浸喺大地魚湯底入面，菜都變得特別鮮甜。同埋湯菜冇油，感覺健康啲。雙拼麵再加一碗湯菜只係$67，中環嚟講真係非常抵食！…查看更多

位於銅鑼灣柏寧酒店大堂的 Ebb & Flow 酒吧，原來有個好抵嘅 HH package🥳 逢星期一至五下晝4點至8點，$198 加一就有兩個鐘頭 free flow 嘅紅白酒、啤酒、Prosecco 和精選烈酒，平過你開枝house wine 🍷🥂🍻除咗酒，酒吧由5點到7點半仲會有無限量供應嘅小食，選擇有五到六款，仲有cold cut 同事cheese platter。如果覺得唔夠，仲可以試埋佢哋個港式風味小食拼盤——The Champion Platter，裡面有炸雲吞、蜆芥鯪魚球、避風塘雞翼、波浪薯條和沙嗲串燒，味道唔錯，而家賣相都幾打卡添！講返餐廳環境，呢度啲座位都算幾寬敞，枱與枱之間距離適中，唔會同隔離枱太近，成個用餐體驗好舒適。喺銅鑼灣這鬧市可以搵到一個坐得好又唔貴嘅地方真係唔錯，二百幾就可以任飲任食，值得推薦！…查看更多

金色不如歸嘅湯底確實同其他有唔同，佢哋用大蜆、豚骨同魚介熬製，因為有蜆，所以湯頭比其他拉麵店多咗份海鮮嘅鮮甜。拉麵用嘅係北海道「春よ恋」麵粉，呢隻麵粉係由芳香甘甜嘅北海道春之戀小麥製成，麵條小麥味濃，仲好甄韌。不過，雖然味道都ok，但拉麵份量比較細，同埋淨係跟兩片薄薄嘅叉燒同京蔥絲，如果你真係好肚餓，可能會覺得唔夠飽🤭喺呢個時候，你可以好似我咁叫埋佢哋嘅餃子🥟味道OK，加埋拉麵就剛好後飽喇😬 價錢同份量唔係好成正比，所以只會試一次咁多啦。…查看更多

最近試咗上環信德中心嘅望月軒，以中菜廳嚟講，雖然佢面積唔算大，廳面大約有十幾張枱，但係環境唔錯，特別係靠窗嘅嗰幾張枱，可以望到昂船洲大橋，景觀開揚，真係幾舒服。佢另外仲有幾間包廂添。佢哋嘅$368孖寶套餐真係好抵食!入面有20款菜式可以選擇，最吸引嘅係有波士頓龍蝦。我哋最後揀咗蒜蓉開邊蒸龍蝦同埋鐵板安格斯牛柳。龍蝦新鮮得嚟，又鮮甜彈牙，真係好好味！牛柳腍得嚟又有肉味，唔似有啲酒家用蘇打粉醃到冇晒味，而佢個調味帶有陣孜然味，食落去好惹味。另外，我哋仲試咗紅燒乳鴿，皮脆肉滑，裡面仲有肉汁，都ok。最後食埋個脆米海皇泡飯，湯頭鮮嫩，脆米同白米嘅雙重口感，大滿足！…查看更多

大熱天時去食熱焫焫嘅豆腐湯，以為唔洗排隊，點知都係要排，估唔到大家都咁熱愛30幾度食豆腐湯🤣 咁係因為佢其實佢中上黎講CP值都算高，同埋佢都幾好食😋 午飯時間去，幸好等咗大約15分鐘就有位。一坐低，侍應即刻送上冰水同前菜。前菜有啲驚喜，佢地唔止有傳統嘅泡菜，仲有辣炒年糕同韓式炒粉絲。主食方面我試咗佢哋嘅豬肉豆腐湯配牛小排套餐，豆腐湯滾住咁上嚟，散發住香濃嘅泡菜味同鮮味，熱辣辣嘅豆腐湯配白飯，真係好開胃。而牛小排就醃得好入味，但醃料又冇蓋過牛肉本身嘅肉味，味道剛剛好，肉質有嚼勁得嚟又唔會太韌。整體嚟講，呢個午餐真係唔錯，等到冬天再嚟過😆…查看更多

記得以前去一品六點半後就要排隊，同埋淨係可以食兩個鐘。可能係星期一嘅關係，唔使等位，仲要埋單嗰陣阿姐叫我哋坐耐啲 😆 真係今時唔同往日⋯⋯但係食物質素冇乜點變，雞煲同以前一樣咁惹味，佢秘製雞煲嗰個醬汁真係同其他地方唔同，有佢自己獨特嘅香料味，辣得嚟又帶點甜味，啲雞肉都好嫩滑。呢個汁加埋佢哋個煎米粉餅真係冇得輸！加湯前再用個醬汁嚟煮水魷、豬皮、凍豆腐，朔晒啲汁好好味！記憶中佢哋嘅火鍋料其實冇乜話特別出色，但係琴晚發現佢哋個手打墨魚丸其實都幾足料，好彈牙，裏面食到有大大粒嘅墨魚粒，係幾好食。人均消費$300左右都食到好飽，香港而家出街食嘢咁貴嚟講，都算正常啦。不過服務就⋯⋯唔好講喇，成個樓面得幾個人做嘢，都明白佢哋嘅感受嘅😅…查看更多

朋友介紹呢間小麵館，佢真心推介，仲話已經返兜過，搞到我都有啲期望😆 一入到去就聞到好香嘅沙茶味，原來係佢哋招牌，咁就一定要會一會佢啦😌我試咗佢哋嘅滑牛肉沙茶湯麵，茶沙湯底真係好香好濃，而且濃而不鹹，食完之後返屋企都唔覺得口渴。同牛肉簡直係絕配，好似沙爹牛麵咁正，不過沙茶嘅香味比沙爹更加出色，因為入面多咗蝦米同魚乾，海味十足，食落去更加惹味。麵條方面，係我鍾意嘅Q彈台灣麵😍口感好好。而且麵嘅份量適中，同埋配料一啲都唔hea，有豬肉碎同雜菌（羊肚菌同海鮮菇），以53蚊呢個價錢黎講，足夠果腹，真係唔錯！下次想試埋佢哋嘅蕃茄紅酸湯同埋鹽酥雞，望落都好似幾正，期待下次再嚟！…查看更多

咩～～係羊咩個咩～主打羊肉邊爐嘅餐廳🐑🐑餐廳環境似打排檔，幾有香港特色，仲有一種輕鬆嘅氛圍，好啱大班人一齊圍爐 😌佢哋嘅羊肉部位幾特別。我哋試咗羊羔肉同羊上腦（即係羊頸肉），兩樣肉質都好鮮嫩。羊羔肉嘅肉味比較濃，食落去口感好滑。而羊上腦就相對較少騷味，仲帶有一陣奶香，連平時唔食羊肉嘅朋友都覺得好味。至於其他火鍋料當中，佢哋嘅爆汁鹹蛋魚丸真係唔錯，魚蛋Q彈，咬落去仲有濃郁嘅鹹蛋漿，好味😋食到最尾，湯底結合羊肉鮮味，變得更加鮮甜！如果你係羊肉控，呢度真係值得一試！…查看更多

最近試咗Bingo & Cook個醬油蟹任食，雖然醬油蟹嘅質素可能比唔上喺韓國食到嘅，但係喺未去到韓國之前食到醬油蟹，仲要係放題！！其實已經好開心啦！餐廳嘅裝修都幾有特色，入口等𨋢位置仿效韓國地鐵站牆身，令人一行入去就好似去咗韓國咁。座位仲要係韓國成日都見到嘅圓枱配圓桶櫈，氛圍感滿滿！餐廳中間佈置咗個帳篷，個feel就好似喺韓國啲路邊攤度食緊Street Food咁 😙講返個醬油蟹，雖然隻蟹啲肉質唔及喺韓國食到嘅咁爽口，但係蟹肉醃得好入味但又唔會太鹹，有膏得黎又啖啖肉，頭一轉上蟹仲配埋蟹蓋同生雞蛋，送飯啱晒！除咗醬油蟹，餐廳仲有其他熟食提供1小時無限放題。韓國Street food又點少得Tteokbokki呢，味道比想像中甜咗啲，但辣度適中，舊舊都入味。仲有可以試埋佢地個蒜香焗蟹，有濃郁嘅蒜香同焗香咗嘅美奶滋，同蟹肉好夾。另外可以留肚食吓佢地個韓式炸雞，啲雞炸得好香脆，不過就乾咗少少，但係唔梗要，佢地有汽水任飲😂…查看更多

中環分店位於安蘭街，一條旺中帶靜嘅小巷，同灣仔本店一樣好受歡迎，開門之前就已經見到一條人龍！不過如果唔介意坐bar 枱，其實好快有位。餐廳裡面嘅環境好有泰國feel，座位同擺設都好有地道風情，坐bar枱其實唔錯，可以喺open kitchen望住廚師煮嘢食，仲多一份娛樂性 😙我試咗佢哋嘅和牛船麵，湯底燶而不鹹，味道好正！金邊粉好Q彈，食落去真係好authentic，食得返泰國嘅味道。牛肉係和牛，肉質嫩滑，仲帶有少少油香，一個字：正！😋 朋友試咗泰式打拋和牛配油炸雞蛋飯，肉碎炒得好香，搭配隻燶邊太陽蛋撈飯，真係正到爆！總括而言，呢度嘅食物真係好食，但價錢稍微貴咗d，值得一試！如果掛著泰國船麵又未飛到嘅時候，呢度係可以幫你止止癮😆…查看更多

無意喺銅鑼灣廣場二期附近一棟大廈樓下見到呢間餐廳個banner，佢地啲套餐睇落幾抵，咁就上咗去試吓啦。一入去就俾餐廳特別嘅環境吸引，裡面擺咗好多懷舊玩具做裝飾，靠窗嘅卡位又有靚景，配埋餐廳裡面昏昏黃黃嘅燈光，好似去咗sky bar 咁，但又同時好似去咗間隱世居酒屋咁，好得意呀！食物以串燒為主，有唔同價格嘅套餐，份量好足，食物嘅味道亦都幾唔錯！每一串都燒得啱啱好，調味唔會太鹹，確實有驚喜😍 呢度店員服務態度隨性但係又非常親切喎，個感覺好似去咗朋友屋企食飯咁😆 聽店員講，原來星期日通常係唔開嘅，不過又唔知點解我哋今次經過又啱啱撞佢哋開，可能因為老闆都係隨性嘅人🤣🤣如果第日行開銅鑼灣諗唔到食乜，可以試吓呢間咁特別嘅小店 😙…查看更多

睇戲前想食個快飯，發現原來D2 Place 呢度都有間金鳳，見又有位，咁就試吓啦⋯⋯，舊式西餐加新式裝修，雖然個look唔同咗，但味道依然，係懷舊嘅味道呀😌 酸尾尾嘅餐湯加熱焫焫嘅餐包，鐵板雜扒加香噴噴嘅黑椒汁，底下仲鋪咗波浪薯條添😍 價錢都好懷舊，好似同以前啲嘢一樣咁平！呢個滿足二人餐！$258（加一）有兩個餐湯、一份扒、一份焗飯/意粉、一份小食，兩杯飲品，仲要凍飲唔洗另外加錢！晚餐嚟講真係好抵呀 🤩…查看更多

想食得好過去千両，又唔想食到Tokio Joe 咁豪，魚治就最啱 😌 居酒屋嘅格局，但座位又唔迫，坐得好舒服。午市套餐價錢由百幾蚊至300幾蚊不等，豐儉由人，有刺身又有熟食。不過，午市時段通常都好快坐滿，建議大家提前訂位。 試咗佢哋嘅炙燒海鮮丼定食，覺得最高CP係呢款🤗呢個套餐有4款炙燒刺身🐟🐠🦐，仲有鰻魚、蟹肉同溫泉蛋🦀🥚，食材好新鮮，刺身炙燒之後更加香！ 另外，套餐仲配有小食同埋麵豉湯，食完飲埋個麵豉湯就夠晒飽！總體嚟講，魚治嘅午市套餐加埋環境同服務性價比都算高。如果喺中環想搵個嘅地方食個happy lunch，呢度都係一個好選擇！…查看更多

好耐冇嚟過，不過佢地無論係頭盤、主菜定甜品，食物嘅份量都依然係咁大，所以都算抵食。唔知係唔係以前唔留意呢🤭唔覺佢哋餐牌上好多選擇都係以雞為主，從頭盤到主菜都係，真係雞全部都係雞🐔頭盤試咗焗薯寶，配上sour cream，味道好夾👍🏻 但係佢地個Buffalo Wings 就差啲喇，唔知點解個汁比平時食到嘅酸，酸到聞起上嚟都有啲刺鼻，味道唔係我哋想像中咁好食。其中一款主食我地試咗佢地個烤蒜雞肉蝴蝶粉，蒜香濃郁，仲帶有一絲芝士味，蝴蝶粉煮得剛好，al dente，真係好味！🍝因為佢哋食物份量大，通常到甜品時，大家都只可以食到少少，所以最終都係分一件幾個人食。如果想試多幾種芝士蛋糕的味道🧀🍰，可能要去多幾次，先可以試到多幾款😝…查看更多

今次喺翠玉軒食飯，真係俾我感受到一種美味同傳統嘅完美結合，成個聚餐都係讚聲不絕。包房設計幾靚，弧形玻璃令到空間感十足，環境又舒服，仲有獨立洗手間，私隱度高，真係好適合聚餐。鴻運金豬：肉質多、皮薄，出菜時仲保持住皮脆，搭埋糖同乳豬醬，真係好味。翡翠帶子蝦仁：西蘭花煮得啱啱好，保持住鮮脆感。蝦仁又大又爽口，帶子新鮮彈牙。百花蟹鉗：口感鬆化，又有馬蹄嘅爽脆，仲有少少芫荽提升味道，好正👍🏻發財蒜子瑤柱脯：質量超高，粒粒都好似五蚊硬幣咁大，髮菜又冇碎濕濕，食落好有口感。蒜子煮得入味，豆苗鮮嫩，成體味道好好。海皇竹笙燴燕窩：湯底又鮮甜，加埋足料嘅燕窩，係高級嘅味道😌唔會好似漿糊咁杰塌塌。原隻南非（八頭）鮑魚拌玉掌：鮑魚同鴨掌炆得啱啱好，鮑魚肉質彈牙，唔會硬到擦子膠咁，鴨掌入味得嚟入口即化。古法蒸大沙巴龍躉班：魚肉新鮮，冇腥味，大量蔥加蒸魚豉油，鮮味十足。當紅炸子雞：雞肉又嫩又香，完全冇雪藏味。瑤柱金菰炆伊麵：伊麵滑得嚟又唔黐，食落仲有Q彈嘅感覺。飄香荷葉飯：荷葉嘅清香增添咗風味。炒飯雖然有汁，但都保持住乾爽，好味🤤 就算飽都想食多兩啖🤭紅棗蓮子桂圓茶湯丸：湯圓嘅芝麻餡很香濃，紅棗同蓮子嘅軟硬度啱啱好，飲落覺得好滋潤清甜薑汁糕、奶皇炸煎堆仔：芝麻奶黃棗外皮鬆脆，奶黃餡嘅甜度啱啱好，完全冇油膩感。薑汁糕嘅甜度都適中，味道唔錯。整體嚟講，翠玉軒嘅食物水準中上，無論係口味定服務都令我覺得滿意。今次我哋15人嘅份量仲有好多可以打包，絕對係一個值得推介嘅用餐地方！…查看更多